Meng harei ini 1/7,  Rajaei brei tagok jien bilan padeih hưu, daong jien BHXH saong daong jien yaok bilan  meng 12,5% tal 20,8 %. Tui nan urang daok mbang jien bilan padeih hưu, jien daong BHXH, jien daong yaok bilan tui sarak, hadei di tuk ramik pasiam jien daong biar jang 3 trieu dong sa bilan hu ramik pasiam tagok sumu 3 trieu dong. Jien padeih hưu, jien daong BHXH, jien daong yaok bilan tuk pasiam  tui bruk ba tabiak ini lac bruk piah ramik pasiam jien padeih hưu, daong jien BHXH, jien daong yaok bilan  di dom mbang ramik veik  hadei.

mBan Bangsa tỉnh Đồng Nai bahrau peih bruk pok meyaom 50 baoh sang urang bangsa takik abih drei hu mbaok tame bruk bac megru bhap bini, khik ramik sron mbon puk palei, ngak mbang pablei salih naih joi, daong gauk cakrok kinh tế saong patagok dom yaom glaong ilamu meng kan. Di tuk peih bruk pok meyaom, ong Nguyễn Sơn Hùng, Phaok akaok UBND tỉnh Đồng Nai, hu panuac caong dom baoh sang tuk halei jeng hadah krah, ba akaok nao dahlau, hu mbaok tame dom bruk pakacah gauk anit ranam taneh ia, jhul khang bruk cakrok kinh tế, dak padang raidiuk ilamu, khik ramik ilamu bangsa, klaak dom adat cambat klak oh daok lagaih haong saman ini, padang puk palei khang kajap gah chính trị, kinh tế saong ilamu di labik daok.

Tui ông Lý Rotha, Akok mban Bangsa tỉnh Sóc Trăng, tỉnh hu 3 labik pakat huyện lac Mỹ Xuyên, ban sit Ngã Năm, ban sit Vĩnh Châu hu taduan tanut chuan salah bruk padang ngak palei pala birau. 64 dalam 80 xã taduan hu tanut chuan palei pala birau paglong, dalam nan hu 5 xã bhum urang bangsa takik mek hu tanut chuan palei pala birau paglong.

Dalam 6 bilan tapa, tỉnh Bình Thuận hu taduan raok labaih 4 triệu 460 rabau mbang tuai mai ravang me-in, rilo jang 86% duk haong tukvak ini thun bloh. Dom bruk ngak pachreih tui Thun Du lịch negar 2023 “Bình Thuận – Pataom hijao” gam haong jalan nduac samar Dầu Giây - Phan Thiết, Phan Thiết - Vĩnh Hảo hu peih tabiak, nyu pachreih biak rilo tuai mai ravang me-in, padeih padei, nan ye jien mek tame saong tuai damuai tagok rilo duk haong tukvak ini thun bloh. Bruk du lịch hu rik daong biak praong tame bruk cakrok di tỉnh. Yau nan min, tui Cục yaok pataom Bình Thuận, dom tuai du lịch hu bruk cakrok oh samu gauk, rilo meng lac tuai dalam taneh ia, daok tuai dunya bahrau hu jaik 134 rabau mbang urang.

Tui Kong an Ban raya HCM, dalam ban raya daok 25 danak dak, bruk ngak padang sang chung cư oh ka pasang iek bruk pacang khuah padam khuah min ba tame pandar, ngak bruk blaoh. Hu labik, hu po đầu tư  chung cư  oh khin ngak, plaih njiak, oh peih bruk pasiam veik dom labaih kurang, oh ka siam gah pacang khuah, padam khuah, gah padang ngak tuk hu jabat khik iek karja tacei pato, ieu ngak. Lambaok urang pan akaok Kong an Ban raya HCM brei thau hu pok panuac pathau khan UB bhap bini Ban raya HCM hu jalan langyah iew po buh jien tame ngak samar  ngak salah tui bruk ba tabiak. Meyah oh ngak njauk tui , meda brei peih bruk chap ngak tui hukum ba tabiak.

Piah palahik abih bruk peih nduac radaih dalam tuk mebuk alak, meng harei ini (1/7) Hàn Quốc brei pandar adat phạt mek radaih ô tô tuk urang peih nduac radaih dalam tuk mebuk alak. Tui nan, urang peih nduac radaih njauk karja tịch thu – mek radaih ô tô meyah peih nduac radaih dalam tuk mebuk alak ba tal bala ngak brei urang metai, rilo menuac njauk rambus, atau ginuh menuac bloh nduac klaak, ngak suan veik rilo mbang atau ngak suan Hukum đặc biệt ka langyah bala tuk peih nduac radaih angaok jalan. Langiu di nan, Cảnh sát meda duah thau urang bhian peih nduac radaih tuk mebuk alak saong urang salih labik ka urang peih nduac radaih saong ba tangin tame daong ka urang ngak suan adat hukum.

Gah Pai langiu ban ine Paris saong dom ban praong di Prang daok hu bruk trun jalan sraw kadau pambak praong hadei di bruk sa cảnh sát patuh phao pametai sa likei dam umo 17 thun di ban  Nanterre. Rilo nyaom dam dara pataom gauk, cuh pháo hadah, jan tayah ralo labik công cộng saong am cuh ralo sruh ôtô. Dom đồn cảnh sát dom palei  hu jeng labik taong tame saong am cuh klak di dom nyaom urang sahanak. Labaih 50 labik bac da-a dalam negra Prang  khut tayah, dalam nan hu labaih 10 sang bac  njauk brei kareih pabah mbang. Rajaei  Prang brei peih jabat pacang khủng bố saong patagok bruk khik iek an ninh, salamat di ralo ban anak bruk srau kadau mbuan tagok glaong.

Pandap ngak yamen Aspartame, hu pandar dalam rilo janih pandap meng ia yamen brei ka urang mbang kiêng di Coca-Cola tal kẹo cao su Mars' Extra saong dom pandap menyum Snapple, meda hu Gah Y tế dunya (WHO) ba tame angan "meda ngak brei ung thư ka anek menuac" di bilan 7 ini. UB dom urang ilamu pambuak gauk di  gah padai brah pandap mbang dunya FAO haong gah Y tế dunya WHO ka phụ gia thực phẩm, jeng daok pasang iek bruk pandar janih ngak yamen Aspartame dalam thun ini./.