Dalam dom bruk ngak daok rah tabiak di Hoa Kỳ, ndom puac di Thủ tướng Phạm Minh Chính di Đại học Georgetown, di ban ine Washington hu chính giới, học giả saong rilo sinh viên di Mỹ taong yaom glaong. Thủ tướng Phạm Minh Chính ndom lac, atah di ini labaih sa adit, Tổng thống Hoa Kỳ Joe Biden nao rivang Việt Nam hu makna biak praong di sajarah, gam haong Tổng Bí thư Nguyễn Phú Trọng brei thau bruk paglaong talei pambuak gauk tagok Pambuak bruk praong abih gah kayua saron mbon, pambuak gauk saong cak rok patagok khang kajap. Ong David Shear, urang lambaok negar Mỹ dalau deih pak Việt Nam brei thau: Kadha ndom puac di Thủ tướng Phạm Minh Chính biak ginup abih tuk hu ndem tagok dom bruk hu makna praong dalam talei pambuak bruk di Việt - Mỹ saong ong caong khin lac rajaei saong rahra di dua taneh ia meda kham marat piah ngak salah jalan ba tabiak di Thủ tướng Phạm Minh Chính.

Meng harei 25 tal harei 27/9 tal, hu peih Nyaom roya dam dara naih gheih ngak tui panuac Wa mbang ka 7. Ini lac panuac khan hu ba tabiak dalam mbang họp báo kayua kapul dam dara CS Hồ Chí Minh pakat negar peih tabiak tuk mesup ini di Hà Nội. Nyaom roya tui kuhria hu mbaok 420 urang lac dom urang jakar, urang đoàn, dam dara naih gheih, hu angan dalam bruk ngak, dalam bac ta-a, dalam ngak bruk, lac lambaok ka dam dara di dom puk plei,, dom tinh ban, lac kreih camin hadah dalam bac megru saong ngak tui jalan hadah krah siam mekre di Hồ Chí Minh, siam hatung hatian, abih drei hu mbaok tame dom bruk puk palei, hu angan je dalam urang đoàn, dam dara, hu pakat ủy, urang pan akaok jabat, labik ngak saong rahra pok meyaom. 

Peih ngak Danak dak bruk ngak negar ka bruk cak rok patagok kinh tế - xã hội bhum mikva bangsa takik saong bhum ceik tukvak 2021 - 2030, tỉnh Gia Lai hu padang ngak 88 labik daong ka mikva bangsa takik pandar công nghệ khau tin di 15/17 huyện, ban sit. Tui nan, dom labik caik labik daong di dom xã di bhum III, atau xã oh daok dalam bhum III min hu puk palei biak kan kandah (yaok xã 1 labik) saong tani tanat dom bruk yau ye hu blaoh sang danaok khang kadang saong danak dak jalan mbak padang ngak, lagaih ka rahra hu mai pambuak, pandar dịch vụ; tani tanat salamat, an ninh ka anek manuac, drap ar, pandap panda; hu gom dien tani tanat.

Di tỉnh Tây Ninh, kapul urang kumei huyện Gò Dầu vbahrau pambuak bruk haong kapul urang kumei huyện Châu Thành peih ngak danak dak daoh tamia saong jao pandap ka urang kumei saong uranaih DTTS daok pak nan. Dalam danak dak, mban peih bruk hu alin hadiah 50 paok pandap lac brah, mì, saradang, bột ngọt, menyek mbang… brei ka hội viên urang kumei DTTS gaok kan kandah di dalam xã Hòa Hội, huyện Châu Thành. Ini lac bruk ngak hu makna siam di kapul urang kumei huyện Gò Dầu haong kapul urang kumei huyện Châu Thành piah paglaong hatai sahneng, daong sangka raidiuk , khik caga urang kumei saong uranaih, daong peih ngak siam bruk likei kumei samu gauk saong langyah dom bruk samar drah ka urang kumei saong uranaih, abih di nyu lac urang kumei saong uranaih dalam bhum DTTS.  

