Mentri Pato megru hu brei tabiak 8 danak dak sap bangsa takik piah pato dalam sang bac nan lac: Bahnar, Chăm, Khmer, Ê Đê, Jrai, Mnông, Mông, Thái. Tui nan, piah peih ngak danak dak sap bangsa takik birau tal thun bac 2029 -2030 lac labaih 9 ribau urang. Yau nan min, dalam negar urak ini hu sa sang bac đại học pasram gru pato bac chính quy saong brei harak chuan ilamu gru pato sap bangsa takik lac Sang bac Đại  học Trà Vinh ngan haong  Sư phạm Ngữ văn Khmer Nam Bộ. Dalam tuk nan, tanut palih ruah gru pato sap Khmer daok takik. Saih bac tamat blaoh gaok oh lac takik kan kandah tuk duah bruk ngak njauk haong bruk bac.

UBND TP.HCM bahrau brei daong ka dom baoh sang di dalam ban raya HCM eng drei ngak ndam metai ka urang lahik kayua COVID-19 dalam rahra haong yaom daong lac 18 triệu đồng sa urang. Piah hu mbang jien ini, dom baoh sang vak tame harak tui mẫu ka 04 patabiak gam haong Sarak 20/2021 saong harak “báo tử” payua ka Akaok UBND pakat xã labik daok. Dalam tukvak 3 harei ngak bruk hadei di tuk taduan hu harak di Akaok UBND pakat xã ye akaok UBND pakat huyện pasang iek, langyah. Daok phun jien dom labik pandar kadung jien daong di dom kapul nyaom, manuac urang dalam saong langiu di taneh ia daong tapak ka dom labik atau tapa dom jabat, kapul nyaom.  

Sóc Trăng daok padang ngak danak dak patagok phun mbang baoh đặc sản tỉnh vaktu 2022 -2025. Tui nan, Sóc Trăng brei pasiam veik taneh  370ha saong peih birau 280ha taneh pala dom janih phun mbang baoh yamen bingi karei nan lac: baoh ia tasau, darang, karuac bung, durieng, pa-ok, pandiuk. Bruk pamaong tal di danak dak lac patagok dom pajaih phun kayau mbang baoh yamen bingi hu prein khang, lagaih haong taneh riya, langik tasik, pabak ka bruk ngak tabiak saong pablei tabiak negar langiu; pandar ilamu ky thuat, paglong asar siam, brei rilo baoh karaoh, lagaih haong bruk bien doi khi hau; padang ngak chuoi pambuak bruk ngak tabiak.  

Dah page harei 7/6, takai kraong gah hanuak kraong Hậu, pak di libik kho brah di Công ty Đồng Lợi 2 ban Long Xuyên, tỉnh An Giang rahtabiak bruk glut jaleih taneh atah labaih 40 m, mbang dalam tame mbaok taneh labaih 6 m saong mboh lac daok mbuan glut jaleih mbang tame dalam gah kho brah. Glut jaleih taluy takai ribaong jeng rahtabiak di dalam harei 7/6 di ribaong TT-TS huyện Tri Tôn labaih 70m, mbang dalam tame labaih 1,5m. Dom jabat chức năng daok samar drah peih bruk pasang iek, duah thau, yaok pataom dom khat lahik, daok hu mbaok khik iek luac harei melam piah thau cambaih laih bruk glut jaleih di takai kraong Hậu.

Jabat Cảnh sát pasang iek Công an Ban Phan Thiết, tỉnh Bình Thuận ba tabiak  bruk kaoh tui hukum ngan haong Nguyễn Văn Thảo lac Thảo "lụi", umo 57 thun, daok di Ban Phan Thiết ka bruk palai pajua drap ar saong peih ngak adat chap khik. Thảo “lụi” lac sa urang giang ho jhak di Bình Thuận, bhian pan akaok  dom urang meblah taneh di dom danak dak dalam Ban Phan Thiết; jan ralai pandap pandar di bhap bini. Dom kapol, urang hu harak thư payua dom jabat chức năng iew daong. Hadei labaih 2 harei pataom urang jakar duah mek, biar harei 5/6, gah chuc nang chap khik Thảo “ lụi” di sa khách sạn di quận Phú Nhuận, Ban raya HCM, saong pajeng ba nao tỉnh Bình Thuận piah duh ka bruk pasang iek duah thau.  

Rajaei Slôvakia bahrau công nhận bhap bini urang Việt Nam lac urang bangsa takik ka 14 di negar ini iek tui panuac ba tabiak di Kapul rajaei Slovakia ka quyen di anek manuac, Bangsa takik saong bruk samu gauk hadei di tuk pabak hu dom asal kadha ka dom manuac urang, tukvak daok saong mbeik drei tame xã hội pak nan. Tui kuhria tal urak ini, hu labaih 7000 urang Việt daok diukrai saong ngak bruk di taneh ia hu 5 triệu 500 rabau menuac ini. Lambaok ka rahra Việt di Slovakia brei thau lac bruk ini biak hu yaom sajarah ka urang  Việt di pak ini.

Harei ini 8/6 hu LHQ palih ruah lac Harei Tasik praong Dunya (World Ocean Day). Tasik praong meblah labaih 70% taneh di Baoh taneh saong brei taduan bruk brei pabak 50% oxy  bo anek manuac suak yawa, pasiam veik khí hậu, pabak padap mbang saong labik raong diuk di yaok trieu janih kaya kan. Dalam kadha Harei Tasik praong Dunya thun ini, Tổng Thư ký LHQ ndem cambaic laic “ đại dương lac bruk raong hadiuk’, anak dom cuang kandah  jhak, khol drei njauk brei ngak samar  bruk piah brei mboh bruk jum pataom, pambuak taong abih urang di dunya ngan hoang bruk khik caga, patagok khang kajap tasik saong tasik praong.

Mỹ hu ba 600 urang padam pui saong kapar haok chuyên dụng piah daong ka taneh ia Canada jaik taphia pacang caga haong dom mbang khuah glai daok pamba praong. Labaih  400 labik khuah jeng daok khuah, labaih 1 mateh dalam nan tapa prein pasang iek. Labaih 3,8 triệu héc-ta glai njauk apui mbang abih saong labaih 20 ribau urang hu ba tabiak truh labik drei daok. Dom jalan mbak, jalan talei viễn thông saong jalan talei dien jeng khut khat. Athak pui nyu par trun tal 15 mbang di bhum gah Timun negar Mỹ, labaih 75 triệu urang di Mỹ hu ieu kakei caik hatai tal chất lượng alam langik tasik.