Hadei di tuk duah thau mek panuac di dom mentri, dom gah, Mentri LĐ -TB saong XH hu harak pathau khan tagok Rajaei brei padeih 5 harei gam gam tuk padeih le 30-4 saong 1-5. Tui nan, ngan hoang kong chuc, vien chuc, harei ngak bruk 29/4 hu salih tapa ngak di harei sanecar 4/5. Yau nan, kong chức, viên chức  hu  padeih 5 harei gam meng harei sanecar 27/4 tal abih harei but 1/5. Tui Mentri LĐ, TB saong XH, bruk salih yau nan piah ka urang ngak hu dom harei padeih padei siam lagaih. Bruk ba tabiak yau nan jeng piah pachreih urang nao ma-in dulich, urang blei pandar, jhul patagok kinh te.  

Dah page ini 11/4 Công an tỉnh Vĩnh Long hu peih bruk taom mbaok salam uan Tết meng kan Chôl Chnăm Thmây thun 2024. Di labik taom mbaok, Thượng tọa Sơn Ngọc Huynh – urang dalam Hội đồng trị sự Giáo hội phật giáo Việt Nam, Akaok Kapul jum pataom sư sãi anit ranam taneh ia tỉnh Vĩnh Long brei thau, urak ini, meng hu bruk sangka di dom pakat karja palei, nan ye raidiuk, bruk ngak mbang kinh tế di urang Khmer dak harei dak tagok. Dom sư cả dalam tỉnh tuk halei jeng patagok bruk pathau khan, jak ba bhap bini Khmer pakacah gauk ngak mbang. Vĩnh Long urak ini hu 23.000 urang bangsa Khmer, rilo meng tui agama Phật giáo Nam Tông, pataom gauk ngak adat agama di 13 baha dalam tỉnh.  

Xã Định Hòa, huyện Gò Quao hu Trung ương saong tỉnh Kiên Giang palih ruah mek ngak xã ngak iek Danak dak pakat negar  padang ngak palei pala birau. Dalam xã Định Hòa hu labaih 15.300 bhap bini, dalam nan hu labaih 63% lac bol bhap bangsa Khmer. Meng bruk kham merat di taong abih gah chính trị, hu bruk njuak gauk di abih bhap bini, meng sa xã kathaot, kurang rilo janih, rilo thun tapa, Karja hu rilo sarak daong  yau điện, ia pandar, phun jien mesre piah patagok  bruk ngak mbang kinh te baoh sang, meng nan pabak prein khang ka bhap bini Khmer yam tapa kan kandah, kham merat yam tagok. Jien mek tame kuhria tui akaok manuac  di Định Hòa thun 2023 lac jaik 69 trieu đồng; baoh sang kathaot  tui rilo gah tok daok labaih 3%.

Dalam tuk dom puk palei di gah Timur tỉnh Tiền Giang daok njauk pandiak bhang khang ye dom harei ini, di ban Mỹ Tho ia ndik njaom mbak tagok glaong.  Mbang ia ndik ini tagok glaong, ia njaom mbak di ban Mỹ Tho mangaok 3gam/lít nan ye ngak caraih dom pandap pandar dalam sang bhap bini, metai phun mbang baoh, bingu kiểng, ngak khat lahik biak trak ka rilo sang. Ia ndik glaong abih di dom bilai bhum gah mala kraong Tiền dalam mbang ini di tanut 1mét 7 tal 1mét 8, glaong jang tanut báo động 3 lac sa tấc.

Page ini, apui khuah angaok tabung ceik di jalan Roya 56, dalam phường Long Hương, TP Bà Rịa, tỉnh Bà Rịa - Vũng Tàu khuah gilac hadei di tuk padam blaoh di melam kabroi. Ong Huỳnh Sơn Thái, Yam ndoc  Sở Ngak nong saong Patagok palei pala tỉnh Bà Rịa - Vũng Tàu  brei thau, dahlah apui  khuah tagok di labik hala thu gah ala, labaih 40 m2, oh ngak jhak tal labik hu padam apui dahlau di nan saong oh ngak khu khat drap ar saong manuac urang. Urak ini, bruk apui khuah daok hu duah thau ngak brei cambaic laic. 

Urang pan akaok Triều Tiên lac ong Kim Jong Un ndom lac, kayua bruk chính trị oh tani tanat di vil taom dhar taneh ia, urak ini, lac tukvak njauk caga ka bruk mesruh metak. Urang pan akaok Triều Tiên brei thau, kol khamang halei taong tame, taneh ia brei ieu pataom abih gah, abih prein yava piah taong cagar veik khang. Triều Tiên hu patagok phao ndao - vũ khí dalam dom thun jaik ini saong brei padang talei pambuak bruk quân sự - chính trị khang kajap jang haong Nga.

Gah Pablei salih Dunya brei thau, bruk pablei salih pandap panda di dunya meda siam veik dalam thun ini, hadei di tuk trun dalam thun 2023. Gam haong nan, Gah Pablei salih Dunya jeng brei thau dahlau ka bruk neh rabha bhum pablei salih kayua bruk chính trị sraw kadau, chủ nghĩa khik iek patagok saong bruk sraw kadau di Trung Đông dak harei dak jhak, dalam nan hu dom mbang taong tame  gilai pablei salih di Biển Đỏ ngak salih jalan pablei salih di chau Au saong chau A. Thun 2023, bruk blei meng negar langiu tame biak laman lamuac di chau Au. Yau nan min, thun ini patagok bruk pablei salih hu pasiam veik meng bruk lạm phát hu tani tanat saong pasiam veik sarak jien ndo, lac bruk cuang kandah dalam pablei salih di thun 2023.

Uranaih di Ba Lan daok buai sambai, uan tabuan anak adat bahrau di rajaei taneh ia ini brei patrun patakik bài tập mai sang ka uranaih. Rajaei Ba Lan hu panuac ieu dom sang bac padeih bruk brei bài tập mai sang saong brei điểm bài tập mai sang ngak di anek saih. Bài tập mai sang ngak jeng daok hu brei ka anek saih dom pakat glaong jang, min brei hu bruk kuhri kuhria ka nyu lagaih. Ba Lan hu taong yaom lac hu naong trak gah  bài tập mai sang ngak  glaong jang duk haong tanut kuhria rah tapa di dom taneh ia karei./.