Taong abih dom tỉnh, ban hu brei anek saih nao bac gilac veik 

Anak bruk mbuan njom mbak ruak hadei di tuk padeih Tet Nguyen dan, Sở Y tế Ban raya HCM hu harak drah samar ieu ban Thủ Đức saong dom quận, huyện pakhang bruk pasang iek, padang angan dom urang gilac veik mai dom tỉnh, ban atau daok diuk rai di ban oh ka klauk jru atau klauk jru oh ka ginup piah jak ba bhap bini tame dom labik y te kaluk jru pacang caga Covid-19; jak ba bhap bini dom tỉnh gilac veik mai ban raya brei ngak njuak tui 5 paka, tui iek prein yawa; meyah mboh drei njom ruak Covid-19 ye brei takik taom gaok jeng yau nao mai, khan brei ka y tế labik drei daok thau piah hu tacei pato, dut iek ruak Covid-19.

Meng peih ngak siam bruk pacang caga jit ruak, abih di nyu nan lac klauk vắc xin pacang COVID-19 yau nan ye, tal urak ni, jit ruak COVID-19 di bhum taneran krong CL daok pasang iek hu. Di tỉnh Vĩnh Long dahlau deih yaok harei hu labaih 1000 urang njom ruak, urak ni, dok labaih 35 urang. Di tỉnh Tiền Giang jit ruak jeng trun, tỉnh dok di pakat 1 (bhum hajao), taong abih urang meng 18 thun tagok hu klauk vắc xin mbang ka 2. Dom tỉnh ban karei yau Cần Thơ, An Giang, Đồng Tháp, Cà Mau, Kiên Giang, Sóc Trăng, Trà Vinh jit ruak jeng trun khang. Tong abih dom tỉnh, ban hu brei anek saih nao bac gilac veik.

Hadei di tuk padeih Tet Nguyen dan rilo harei, rilo gilang pariak pablei salih brei tagok jien laba tuik payua tame jeng yau dom paok pachreih urang payua jien tame patak pataom. Dom gilang pariak karja yau Agribank, Vietcombank, VietinBank, BIDV oh tagok jien laba minh hu brei peih dom danak dak lì xì, alin pandap ka tuai hu payua jien tame tuk akok thun, dalam nan hu jien payua patak pataom, jien lixi meng 30.000-100.000 đồng ka sa urang. Abih di nyu lac, ACB hu danak dak khuyen mai ka taong abih dom mbang payua jien tame, abih tih jien thưởng tagok tal 7 tỷ đồng.

Dalam dom harei akaok thun bahrau anek sak rimong, tỉnh Đồng Tháp hu taduan raok labaih 75 ribau tuai mai rivang, me-in, tagok labaih 27 % dut song thun 2021. Dalam nan, dom labik du lịch dui pachreih rilo tuai damuai lac palei bingu kiểng ban Sa Đéc, bein quýt hồng Lai Vung, labik du lịch Hamu craih Tháp Mười, Labik du lịch Ilamu Phương Nam. Tui Sở Ilamu, Thể thao song Du lịch tỉnh, piah ka tuai hu sahnang hatai mai rivang Đồng Tháp, tỉnh hu peih ngak tui jalan “siam mekre meng brei peih pabah mbang ”, dom labik ngak mbang gah du lịch brei khik hu dom tanut yau “labik tal hajao”, “urang ngak hajao” song “tuai du lịch hajao”.

Dom harei tapa, dom tỉnh di bhum ĐBSCL daok rah tabiak bruk kurang xang, menyek. Di An Giang, biar harei kabroi 8/2, dom D.N, cửa hàng pablei xăng menyek tuan bảng “abih xăng 95”, daok xăng E5 min biak takik. Tui Cục Khik iek darak pasar tỉnh An Giang, urak ini hu labaih 23 cửa hàng pablei xăng menyek kreik pabah mbang, kayua halau xang takik, oh ginup pabak ka dom labik pablei. Urak ini, Cục khik iek darak pasar hu tame tal dom cửa hàng pasang iek, meyah mboh padauk xăng menyek piah tagok yaom ye brei kaoh catang tui hukum.

Hãng thông tấn trung ương Triều Tiên (KCNA) brei thau mbang nyaom ka 6 Hội đồng bhap bini pakat glong (Quốc hội Triều Tiên) mbang 4 bahrau tamat bloh, song hu mbaok di dom urang jakar pakat glong di rajaei song đảng Lao động Triều Tiên. Di mbang nyaom ni, Quốc hội hu panuac sinya patagok kinh tế song salih bahrau rai duik di bhap bini, yaom lac "dom kan kandah song tavak tavaiy" bo Triều Tiên dang anak dalam thun 2021 kayua dom bruk tong phạt song kan kandah di jit prong COVID-19.

Hu takik di nyu 11 urang metai saong 35 urang karei njuak rambuac dalam sa mbang glut jaleih taneh khang di ban Pê-rây-ra, gah kreh negar Cô-lôm-bi-a harei kabroi (8/2). Urak ini, gah daong urang gaok bala daok kham duah dom urang daok diuk. Tui urang dang akaok ban Pê-rây-ra, urang metai saong njuak rambuac meda hu rilo jang dalm dom tuk tal. Karja pak ini brei panduan ba 15 baoh sang di bhum jaik taphia saong iew bhap bini palaih atah labik glut jaleih nan.

Kayua kan kandah di jit COVID-19 nan ye 92% dalam 129 taneh ia njauk padeih dom dịch vụ y tế yau danak dak klauk jru, iek ruak ka dom janih ruak yau hội chứng suy giảm miễn dịch mắc phải. Tui gah Y tế dunya, bruk ni sa mbang tra brei mboh yaom glaong di bruk samar drah piah langyah dom cuang kandah prong bo gah y tế dok dang anak, saong piah patrun kan kandah di jit prong COVID-19./.

Urang lang: Hani Pha – Bhumi – 09/02