Meg harei ni uranah umo meng 5 tal 12 thun hu klauk vacxine caga ruak 

Meng harei ini, Ban raya HCM peih bruk klauk jru vaccine pacang Covid-19 ka uranaih umo meng 5 tal ala 12 thun. Dalam harei ini, taong abih anek saih bac tal 6 saong 5 sang bac tiểu học di dom quận 1, 5, Tân Phú, Phú Nhuận meda brei peih bruk klauk jru, ta-eng Quận 1 brei peih bruk klauk jru ka anek saih tal 5. Meng dah page 18/4, Ban raya HCM brei klauk jru sumu gauk ka uranaih meng tal bac 5 tal tal bac 1 saong uranaih mầm non umo 5 thun, tui jalan anek saih praong dahlau, anek saih sit hadei.

Salam uan Harei ilamu dom bangsa Việt Nam 19/4, meng harei ini tal harei 19/4/2022, di palei Ilamu – Du lịch dom bangsa Việt Nam (Sơn Tây, Hà Nội) parang tabiak yaih khan labik “Craih dalam ilamu Việt”. Dalam nan 100 blah rup thaot Craih ngan saong kadha "Craih dalam ilamu Việt" di dom urang thaot dalam taneh ia hu yaih khan. Taphia di nan, daok hu yaok rabau bingu craih hu ba meng Đồng Tháp saong Thừa Thiên - Huế tabiak. Bruk ngak ini piah pok meyaom labik dang di bingu craih dalam ilamu di urang Việt.

Dalam bilan urang ngak kong thun ini, dom pakat Công đoàn Ban raya HCM tui kuhria hu daong brei ka 200.000 đoàn viên, urang ngak ngan saong yaom jien labaih 100 tỷ đồng. Dalam nan hu rilo bruk ngak biak siam  yau nao rivang, alin pandap ka urang ngak gaok bala tuk ngak bruk, pasang iek prein yawa, daong taong ruak hadei meng njom Covid -19 ka 500 urang kumei ngak kong; gam pok meyaom urang ngak naih gheih dalam dom bruk pakacah, ngak brei laba ka D.N. 

UBND tỉnh Bà Rịa – Vũng Tàu daok padang ngak adat cambaih laih ka bruk to yaom ka yaok mblang taneh, plaih bruk doanh nghiệp klaak jien caik takai hadei di to yaom. Dalam thun ini, tỉnh Bà Rịa – Vũng Tàu meda brei peih to yaom 7 labik taneh dalam ban sit Vũng Tàu, ban sit Phú Mỹ saong huyện Xuyên Mộc praong abih tih labaih 228ha, tui kuhria mek tame hu 12.300 tỷ đồng. 

Kayua tari tarieng iek glang, khik brei ginup ia taba nan ye tal tukvak ini, bein kruac bung kalik hijao di Bến Tre oh khat lahik kayua pandiak bhang, njom ia mbak. Urak ini kruac bung kalik hijao di bein pablei yaom labaih 20 ribau đồng sa kilo, tagok 5 ribau đồng sa kilo dut saong bilan dahlau. Piah duh ka bruk pablei tabiak negar langiu, po bein peih praong taneh bein pala kruac bung hữu cơ tui tanut chuan: VietGAP, GlobalGAP; padang mã số labik pala saong pambuak haong dom D.N pabak pandap tame pala ngak, blei baoh kruac bhung pala hu.

Rajaei Hàn Quốc brei klaak abih dom jalan ngak piah paatah di gauk, piah pacang caga jit COVID-19 meng harei 18/4, langiu di bruk cuk pataih pacang mbaok meng dalam sang tal tabiak langiu. Meng bruk bahrau ini, Hàn Quốc hu mai veik haong raidiuk yau dahlau veik, tamat abih 757 harei peih ngak dom jalan patah di gauk kayua jit praong COVID-19.

LHQ khan lac, jaik 9 trieu urang di Nam Sudan, dalam nan hu 4 trieu 6 rituh ribau uranaih brei hu daong dalam thun, tuk taneh ia ini daok having akaok saong bruk taong paoh gauk tagok rilo di dom gah pan phao kraong saong kurang pandap mbang. Gam haong nan, hu panuac iew dom urang pan akaok di taneh ia châu Phi ini kham padam bruk taong paoh gauk saong khin hu bruk daong rilo jang meng dom taneh ia di dunya.

Langik pandiak tagok tal 41°C daok hu mboh di bhum Tây Bắc Ấn Độ, glaong jang meng 6 - 10°C duk haong tukvak ini yaok thun. Ini lac mbang akaok meti dalam 72 thun tapa Ấn Độ hu langik pandiak glaong tal labaih 41°C dalam bilan 4. Biến đổi khí hậu, bruk đô thị hóa lac dom makna praong ngak brei langik bilan pandiak di Ấn Độ tagok aval jang. Di thun 2015, sa mbang pandiak khang abih di taneh ia ini ngak brei labaih 2.000 urang metai./.

Urang lang: Ái Nghiêm -Mousaphuong- 16/4