Tuk vak puac abih piah tut angan song ramik veik hatai khin palih ruah lac mon 5 biar harei 20/8/2022

Bier harei 21/7, Pathau khan di Nyaom biai bac megru, thau cambaih Sarak TW 5 mbang XIII ka Sarak 20 patui bruk salih bahrau, cak rok saong paglaong kein laba di kinh tế kapul nyaom dalam tukvak bahrau, Phó Thủ tướng Lê Minh Khái hu ndom tal dom bruk njauk salih bahrau, cak rok saong paglaong kein laba kinh tế kapul nyaom dalam tukvak bahrau. Sarak hu ba tabiak bruk lac tal thun 2045 meda pachreih hu takik di abih lac 20% rahra hu mbaok tame kinh tế kapul nyaom. Peih praong bruk ngak di dom kapul kinh tế kapul nyaom, chất lượng bruk ngak samu haong dom taneh ia dalam bhum saong di dunya. Labaih 90% kapul kinh tế kapul nyaom ngak mbang hu kein laba, dalam nan hu takik di abih lac 75% hu mbaok tame dom chuỗi pambuak gauk. Dom kapul kinh tế kapul nyaom jeng pandar công nghệ, abih di nyu nan lac salih số dalam bruk ngak mbang, pablei salih, dịch vụ.

Meng harei ni 22/7, anek saih hu tut angan hatai khin palih ruah đại học tagok hệ thống tuyển sinh di mintri pato pakai. Ni lac thun camereip anek saih hu tut angan tame hatai khin palih ruah đại học, cao đẳng, hadei di tuk salah bloh mbang pakacah tamat Trung học phổ thông. Tuk vak puac abih piah tut angan song ramik veik hatai khin palih ruah lac mon 5 biar harei 20/8/2022.Dalam tuk vak jiak sa bilan, dom anek saih hu tut angan, ramik veik song pabak hatai khin tut angan palih ruah dom mbang jeng hu, min, bruk tut angan, ramik veik hatai khin palih ruah, jeng brei ngak tui jalan online, mangaok Hệ thống dong palih ruah di mintri pato megru.

Urak ini, urang raong hadang thẻ công nghệ glaong di tỉnh Tiền Giang raong njauk saong pablei hu yaom. Yaom lac pandap mbang tagok yaom min hadang daok hu yaom glaong abih dalam 2 thun tapa, nan ye urang raong hadang jeng daok hu laba biak glaong. Di tukvak ini, yaom hadang thẻ raong tui jalan công nghệ glaong, pablei hu yaom 170 ribau đồng/kg. Tui yaom yau ini, urang raong hadang thẻ công nghệ glaong hu laba labaih mateh dut saong yaom jien buh tame. Tui Chi cục kaya ikan Tiền Giang, urak ini dalam tỉnh hu labaih 300 ha hadang raong tui công nghệ glaong di 70 kapul nyaom, manuac urang, meblah jaik 15% mblang taneh raong saong sản lượng danao raong hadang thâm canh di tỉnh.

Harei 22/7, Jabat Cảnh sát điều tra, Công an huyện Hớn Quản, tỉnh Bình Phước brei thau hu chap kreik ong Phạm Ngọc Minh (umo 35 thun, daok di huyện Cư Jut, Đăk Nông) piah duah thau ka duas “Ngak ka urang jia bloh meblah mek drap ar”.Tapa duah thau oh ka ginup abih, Phạm Ngọc Minh hu Công ty TNHH Dầu Nhớt song Hóa Chất Khang Việt pok ngak akaok bilai. Dalam tuk vak ngak akaok bilai xăng menyek Minh Tâm (daok di xã Minh Tâm, huyện Hớn Quản), kayua khin hu jien piah pandar cai, nan ye meng bilan 8/2020 tal bilan 12/2020, Phạm Ngọc Minh bhian suai pathau khan bruk pataom mek jien sraiy di tuai, pathau khan oh njauk bruk tuai -, sre jien blei xăng menyek di công ty, oh nộp jien pablei xăng menyek ka Cty Khang Việt piah blah mek jiak 1,3 tỷ đồng.

Melam bloh, 3 dalam 4 urang taong ikan hu plaih di matai dalam bala karam gilai di tỉnh Bình Thuận hu gah chức năng ba mai sang taom gaok gauk gar. Taeng ong Trần Văn Thanh, sa dalam 4 urang hu daong plaih di metai mbang ini jeng brei daok veik di sang iek ruak di tỉnh Khánh Hòa piah iek ruak kayua prein yava oh siam. Urak ini jeng daok 11 urang (kuhria gam 3 urang metai njauk klaak veik di tasik) jeng ka oh hu duah mboh.

Japon harei ni (22/7) brei thau ka Tapuk mbong quốc phòng 2022, dalam nan, brei mboh hatai suh sah ka dom hagait rah tabiak meng bruk mesruh gauk di Ukraina atau bruk klaih klaoh gah pabak công nghệ. Tapuk mbong di Japon ndom lac: “Bruk meriak gauk gah chính trị, kinh tế song quân sự di dom taneh ia, lac bruk cuang kandah gah trật tự dunya saong lac 1 bruk di dunya”.

Mintri Y tế Thái Lan harei kabroi brei thau, taneh ia ini hu dom urang ruak đậu mùa khỉ camriep. Nan lac sa urang likei umo 27 thun, negar Nigeria, nao du lịch di pulao Phuket, gah maraong negar Thái Lan. Ruak đậu mùa khỉ lac sa janih ruak njom mbak meng athur tapa manuac tui jalan suak yava, meta, idung, cambuai saong hu tukvak pa-auk ruak meng 6 tal 13 harei. Gah Y tế dunya (WHO) brei thau lac tal puac bilan 6 meng blaoh hu labaih 3.500 urang ruak đậu mùa khỉ di labaih 50 taneh ia di dunya.

Harei kabroi (21/7), sa sruh kapan haoh di Hãng Citilink di Indonesia njauk par mai veik labik par tagok kayua urang peih kapal haoh oh daok prein peih hu. Hadei di tuk kapan haoh par trun, dom bác sỹ brei thau lac urang peih kapal haoh nan metai. Urang peih kapal haoh nan hu ilamu par dalam 28 thun . Urak ni, oh ka thau cambaih phi công phụ atau phi công dự bị di mangaok kapan haoh nan peih kapal haoh trun. Tong abih 117 tuai di angaok kapan haoh hu siam mekre song hu salih tapa kapan haoh karei piah par tal labik./.  

Urang lang: Hani Pha & Thu Thao – 22/07