Tui harak dự thảo Hukum Dan so daok duah thau hatai sahaneng di bhap bini,  Mentri Y te hu ba tabiak ralo sarak, dalam nan brei dui atah tukvak padeih ngak bruk tuk ndih tapui anek ka 2 meng 6 tagok 7 bilan piah pachreih urang ndih tapui anek dalam tuk urang ndik tapui anek dak harei dak takik. Mentri Y te khan lac, bruk ndik tapui anek dalam negar trun meng 2,11 anek sa urang kumei di thun 2021 trun daok 1,91 anek sa urang kumei di thun 2024 lac takik abih kuhria meng lavik mai saong kuhria mboh daok trun veik dalam dom thun anak tal.

Tui Lien doan Pablei salih saong Kong nghiep Viet Nam (VCCI), urang ngak bruk di ban Can Tho ralo siam jang dom tinh karei di bhum Taneran kraong Cuu Long. Meng thun 2021 tal thun 2024, ban Can Tho hu mbaoh harak buh jien tame ngak mbang birau di doanh nghiep dang dhi 3 dalam bhum Taneran kraong Cuu Long, dang hadei Long An, Kien Giang. Ban Can Tho  hu manuac ngak bruk umo 15 thun tagok labaih 617.000 urang, dalam nan daok ngak bruk dalam ban kuhria mboh labaih 596.000 urang; dalam nan ngak bruk gah langiu meblah 86% saong labik ngak mbang meng phun jien negar langiu meblah labaih 3%.

Tui kuhria di Sở Pato megru Ban raya HCM, anek saih brei palih ruah 8 sang bac tui hatai caong tame tal bac 10 di karja. 8 sang bac anek saih palih ruah meda brei tut angan hu abih nan lac 3 sang bac tal 10 bhian, 3 sang bac tal 10 tich hop saong 2 sang bac tal 10 chuyen. Dom sang bac brei palih oh hagait karei dut haong thun dahlau, tok sang bac chuyen takik jang saong sang bac tich hop brei palih ruah tagok. Tui kuhria di So Pato megru TPHCM brei pathau khan dalam bilan 3 ini.

Di Ban Cà Mau daok hu labaih 100 baoh sang raong ikan kèo pablei, raong ralo di xa Tân Thành, Hòa Thành, phường Tân Xuyên,…Dom thun jaik ini, yaom ikan kèo sumu tani tanat yau nan ye dom baoh sang raong jien duah tame ralo. Di phuong Tân Xuyên daok hu labaih 10 baoh sang raong ikan kèo, yaom labaih 200 ribau dong sa kilo daong ka mikva duah hu kein laba biak ralo. Yau nan min, piah peih pambak praong bruk raong ikan ini njauk brei taong yaom saong ngak njuak tui tacei pato cambaic laic piah plaih njiak bruk “ngak tabiak rilo pablei oh hu”.

Tui Rayo kuhria iek langik tasik tinh Hau Giang, ia mbak meda njom tame glong  di kreh bilan 3 ini. Tui nan, ia mbak tui ia tathik bien Dong ndik ngak njak tal huyen Chau Thanh saong ban Ngã Bảy, ia mbak glong abih meng từ 0,5‰ -1,2‰. Ia mbak tui ia tathik gah Pei tame dom kraong ribong mbak meng 5,5‰ -7,5‰. Kayua  ia mbak tui ia tathik ndik Pei tapa ribaong Chắc Băng, ribong Ngan Dừa njom tame  huyện Long Mỹ saong ban Vị Thanh tagok glong oh bhian mboh saong rah tabiak sraw kadau yau nan ye bhap bini brei hu jalan pacang caga ia mbak, khik caga phun pala, athur raong hu lagaih.

Tong thong Donald Trump khan lac brei kuhria jien thue pabak ngan haong nhom saong thép blei meng negar Canađa tame meng 25% tagok 50%. Jien je nan brei kuhria ngak tui meng harei 12/3. Ong Trump khan lac samar ba tabiak bruk ngak samar chip pakat negar ka ndien di labik gaok kan kandah kayua bruk ba tabiak yau piah caga gaok kan kandah meng gah Canađa.

Takik abih di nyu lac 26 urang metai kayua jit viem mang nao tamuh tabiak di tieu bang Kebbi, tay bac Nigeria. Kuhria 248 urang medil lac hu ba angan piah tui iek. Piah caga jit ruak, rajaei tieu bang parabha jru di dom labik gaok kan kandah saong padang dom pasak piah brei daok karei hu bruk daong  di  Gah Dom bac si mai meng rilo negar karei (MSF). Thun dahlau, Nigeria hu jeng taneh ia akaok meti di dunya peih bruk brei klauk jru vaccine Men5C birau “salih birau” pacang caga  ruak viem glo akaok.

Hang L’Oreal birau pathau khan brei mek veik taong abih dom pandap Effaclar Duo, lac sa janih cream  jru luh mun hu pablei mek angan La Roche-Posay, kayua huac pandap ini hu jru benzene, lac jru ngak ruak ung thư. Dahlau di nan, bilan hè thun 2021, Johnson & Johnson hu labik ngak bruk di bang New Jersey, Mỹ mek  veik 5 pandap kem pacang pandiak xit pruh hadei tuk duah mboh benzene dalam sa mau ngak iek./.