Mentri Yte ginum biai haong dom bhum palei ka jit ruak soi. Mentri Yte  kuhria mboh dahlau, dom urang ruak pandiak tagok baoh soi mboh hu veik di dalam negar. Abih di nyu nan lac, dom labik mbuan tamuh ruak ralo yau dom tinh bhum ceik, labik hu rilo urang bangsa takik diukrai, bruk taduan hu jitvu y te daok biar kurang saong dom bhum palei hu urang klauk jru takik lac dom labik mbuan tamuh jit ruak. Anak bruk nan ruak rah tabiak sraw kadau di ruak soi hadei jit COVID -19, Mentri Y te tacei ba peih bruk caga dahlau brei klauk jru vaccine pacang caga ruak soi .

Hu rilo jalan peih ngak saong meng hu bruk njauk hatai ngak tui, daong di bhap bini, mbiah tal ini tinh Kon Tum brei ngak hu metah dom baoh sang abih taik tahak. Tinh Kon Tum hu daong 1.390 baoh sang bhap bini abih daok dalam baoh sang taik tahak, dalam nan hu 1.079 baoh sang hu padang ngak birau saong 311 baoh sang pasiam veik birau. Yau nan mbiah tal tukvak ini tinh Kon Tum ngak hu meteh dalam taong abih tih 2.752 baoh sang taik tahak njauk brei padang ngak birau saong pasiam veik. Yaok baoh sang hu jien daong 60 trieu dong meng phun jien rik daong dalam bhap bini kayua Mentri Kong an jak ba.  

Tinh Binh Thuan birau ngak salah 3 danak dak jalan mbak hu makna praong rik tame pachreih urang buh jien tame ngak mbang, pabak ka bruk nao mai di bhap bini saong jhul pasamar  patagok gah kinh te – xa hoi. Klau danak dak ngak hu salah blaoh nan lac: jalan mblang kapal haok Phan Thiết, jalan Hàm Kiệm nao Tiến Thành, meng Jalan raya 1 tal jalan ĐT.719B saong  danak dak jalan ngak birau tapen tasik ĐT.719B, meng jalan Raya 1 tal tatua Suối Nhum. Ini lac danak dak pahadar 50 thun harei peih paha tinh Bình Thuận (19/4/1975 - 19/4/2025) saong Nyaom roya Ndang bo tinh Binh Thuan mbang ka XV, vaktu 2025 - 2030.  

Huyen Châu Thành, tỉnh Sóc Trăng birau peih pakak Adit Bingu Kèn Hồng ngan haong kadha: Châu Thành – Caong khin uak drei patagok. Bruk ngak gam yaih khan dom thaot binguk hadah di Bingu Kèn Hồng daok chroh mekre ye daok yaih khan dom kein lagaih, prein khang cakrok patagok gah dulich di bhum palei. Adit  Bingu Kèn Hồng peih ngak 5 harei, ba mai ka tuai damuai  hu lagaih piah mai rivang iek, ma-in sambai, daoh tamia, duah thau ilamo di gauk, jeng yau mbang kaya bingi di bhum palei, abih di nyu lac mong eik tamia Rong vong saong ngak Kamang Cốm dẹp di urang bangsa Khmer.

Tinh Dong Thap birau tabiak ngak bruk Harei tabung glong “Dam dara  halan hatian padang ngak ilamo do thi”. Di var tabiak ngak bruk, adei Lâm Nguyễn Việt Uyên, anek saih tal bac 10B1, Sang bac THPT Banraya Sa Đéc, brei alin brei 60 trieu dong, ini lac taong abih jien adei piah pataom meng sit mai piah padang sang Anit ranam ka sa ayut hu raidiuk kan kandah dalam hatai caong khin daong ayut hu baoh sang khang kajap jang. 

Mentri Kong an Trung Quốc birau ini khan lac, hu veik 2.875 bhap bini taneh ia ini medil lac pambuak tal pachot pagat internet di Myanmar ba nao tapa negar Thái Lan. Sa kapal haok pajeng nyaom urang akaok meti hu 200 bhap bini Trung Quốc medil lac pambuak tal bruk pachot pagat online di Myanmar hu mai veik negar, par trun Nam Kinh, tinh Giang Tô,  bhum gah Pur taneh ia ini. Mentri Kong an Trung Quoc taong yaom, ini yau sa got jamang saong bruk njauk caik hatai dalam bruk kham merat ngak tui hukum pambuak rilo taneh ia nan lac Trung Quốc, Thái Lan saong Myanmar piah ba kol pachot pagat internet saong tapa mạng.

Elon Musk lac urang kaya meda, urang padang kong ty kapal haok vũ trụ SpaceX khan lac bruk cuh ten lua Starship tagok patuk Sao Hỏa di puac thun 2026. Tui Elon Musk, ten lua SpaceX ba tui robot thaot bingu Optimus di Tesla tagok sao Hỏa di puac thun 2026 saong meyah oh jeng, anek manuac meda hu ba tagok langik aval di thun 2029. Elon Musk bhian khan lac bruk caong khin ba anek manuac tagok patuk  sao Hỏa saong birau ini ong hu ngui cuk khan ao  hu tavak akhar huroh “ meblah mek patuk sao Hỏa” tuk hu mbaok di Nhà Trắng gam haong  Tổng thống Donald Trump. 

Yai nduac takai Marathon Rome, Italy peih tabiak di harei kabroi hu tukvak kandang oh bhian mboh, hu mbaok di 30.000 urang pakacah mai meng 126 taneh ia dang kandang dalam 42 giay di labik cih nduac piah brei thau ka bruk jum pataom haong Đức Giáo hoàng Francis. Bruk nan brei mboh  thaok binguk hu ngak tui kapol nyaom biak takik mboh saong khang kadang di bruk padhih the thao pakat dunya peih ngak dalam praong prang. Mban peih bruk khan lac bruk kandang nan piah brei mboh hatung hatai dhar phol tal  Đức Giáo hoàng, sa urang abih hatung hatai gah the thao saong Yai Marathon Rome./.