Tui bruk palih ruah, harei 27/8 lac tukvak piah ka anek saih tame tut angan online angaok He thong palih ruah anek saih di Mentri Pato megru. Yau nan min, tapa khaw tin meng dom labik pato megru saong anek saih mboh lac, urak ini hu dom anek saih tuk tame tut angan tapak di sang bac meng mboh kurang bruk oh ka tame tut angan tame bac online angaok He thong.

UBND tỉnh Cà Mau bahrau peih Nyaom roya dom bangsa takik mbang ka IV thun 2024, ngan haong asal kadha “Dom bangsa takik tỉnh Cà Mau jumpataom gauk, duah jalan ngak bahrau, mbeik drei yam tame, cak rok patagok”. Nyaom roya brei tapa Sarak kham marat, ngan haong 8 jalan ngak, bruk ngak: kham marat ngak trun manieng dom baoh sang kan kathaot lac mikva bangsa takik dalam tỉnh meng 2% thun tagok; dom urang ngak lac urang bangsa takik tapa bac megru hu 65%; jien mek tame tui kuhria yaok akaok manuac di urang bangsa takik tagok jang 2 mbang dut saong urak ini. Di tỉnh Cà Mau, mikva bangsa takik, rilo abih lac bangsa Khmer. Tapa 5 thun, kinh tế - xã hội bhum mikva bangsa takik hu cak rok patagok mbaih. Tal puac thun 2023, sang kan kathaot tok daok 713 baoh sang.

Meng puac bilan 7 mbiah tal ini di tỉnh Bến Tre hu 4 mbang glut jaleih taneh mbang tame dalam, ngak kan kandah tal yaok rituh baoh sang  bhap bini. Njauk caik hatai, glut jaleih meda rah tabiak dak harei dak trak jang, jaleih glut taneh  mbang tame dalam,, taneh jaleih dak harei dak atah…Tui Sở Ngak nong saong patagok palei pala,  bruk ba tal glut jaleih  lac kayua Bến Tre hu rilo kraong ribong, takai tasik atah ba tal  glut jaleih taneh. Tỉnh hu peih ngak rilo jalan pacang caga bruk glut jaleih taneh, ramik labik daok ka bhap bini, panduan ba bhap bini gam haong padang labik daok birau. Tỉnh kham merat tal thun 2030 ngak brei salh 90%  bruk panduan ba dom baoh sang bhap bini  tabiak truh labik mbuan glut jaleih ralo.

Piah ba tabiak jalan pacang caga jit ruak bilan tame thun bac dalam thun bac bahrau, Akaok UBND tỉnh Bạc Liêu jao ka So Pato magru saong dom labik pato magru dalam tinh caga dom bruk siam makre di abih piah khik prein yava ka dom adei anek saih tuk tame thun bac bahrau; khik hacih saat, lanieng lanoi tal bac saong ginup ia harei; Pambuak biak catang haong gah y te pato tacei dom labik pato magru, abih di nyu nan lac sang bac mau giao, sang khik uranaih peih ngak dom jalan langyah piah pacang caga jit ruak, duah mboh samar drah dom urang medil lac njauk ruak.

Harei 2/9 anak tal, di ban Cần Thơ hu peih Giaỉ pakacah radaih moto pakat negar. Ini lac bruk ngak dalam dom bruk pahadar 79 thun Harei CMT8 hu jak jeng, Harei Negar Cộng hòa Xã hội Chủ nghĩa Việt Nam. Giaỉ pakacah radaih moto thun ini hu 67 urang tame pakacah mai meng 40 Kalup kapol  di 11 tỉnh/ ban di Bhum taneran kraong Cuu Long saong Đông Nam bộ. Giải pakacah radaih moto  pakat negar di Cần Thơ hu dom mbang pakacah biak chreih chrai di dom urang pakacah  naih joi, ba mai ka urang tui iek rilo bui sambai dalam tuk padeih le Harei Negar 2/9.

Rilo sang bac, jabat ngak bruk di Philippinnes daok njauk kareik pabah mbang kayua hajan khang ngak dauk rilo labik. Takik di nyu 16 labik pak ban ine Manila dauk dalam ia hadei di mbang hajan biak khang meng melam harei 27-8; jalan mbak nao mai gaok biak rilo kan kandah. Tui panuac khan di Jabat Khik ramik saong Trun manieng dom khat lahik di bala pakat negar, rajaei Philippines ieu kakei yaok labik pato magru di kanja saong langiu kanja di yaok pakat, dom jabat ngak bruk kanja di Manila kareik pabah mbang piah pacang caga bala meng langik tasik biak cuang kandah ini.

Kong ty Skinos di Nhật Bản birau ini hu ngak tabiak sa pandap jamraih cuk hu thaik thaok dreih yau đồng hồ thong minh dut iek hadom ia hauk tuh tabiak, piah daong ka dom urang ngak bruk gah langiu plaik njauk mabuk pandiak. Tuk mboh ia dalam rup lahik ralo atau mboh hagait karei, urang cuk pandap nan hu tacei brei padeih padai. Nhật Bản  daok dalam kan kandah anak  bruk langik pandiak glong biak glong, ngak jhak tal prein yawa di dom urang ngak bruk langiu langik pandiak. Pandap nan meda daong khik pein yawa ka urang ngak bruk.

Dang anak bruk tamuh gilac veik ruak đậu mùa khỉ pak Châu Phi, Gah Y tế Dunya (WHO) brei thau lac prein njom mbak virus tapa ia pabah, pagap yau dalam tuk ndem mayai nao mai lac bier. WHO brei thau ruak đậu mùa khỉ njom mbak di manuac tapa manuac, rilo meng lac tapa taom gaok jaik haong urang njom virus. WHO kakei dom urang taom gaok jaik saong dom urang ngak gah y tế taong ruak ka urang ruak đậu mùa khỉ njauk cuk pataih pacang mbaok saong ngak njauk tui dom jalan langyah gah y te yau ye ngak hacih saong pametai anek ruak piah plaih nyaih bruk njom mbak ruak./.