Meng harei ini 15/8, bien so radaih hu Mentri Công an brei saong khik iek tui mã định danh di po radaih. Tui nan, dom radaih tut angan bien 5 laik so dahlau harei 15/8, bo oh ka ngak harak gal jao veik laik biển số nan ye laik bien so nan lac so định danh di po radaih. Radaih brei tut angan bien laik 5 so, meyah po radaih ngak harak gal payua tame piah mek veik dahlau di harei 15/8, meyah bien so nan hu payua tame gilang bien so piah brei veik tui adat ba tabiak. Dom radaih tut angan 3 laik so atau 4 laik so ye brei adat peih tabiak jalan.

Melam 14/8, di tỉnh Sóc Trăng hu rah tabiak melam taom gaok, daoh tamia Ấn Độ - Sóc Trăng meng bruk hu mbaok di kapul daoh take Ấn Độ - Qawwali saong kapul daoh tamia Khmer tỉnh Sóc Trăng. Bruk ngak ini daok dalam danak dak “Likau salam Việt Nam” thun 2023. Tapa nan amuk Huỳnh Thị Diễm Ngọc, Phaok akaok UB bhap bini tỉnh Sóc Trăng brei thau, ini lac tuk piah ka rahra Sóc Trăng duah thau ka ilamu di taneh ia Ấn Độ; hu pang, hu maong iek dom janih daoh tamia meng kan ndung bak ilamu bangsa di dua taneh ia, dalam nan hu dom janih daoh, tamia hu UNESCO pok brei angan lac inem krung ilamu oh mboh di meta di Dunya.

Kalup kapol ndem biai Vũng Tàu birau tabiak mbaok kapol, nyaom ndem biai akaok meti di Bà Rịa - Vũng Tàu. Ini lac sa kapol hu padang tabiak meng dom anek saih, sinh vien tỉnh Bà Rịa - Vũng Tàu. Kalup kapol piah pato pakai, pasram patia akaok sahaneng  ndem meyai nao mai di anek saih, sinh vien meng nan ngak jeng bruk bac da-a peih tabiak, hadah krah. Langiu di nan, Kalup kapol ndem biai Vũng Tàu daok caong khin hu jeng menuac nao dahlau dalam bruk cak rok patagok dalam bhap bini ka bruk ndem meyai nao ai khang kadang, praong prang di bhum palei. Ini lac bruk mbuan lagaih pambak praong dom bruk ngak njauk ngak, khang kajap, suai lavik di mon bac ndem meyai nao mai di dom anek saih.

Pasak daong dam dara urang ngak ban raya Hồ Chí Minh brei thau, harei 15/10 anak tal hu peih ngak lakhah ka rilo gu thun 2023, abih tih lac 150 gu gaok kan kandah. Piah hu mbaok tame danak dak, dom gu brei hu harak lakhah, caga ngak lakhah saong oh ka ngak lakhah. Tuk hu mbaok tame danak, dom gu hu daong brei: karah lakhah, daong trang điểm saong thaot lakhah, pandap lakah, pasang iek prein yava saong dom bruk me-in sambai hadei di lakhah. Langiu di nan, mban peih bruk meda pasang iek, alin hadiah sang, bilik ka dom gu kan kandah.

Anak bruk trun tagok kan thau dahlau ka yaom brah padai di  darak apsar, rilo urang blei padai brah di dom tỉnh, ban gah Pei negar tame tal hamu di mikva caik jien takai blei padai thu đông ngan haong yaom 6.900 - 7.700 đồng/kg. Urak ini, yaom padai tathak di Bhum taneran kraong Cuu Long meng 6.900 - 7.700 đồng/kg, tui janih padai. Yaom pandap ngak nong saong khak drak trun ralo dut saong akaok bilan  trun labaih 200.000 - 300.000 đồng sa bao. Yau nan ye, bilan padai thu đông thun ini mikva gah Pei negar meda yuak kuak hu rilo padai brah, jien bala rilo.

Hàn Quốc saong Mỹ brei thau lac meda peih bruk pasram mesruh “Lá chặn Tự do Ulchi” yaok thun di adit tal piah patagok bruk pacang caga haong gauk. Bruk pasram mesruh mbang ini hu peih ngak praong abih kuhria meng dahlau mai, hu mbaok yaok pluh rabau lin di dua taneh ia saong dom taneh ia di Bộ tư lệnh Liên hợp quốc. Triều Tiên hu panuac lac bruk pasram mesruh mbang ini, lac bruk pasram ka mesruh metak hạt nhân. Harei kabroi, urang pan akaok Triều Tiên lac Kim Jong-un hu panuac ieu "patagok khang kadang” prein ngak tên lửa saong caga ka bruk mesruh metak tui jalan "tấn công".

Urang jakar ngak praong di bang  Hawaii (Mỹ) brei thau, bruk khuah glai  khang harei 9/8 meng blaoh di kaoh pulao Maui ngak brei takik di nyu 96 urang metai saong labaih 1.400 urang lahik abih sang danaok. Khat lahik taong abih jaik 6 tỷ USD. Urak ini, gah daong duah urang gaok bala meng pasang iek hu labaih 3% dom bhum palei njauk duah, yau nan ye urang metai lahik meda daok tagok dalam tukvak anak tal. Urak ini, oh ka thau  kayua halei ba tal pui khuah glai, min Jabat dut iek langik tasik pakat negar Mỹ lac kayua hala kayau thu truh trun, hangin khang saong thu lagu ba tal apui khuah glai.

Dom menuac metai kayua hajan khang ngak brei jaleih taneh biak khang di Himalaya negar Ấn Độ di puac adit bloh tagok tal 41 uarng, saong yaok pluh urang karei daok lahik. Tapa dom thaot binguk mboh lac, rilo sang jaleih tayah kayua jaleih taneh, radaih buýt saong ô tô daok di angaok daning ceik glaong, yaok ratuh urang pataom gauk di dom labik daong duah menuac gaok bala. Karja palei jeng brei kreik pabah mbang dom sang bac saong labaih 700 jalan dalam bhum, gam haong nan, brei pandan ba rahra daok di dom labik mbuan glut jaleih nao daok di labik siam mekre, salamat jang./.