Tapa pasang iek jaik 9.850 labik raong glang, athur, manuk ada daok peih dalam tỉnh Đồng Nai, gah chức năng duah mboh hu labaih 300 labik raong glang di 10 huyen, labik ka oh hu pabak adat alam môi trường min lac hu mbaoh tangin tame harak gar ngan haong 4 doanh nghiệp hu phun jien buh tame meng negar langiu. Dom labik raong glang rilo meng lac mbaih saong sit, hu takik labik raong glang praong. Sở Tài nguyên saong Môi trường tỉnh Đồng Nai ieu kakei UBND dom huyện saong ban Long Khánh samar drah pasang iek, hu jalan langyah ngan haong dom labik raong glang pak sang min oh hu adat khik caga alam môi trường, hu harak adat alam môi trường praong pakat huyện, pathau khan taong yaom bruk ngak kanjak jhak di alam môi trường pakat tỉnh.

Dalam binah peih akaok harak ndom puac di drei dalam mbang ginum biai pakat glaong Đại hội đồng Liên hợp quốc ngan saong kadha dak padang veik hatai jia saong jhul tagok bruk jum pataom dunya, daok rah tabiak di jabat Liên hợp quốc daok di New York, Tổng thống Hoa Kỳ Joe Biden hu brei thau praong dalam talei rohim Việt Nam – Hoa Kỳ, dalam nan hu ndom lac, oh hu thei sahneng tal bruk lac hu sa harei Tổng thống Hoa Kỳ dang tapen urang pan akaok Việt Nam di Hà Nội saong hu panuac sanya jhul talei pambuak bruk tagok glaong di abih. Ini lac sa bruk brei mboh dom taneh ia meda yam tapa saman dahlau, meng cagar gauk meda jeng pambuak gauk piah ba gauk langyah dom cuang kandah saong pambuak pasiam dom pandik harao. Tổng thống Biden brei thau lac Hoa Kỳ halan hatian pambuak bruk haong dom taneh ia piah langyah bruk meriak gauk saong sanya jhu patagok jalan ngak rilo gah piah langyah dom cuang kandah di dunya. 

Harei kabroi, di Bắc Kinh, Trung Quốc, Akaok Mintri Cak rok patagok kinh te Nga saong Akaok Mintri Pablei salih Trung Quốc hu peih mbang nyaom biai dalam, ginum biai ka bruk pamuak kinh te di dua gah. Di mbang nyaom, Akaok Mintri pablei salih Trung Quốc Vương Văn Đào brei thau, bruk pambuak kinh te saong pablei salih di Nga - Trung patui veik hu siam lagaih jang mala bruk pato tacei jalan di dua urang pan akaok negar. Mbang nyaom di dua akaok Mintri kinh te Nga – Trung Quốc hu peih tabiak gam tukvak Ngoại trưởng Trung Quốc Vương Nghị daok nao rivang Nga. Bruk ini jeng brei mboh talei pambuak gauk di Nga – Trung daok di tanut siam di abih, oh huac kanda dom bruk catang tagok taong phat di phương Tây tame Nga pambuak tal bruk mesuh gauk di Ukraina.

Hãng ngak kapal haoh Boeing di Mỹ harei ini ba tabiak panuac kuhria mboh dahlau lac, Trung Quốc brei hu tal 8.560 kapal haoh pajeng ba bahrau mbiah tal thun 2042, kayua patagok kinh tế saong bruk nao mai dalam taneh ia dak harei dak tagok. Bruk kuhria mboh ini nyu tagok jang tui kuhria mboh dahlau di thun blaoh tuk mboh lac dom hãng kapal haoh Trung Quốc meda caong hu 8.485 sruh kapal haoh bahrau dalam 20 thun tal. Di bilan 6, Boeing brei thau lac urang jeng daok mboh hu siam lagaih ka Trung Quốc lac taneh ia meblah 20% darak pasar du lịch hàng không di dunya kayua nền kinh tế saong jalan mbak daok tagok, kapal haoh di Boeing meda hu labik dang praong, daong pabak hu bruk patagok nan./.