Page ini (15/3), di Sang Quoc hoi, peih pakak  Mbang nyaom ka 21 di UBTVQH. Njauk caik hatai lac di mbang nyaom ini, UBTVQH peih bruk tangi sua saong javap calei dom asar kadha gah Tòa án saong Pasang iek. Ngan haong nyaom dom asar kadha di gah Tòa án, asar kadha tangi sua hu dom jalan brei paglong bruk pasang iek langyah, langyah dom vu an, abih di nyu nan lac bruk kinh te, tham nhũng; bruk langyah đơn likau langyah mbang puac, iek veik. Dom bruk ka dua di gah pasang iek. Jalan paglong asar bruk ngak quyen kong to saong pasang iek bruk ngak tư pháp dalam langyah dom bruk ngak suan hukum hinh su, abih di nyu nan lac dom bruk gah kinh te, tham nhũng; oh caik rah tabiak bruk kurang oh abih kol toi pham, kaoh duas oan ka urang oh ngak duas.

Meng harei ini (15/3), Gilang pariak Karja Việt Nam brei ramik veik dom yaom jien laba điều hành. Dalam nan, yaom jien laba ka phun jien brei mesraiy veik daok khik tamo di tanut 6%/thun, yaom laba chiết khấu veik trun, meng 4,5%/thun trun daok 3,5%/thun; yaom laba brei mesraiy tapa melam ngan saong dom gah brei mesraiy trun, meng 7,0%/thun trun daok 6,0%/thun. Bruk ramik veik brei trun dom yaom jien laba điều hành lac jalan ngak lagaih haong bruk di darak pasar urak ini, piah pasiam patagok kinh tế di Quốc hội haong Rajaei.

Liên đoàn Lao động TP.HCM brei thau, du thao Hukum BHXH, ralo urang  ngak di Ban raya HCM haduh hatai hadei di tuk bruk ngak oh hu tani tanat ye bruk mbang tui BHXH yau habar; langiu di nan du thao Hukum Bruk ngak meda hu salih karei pambak tal bruk lahik bruk ngak jeng ngak ka urang caik hatai sangka. Tui nan, urang ngak di Ban raya HCM sangka tal dom harak gal tacei pato bruk taduan  jien daong hu mbuan lagaih ngan haong urang ngak, padeih bruk oh mbang jien bilan; padeih klaoh sarak pambuak bruk min oh ginup tui hukum daong jien lahik bruk ngak kayua doanh nghiep takik hu bruk ngak. 

Glut jaleih takai kraong Mỏ Cày di ban sit Mỏ Cày saong xã Tân Hội (huyện Mỏ Cày Nam) atah abih tih 680m daok ngak kan kandah tal dom labik ngak bruk di karja saong rilo sang bhap bini, abih di nyu lac ngak kan kandah tapak tal jalan Roya 57. Kayua yau nan ye, UBND tỉnh Bến Tre hu tabiak harak ieu panduan ba samar menuac haong drap ar tabiak truh labik mbuan glut jaleih, gam haong nan, brei pacang veik, oh brei menuac haong radaih tame labik glut jaleih. Anak meta, gah chức năng daok ngak dom bruk meda ngak hu piah patrun patakik bruk glut jaleih, khik salamat ka ar pacang, ka menuac sia saong drap ar di bhap bini.

Piah patui jalan jhul pakhang  bruk pacang caga chap mek kaya ikan suan hukum, oh khan brei thau saong oh tui bruk ba tabiak (IUU), UB bhap bini tỉnh Cà Mau birau ba tabiak Chi thi iew dom pakat dom gah pambuak tal brei pakhang  bruk pasang iek gilai chap mek ikan di tasik; gilai tame tabiak pabah tasik ikan, pacang caga, langyah dom bruk ngak suan tui sarak hukum. Pasang iek catang urang saong gilai ikan tame, tabiak pabah tasik, khik kajap oh brei gilai ikan ngak bruk tuk oh ginup bruk ba tabiak. Peih bruk brei hu mbaok urang khik iek luac harei melam piah pasang khik bruk ngak di gilai ikan di mac jamraih piah samar thau, gam peih ngak dom jalan pacang caga gilai ikan jaik lih tame tasik negar langiu.

Meng harei 15/3, Trung Quốc brei pandar veik taong abih dom janih visa. Urang negar langiu hu visa hu ngak brei dahlau di harei 28/3/2020 daok tukvak pandar, jeng meda tame Trung Quốc. Trung Quốc, hu mek veik panuac kakei bhap bini oh nao ravang me-in negar langiu di bilan 1, saong brei pabak 40 taneh ia karei tame angan brei adat peih dom mbang ravang me-in tui kapul nyaom, tui nan abih tih dom taneh ia  hu tagok tal 60. Bruk gah ravang me-in hu pasiam veik, meda daong dui tagok kinh tế Trung Quốc yaom 17.000 tỷ USD hu mboh dalam thun 2022, lac sa dalam dom tốc độ tagok suai abih dalam jaik 50 thun tapa.

Dalam harak ndom puac anak dom urang ngak di sa sang mac ngak kapal haok  di Buryatia, Tổng thống Nga Putin lac, hu labik brei mboh bruk haduh hatai ka bruk ngak mbang kinh te di Nga meda kan kandah tuk phuong Tây ba tabiak rilo jalan taong phạt oh bhian mboh di thun 2022, min bruk kinh te Nga saong he thống khik iek brei mboh prein khang saong bruk độc lập biak praong. Dahlau nan harei 21/2, dalam harak Thong diep lien mbang  mbang 18 Tổng thống Nga jeng ndom lac, bruk kinh te taneh ia jeng daok dang kajap anak dom bruk taong phạt di dom taneh ia phuong Tay.

Tổng thống Mỹ Joe Biden bahrau mbaoh tangin brei tabiak sarak hành pháp patagok bruk pasang iek lý lịch di dom urang blei phao, lac bruk ngak bahrau abih dalam sarak pasang iek phao ndao hu Karja taneh ia ini maong lac ginup abih bo oh cang Quốc hội brei tapa. Sarak jeng ieu dom labik pablei salih phao hu brei adat, brei ngak njauk bruk pasang iek lý lịch saong kakei dom urang njauk pasang iek lý lịch, brei ngak ginup tui bruk pasang iek. Urak ini, jaik abih urang Mỹ jeng pachreih tui bruk pasang iek catang lý lịch di dom urang blei phao./.