Tui sarak 02/2023 kayua Phó thủ tướng Lê Minh Khái tui ủy quyền di Thủ tướng Rajaei mbaoh tangin tame, meng harei 3/2, yaom pablei lẻ điện (ka oh kuhria jien je GTGT) biar di abih saong glaong di abih lac meng 1.826,22 - 2.444,09 đồng/kWh. Dut saong yaom klak ye yaom pablei lẻ điện bahrau tagok meng 220 - 538 đồng/kWh. Yau nan, di yaom tagok biar di abih,  yaom pablei lẻ điện bahrau tagok labaih 13,7%, daok yaom tagok glaong di abih tagok tal 28,2%.

Tui Sở Pato megru Ban raya HCM, blah web tacei pato bruk palih ruah tui hatai caong khin palih ruah tal bac 10 oh abih jien brei ka anek saih saong amaik ame anek saih hu ba tame pandar meng harei ini 7/2. Blah web nan lac https://tuvannguyenvongts10.vn. Blah web nan pabak ginup khaw tin palih ruah anek saih di dom sang bac THPT di Ban raya HCM, dalam nan hu labik sang bac, danak dak bac, tanut chuan, tanut palih ruah anek saih tapa dom thun… jeng yau bruk daong anek saih saong amaik ame anek saih duah thau, palih ruah tui hatai caong khin di anek saih tame tal bac 10 piah hu lagaih di abih.

# Thanh tra tỉnh Bến Tre bahrau brei thau panuac tamat thanh tra ka bruk ngak tui dom adat hukum dalam bruk peih ngak sarak daong urang ngak gaok kan kandah kayua jit praong COVID-19. Dalam nan dom puk palei di Bến Tre biyar labaih, biyar suan 4,3 tỉ đồng. Langiu di nan, tỉnh daok srau kadau dalam bruk ngak cambaih dom urang hu mbang jien daong, dom urang ngak oh hu pambuak harak gar ngak bruk rilo, ngak rilo bruk, rilo gah karei di gauk.

Meng harei 6/2, jalan pasei hu pandar tui rilo danak dak trun yaom harak vé  hadei Tet ngan haong dom yau radaih pui  Thống nhất SE1/SE2, SE5/SE6, duh ka tuai. Tui nan, tuai blei ve dahlau meng 5 -9 harei hu trun yaom 5% jien blei vé, blei dahlau meng 40 harei tagok  trun 30% jien blei ve. Yau nan min, bruk brei trun jien ve oh pandar ka ka janih khaghe ndih sa khoang 4 laneng, 2 laneng radaih SE1.  Dahlau di nan, Cty cổ phần Pajeng ba jalan pasei Hà Nội jeng brei thau, meng harei 6/2, jalan pasei  hu ramik pasiem veik tukvak peih radaih pui Thống nhất hadei Tet, yaom ve trun tal 20% dut saong tukvak tabung glong di Tet tui jalan peih, atau janih radaih.

Anak bruk độ mbak di dom kraong praong daok tagok glaong, Ban tacei jalan pacang caga bala langik tasik saong duah urang njauk bala di tỉnh Bến Tre hu panuac ieu dom puk palei, Công ty mek pandar danak dak thủy lợi, Công ty pabak – tathuak ia saong Pasak ia hacih saong saat alam môi trường palei pala Bến Tre samar drah peih dom jalan ngak pacang caga njom ia mbak, piah pacang ia mbak mbang tame dalam mblang hamu ngak kan kandah tal bruk pala drak, raidiuk di bhap bini. Gam tui di nan jeng kakei rahra dut iek, pasang iek do mbak dahlau di tuk mek ia nao pruh ka phun piah plaih di khat lahik.

Gah Y tê dunya brei mboh bruk haduh hatai ka urang metai dalm mbang megei baoh taneh di  Thổ Nhĩ Kỳ saong Syri meda daok tagok glaong, tui kuhria meda tagok 8 mbang dut saong kuhria mboh tuk camereip. Dahlau di nan, WHO kuhria mboh lac urang metai di dua taneh ia ini lac labaih 2.600 urang. Langik la-ar gam ribuk tuyết biak kan kandah di bilan la-ar ba tal bruk daong urang njauk bala gaok kan kandah jang dua mbang. Urak ini dom kapul nyaom di dunya saong yaok pluh taneh ia brei panuac khin daong saong daok peih bruk daong Thổ Nhĩ Kỳ saong Syri duah saong daong dom urang gaok bala hadei di mbang megei baoh taneh.

Pambuak tal bruk Mỹ cuh laik sa khinh khí cầu hu brei thau lac piah pasang iek di Trung Quốc puac adit bloh, brei panuac haong urang ngak mbao, Tổng thống Mỹ Joe Biden ndem veik panuac di drei lac, khinh khí cầu ini njauk cuh laik trun aval abih di tuk lagaih. Ong jeng brei thau lac, bruk ini oh ngak trun nao talei pambuak bruk pambuak Mỹ saong Trung Quốc saong dua gah thau cambaih laih jalan ngak di gauk. Dahlau di nan, Mỹ ndom lac baoh khinh khí cầu di Trung Quốc par tapa bhum taneh di drei lac sa pandap pasang iek, yaom lac Trung Quốc brei thau ini lac sa pandap dân sự piah roh duah bruk langik tasik.

Yaok pluh ribau bac si, y ta saong urang daong manuac njauk rambuac di Anh hu trun jalan hu rilo manuac abih kuhria meng dahlau mai hadei di dom mbang oh njauk gauk ka jien bilan ngan haong jabat khik iek lac Dịch vụ Y tế negar Anh (NHS). Dom urang y te caong khin tagok jien bilan dalam tuk taneh ia Anh daok dalam tuk lạm phát glong abih kuhria dalam 4 pluh thun tapa. Dom urang ngak praong di Rajaei Anh daok sahneng kuhria tani tanat ka bruk tagok jien bilan kayua huac jien buh tabiak rilo jang kadung jien di karja saong daok ngak brei yaom kaom tagok glaong./.