Mentri LĐ, TB saong XH brei thau, 9 bilan tapa darak pasar urang ngak hu pasiam gilac veik. Gah urang ngak bruk dalam quý 3 patui bruk patagok dut saong quý dahlau jeng yau tukvak ini thun dahlau; bruk yaok rituh ribau urang njauk brei kadun tukvak ngak bruk, padeih ngak bruk, lahik bruk ngak di dom D.N peih tabiak meng quý 4 thun 2022 hu trun. Jien mek tame kuhria rah tapa di urang ngak dalam ban lac 8 trieu 600 ribau dong sa bilan, daok di bhum palei pala lac 6 trieu 1 rituh ribau đồng sa bilan. Urak ini, dom D.N hu padang birau glong jang dut saong D.N tabiak truh darak pasar, tapa nan ba bruk ngak ka rilo urang.

Anak bruk brei thau oh njauk lac harak adat peih radaih ngak meng ba-ar oh daok brei pandar, dom harei tapa, menuac sia daok di dom tỉnh dalam bhum ĐBSCL ba gauk nao ngak harak adat peih radaih tapa thẻ nhựa biak rilo ngak brei tapa prein ngak bruk di urang jakar pak nan. Ong Nguyễn Quang Khải, Phaok Yam ndok Sở Jalan mbak pajeng ba tỉnh Vĩnh Long ndom lac, tal tukvak ini, Mintri Jalan mbak pajeng ba oh ka hu harak hagait brei thau lac harak adat peih radaih meng ba-ar oh daok brei pandar. Menuac sia daok pandar harak adat peih radaih meng ba-ar jeng daok hu pandar oh salih karei hagait. Meyah harak adat peih radaih khut thaot saong sabil akhar haroh meng nao salih veik harak adat peih radaih bahrau.

Piah khik siam bruk pacang caga apui khuah glai, Bein pakat negar Tràm Chim likau brei padang 5 tadai tuan khik iek ngan haong 100 urang lin daong khik iek glai dalm 6 bilan pandiak thu tukvak peih kareih ia 2024 -2025. Dahlau di nan, UB bhap bini tỉnh Đồng Tháp hu duah thau hatai sahaneng di urang ilamu bruk ia trun di Tràm Chim. Dom urang ilamu khan lac, piah pasiam veik hệ sinh thái bein di ye brei peih ia trun lac njauk ngak. Urak ini, Đồng Tháp hu mbaoh tangin danak dak hu buh jien tame di labik khik ramik phun kayau cim birim di bhum A 3 dalam Bein pakat negar Tràm Chim, kuhria taong abih tih praong 36.600 m2.

Công an phường Mũi Né TP Phan Thiết, Bình Thuận hu taduan harak đơn di rilo menuac, pathau amuk V.T.L.T (SN 1957, daok di khu phố 10, phường Mũi Né) handaoh hụi. Hu thau, meng thun 2022, amuk T. jak dom urang pablei salih dalam darak haong gauk gar dalam sang me-in hụi. Tuk thau lac amuk T. tabiak truh palei, urang ngak harak pathau tagok Công an phường Mũi Né. Tapa yaok pataom oh ka ginup abih, jalan talei hụi di amuk T. hu labaih 50 urang hu mbaok tame me-in, haong yaom jien labaih 5 tỉ đồng. Dahlau di nan, dalam harei 18-10, 46 urang di TP Phan Thiết jeng hu pathau ka bruk sa po hụi tabiak klaak palei, haong yaom jien hụi labaih 3,2 tỉ đồng.

Tui Cục jalan mbak Viet Nam, kayua hajan praong yau nan ye jalan raya 27 tapa tỉnh Ninh Thuan glut jaleih veik, hu tal 10 labik gkut jaleih taneh patau, ngak khut taluy di jalan rah tapen ceik Ngoạn Mục, mbuan ba tal bala angaok jalan mbak. Urak ini, dom đơn vị chức năng daok samar pasiam veik bruk glut jaleih nan. Đèo Ngoạn Mục nan lac sa dalam dom jalan tapen ceik biak mekre saong mbuan gaok bala abih di Viet Nam. Ini lac jalan praong piah pambuak Đà Lạt haong dom tỉnh Tây Nguyên saong bhum Duyên hải Nam Trung Bộ.

Mintri Quốc phòng Mỹ bahrau ba tabiak harak pathau khan yaok thun brei thau lac, bol bala Trung Quốc urak ini hu labaih 500 đầu đạn hạt nhân daok ngak bruk dalam gilang phao ndao saong meda hu labaih 1.000 đầu đạn hạt nhân di thun 2030. Langiu di nan, gah Hải quân Trung Quốc daok hu labaih 370 kapal saong gilai njuk ia, rilo jang duk haong 340 kapal di thun bloh. Yaom lac pathau khan brei thau dom phao ndao hạt nhân di Trung Quốc dak harei dak rilo, min jeng daok biar jang rilo duk haong dom hagait bo Nga saong Mỹ daok hu.

Gah Khí tượng Dunya di LHQ hu ba tabiak pathau khan yaok thun, dalam nan hu pasang iek dom mbang saong bruk rah tabiak bala di ribuk cuah saong dhun mun jeng yau bruk ngak di khol dahlak haong xa hoi. Dalam thun 2022, dhun mun kuhria rah tapa mbaok taneh dunya yaok thun lac 13,8 microgam/mét khối. Dalam nan di Bodele di Cộng hòa Chad hu mboh nồng độ dhun mun glong abih, meng 900 tal - 1.200 mcg/m3. Yaok thun, labaih 2.000 trieu tấn dhun mun par angaok langik, ngak langik sup malup saong ngak jhak tal yawa langik di dom labik atah yaok ribau km, tui nan ngak jhak tal dom bruk kinh te, he sinh thai, langik saong khi hau.

Jaik abih menuac sia di Cộng hòa Séc, Noel brei hu ikan chép ka var mbang melam, nan ye bilan cap mek ikan chép di taneh ia ini daok hu peih tabiak di dom labik raong ikan praong. Min rilo urang ilamu kuhria mboh dahlau lac, thun ini langik tasik meda ngak patrun sản lượng ikan chép. Bilan brak katut panak jang saong bilan pandiak thu lagu jang nyu ngak brei tukvak caih mebaoh di ikan katut panak jang sa bilan. Gah raong saong ngak ikan chép ngak mbang biak hu di Séc meng abap 14. Tal urak ini, bruk raong ikan chép oh lac rik daong praong gah kinh tế, ba bruk hit ngak mbang rilo, bo daok hu yaom gah sajarah./.