Urang jakar lambaok Mentri Công an brei thau, bruk ngak di nyaom urang taong tame labik ngak bruk di karja saong bhap bini di tỉnh Đắk Lắk harei 11/6 lac bruk khủng bố hu kuhria caga dahlau, hu dom janih phao ndao; ngak oh huac hagait, pametai manuac. Tui nan, 2 nyaom urang hu pabak phao saong vũ khí ngak eng taong tame labik ngak bruk di karja saong bhap bini nao angaok jalan. Bruk nan ngak metai 9 urang, 2 urang njauk rambuac, 3 urang njauk kol nyu chap mek. Gah chức năng chap khik  65 urang gam tame bruk nan, dalam nan hu sa urang lac menuac di kapol nyaom  hu labik ngak bruk pak Mỹ, taduan panuac tacei pato meng kapol nyaom ini mai Viet Nam saong padang bruk taong nan.

Biar harei 22/6, kapul ngak bruk di Mintri pato Megru hu pasang iek tapak saong ngak bruk haong tỉnh Bình Dương ka bruk kuhria caga ka mbang pakacah tamat THPT thun 2023. Urak ini, bruk kuhria caga ka mbang pakacah tamat THPT hu peih ngak njauk tui jalan ba tabiak. Sở Pato Megru Bình Dương hu ieu pataom 1.447 urang jakar iek pakacah, 307 urang jakar pasang iek saong 336 urang lac công an, urang khik iek trật tự, urang duh bruk… Tapa pasang iek, Thứ trưởng Mintri Pato Megru Phạm Ngọc Thưởng hu panuac lac, Bình Dương brei ngak siam bruk pathau khan, tani tanat dalam kuhria caga labik pakacah, khik ginup menuac ngak. Iek praong bruk tui iek, pasang iek piah khik ka mbang pakacah rah tabiak dalam siam mekre, njauk adat pakacah.

Di tỉnh Bình Phước daok peih Nyaom darak pasar baoh kayau saong pandap kaya nong tỉnh mbang ka 6 thun 2023. Nyaom darak pasar thun ini pataom hu 300 labik pandap, dalam nan hu 20 labik pandap mai meng dom tỉnh, ban lac: Ban raya HCM, Bình Dương, Long An, Bà Rịa - Vũng Tàu, Ninh Thuận, Lào Cai hu mbaok tame. Nyaom darak thun ini makna praong di nyu lac meyaom  dom pandap baoh kayau kaya bingi saong taong abih dom pandap OCOP di tỉnh. Nyaom darak pasar lac labik taom gaok  di dom urang khik ramik, dom urang ilamu, D.N saong urang ngak nong piah yaih khan, klak rabha dom ilamu  siam gheih, pambuak bruk pablei salih, peih praong darak pasar, patagok dom pamdap kaya nong, abih di nyu nan lac baoh kayau saong pandap kaya nong.

Urak ini urang ngak nong di tỉnh Tiền Giang daok yam tame bilan paik baoh meriak pablei akaok vụ. Kayua pablei tabiak negar langiu rilo, langik tasik siam lagaih, phun meriak hu biak rilo baoh, meng 25-30 tấn/ha nan ye urang ngak nong biak bui sambai chreih chrai. Pala meriak piah pablei di takai hamu atau angaok taneh glaong lac bruk ngak meng kan mai di urang ngak nong tỉnh Tiền Giang hu khik ramik meng yaok pluh thun tapa, kein laba glaong jang pala padai jaik sa pluh mbang. Yaok thun, taneh pala meriak mangaok mala 1000 ha, langiu di pablei dalam taneh ia, jaik di ini, baoh meriak daok hu pablei tapa rilo taneh ia di mangaok dunya.

Dom harei tapa, yaok rituh bhap bini ba pandap panda tame labik tapen cuah Bein pakat negar Mũi Cà Mau (di xã Đất Mũi, huyện Ngọc Hiển) mek nghêu pajaih suan hukum. Rilo urang daok pandar mac mek cuah tagok piah mek nghêu pajaih ngak jhak tal kaya iakan saong mbuan ba tal sraw kadau di bhum palei. Yaok thun, meng bilan 6 tal bilan 7, xã Đất Mũi bhian hu nghêu pajaih saong bhap bini pataom tame biak ralo piah kuac mek. Hu dom thun rah tabiak bruk meriak gauk, ngak sraw kadau puk palei.

Kuhria tal biar harei 22/6, rilo labik di ban ine Bắc Kinh saong ban Thiên Tân, gah barak Trung Quốc yam tapa kỷ lục ka pandiak khang, haong nhiệt độ glaong abih duk hu tagok tal 41,8℃. Bắc Kinh daok tabiak panuac brei thau ka nhiệt độ glaong sambo màu cam, lac tanut brei thau dahlau biak khang dang ka 2 ka pandiak khang. Meng bilan 6 tal ini, Bắc Kinh gam gam rah tapa dom mbang langik pandiak khang. Tui Cục Khí tượng ban, Bắc Kinh daok njauk sa mbang pandiak khang meng harei 21-25/6. Tui kuhria mboh di dom chuyên gia taneh ia ini, thun 2023 meda lac thun pandiak khang abih kuhria meng dahlau mai.

Jabat pasang iek di  Pakistan brei thau lac takik abih  209 urang di taneh ia ini daok mangaok sa sruh gilac pajeng tapa prein saong kram langiu tasik Hy Lạp di adit dahlau. Jabat Pasang iek Liên bang (FIA) brei thau, 209 urang nan lac manuac hu baoh sang khan brei thau ka gauk gar hu ndih tagok gilai meng Liby nao tal Hy Lạp saong daok lahik. Puac khan di dom urang nan brei thau, labaih 400 tal 750 urang pajaik gauk tagok gilai taong ikan atah meng 20 tal 30 met, sruh gilai  ini  hadei di nan tabaleik trun saong karam di page harei 14/6.

Tui panuac khan di Pasak pacang caga saong pasang iek jit ruak châu Âu (ECDC), châu Âu hu dom menuac njauk ruak pandiak tabiak darah dalam thun 2022 tagok biak rilo, samu meteh dom menuac njauk ruak di 11 thun dahlau nan. Pasak pacang caga saong pasang iek jit ruak châu Âu khan lac, dom ruak kayua jamaok kaik di bhum châu Âu dak harei dak tagok glaong, dalam nan hu gam ruak pandiak tabiak darah, zi-ka, vi rút Tây sông Nin, hu pambuak tal biến đổi khí hậu saong bruk njaom mbak di jamaok hu vi rút./.