Kapul urang pan akaok TPHCM hu cuh gilau, pok bingu Amaik Việt Nam anh hùng

Tacei pato mbang nyaom rajaei ka bruk padang ngak hukum bilan 7/2022, piah pasang iek 4 danak dak hukum, 1 panuac cong padang hukum song sa sarak di rajaei, hu peih tabiak tuk mesup ni di jabat rajaei, Thủ tướng Phạm Minh Chính ndom lac, bruk pasiam thể chế lac 1 dalam 3 salih bharau khang. Meng di akaok nhiệm kỳ, Rajaei biak sangka saong brei pataom tame ka bruk ni. Gam song nan,Thủ tướng pandar pasang iek meng bruk di anak meta piah kham merat pabak tame, ngak pasiam, duh ka bruk khik ramik, tacei ba hu siam jang. Tagok bruk ngak catang kỷ luật, kỷ cương dalam padang ngak dom harak quy phạm pháp luật; peih rilo mbang ginum biai di Thường trực rajaei pasang iek dom harak quy phạm pháp luật, dahlau di tuk pok tagok rajaei. Sangka tal menuac ngak ka bruk padang ngak hukum, harak quy phạm pháp luật.

Di tuk pahadar 75 thun Harei TBLS (27/7/1947-27/7/2022), mesup ini, di Nghĩa trang Liệt sĩ TPHCM, kapul urang pan akaok TPHCM hu cuh gilau, pok bingu Amaik Việt Nam anh hùng, dom anh hùng liệt sĩ, dom urang var klaak rup drei ndih trun ka độc lập tự do di taneh ia. Jeng dalam mesup ini, di jalan Nguyễn Huệ, Sở Ilamu saong Thể thao ban raya hu peih parang iek thaot binguk ngan saong kadha "TP.HCM sarak dalam hatai jalan diukrai “Menyum ia hadar halau ia”. Parang iek piah patagok bruk anit ranam taneh ia, kham merat padang TP.HCM văn minh, salih bahrau, bak hatai anit ranam gauk.

Meng harei 1-8, hu ba tame pandar radaih buýt MST 63-1 (Tiền Giang - Long An - TPHCM) kayua Công ty Phương Trang peih ngak. Tui nan, angan labik padeih, taduan, bayar tuai di TPHCM song tỉnh Tiền Giang hu pandar ka tong abih labik padeih di mangaok jalan piah padeih , taduan, bayar tuai . Di Long An tui kuhria, di 2 labik padeih lac Khu công nghiệp Vĩnh Lộc 2, sang bac Trung cấp Kinh tế kỹ thuật Bến Lức, pasar Bến Lức, canah pak jalan prong Tân An, sang bac Cao đẳng Sư phạm Long An. Yaom harak ka anek saih 7.000 đồng/sa vé, dom janih vé karei meng 12.000 đồng tal 70.000 đồng.

Tui Mintri Y tế, jit Covid-19 di taneh ia drei daok pasang iek hu, min tukvak jaik di ini, dom urang bahrau njauk ruak tagok samar, dalam nan hu menuac metai, min bhap bini jeng daok iek lap, takik caik hatai sangka pacang ruak saong klauk vaccine caga Covid-19. Langiu di nan, jit ruak tangin takai cambuai, pandiak tabiak darah daok tagok khang, abih di nyu lac di bhum gah meraong, gah kreh negar saong Tây Nguyên. Daok ruak đậu mùa khỉ, yaom lac Việt Nam oh ka hu menuac njauk ruak min mboh lac ruak ini biak mbuan njom tame. Kayua yau nan ye, Mintri Y tế hu panuac ieu dom tỉnh, ban brei caga pacang jit ruak, jhul khang dom bruk pathau khan paglaong hatai sahneng dalam bhap bini.

Dalam dom harei jiak di ni, yaom pabui ralow, song pabui pajaih di tỉnh Tiền Giang tagok di tanut glong. Urak ni, yaom pabui rilaow di var ro meng 6,8 triệu đồng/sa tạ tal 7 triệu đồng/sa tạ, tagok labaih 200 ribau đồng/sa tạ dut song bilan dahlau. Taeng pabui pajaih jeng tagok tal 1,4 triệu đồng/sa drei. Tui dom gah chức năng, yaom pabui tagok glong, kayua sa tuk vak atah, yaom pandap mbang di tanut glong, yau nan ye, bhap bini suai damuai rong veik ba tal oh ginup ralow pabui piah pablei. Urak ni, bruk pablei tabiak hu mbuan lagaih, nan ye, urang nong dok padang var ro, palih blei anek pajaih siam, piah rong veik tapol pabui .

Harei ini, Tổng thống Indonesia Joko Widodo peih bruk nao ravang 3 taneh ia Đông Á lac Trung Quốc, Hàn Quốc saong Nhật Bản. Di labik padeih takai camereip abih lac Trung Quốc, tui kuhria, ong Widodo hu taom gaok, ginum biai haong Chủ tịch Trung Quốc Tập Cận Bình piah duah bruk pachreih tui di Trung Quốc ka bruk ngak chủ tịch G20 di Indonesia dahlau di tuk peih Nyaom biai pakat glaong abih di bilan 11 tal  di Bali, jeng yau jhul patagok bruk peih tabiak jalan pambuak bruk ngak mbang pablei salih di dua gah.

Urang brei panuac di Liên hợp quốc (LHQ) Farhan Haq brei thau, dom kapan gilai camereip pajeng ngũ cốc di Ukraine tabiak negar langiu meng dom pabah lamnge tasik di Biển Đen di negar ni, meda nao mai dalam dom harei tal tui thỏa thuận hu Ukraine, Nga, Thổ Nhĩ Kỳ song Liên hiệp quốc. Phaok akaok brei panuac di Liên Hợp Quốc, ong Farhan Haq ndom lac, sa pasak Điều phối hu padang tabiak. piah pambuak song dom gah pagam tal , dom harak gar cambaih laih ka dom kapan gilai, jeng hu khan brei thau dalam harei jiak di ni.

Urak ini dom menuac njom COVID-19 di châu Âu mboh daok trun, min jeng daok hu bruk mbuan njaom mbak. UB châu Âu mboh lac jit praong jeng meda tamuh tabiak veik di bilan thu atau bilan brak thun ini. Kayua yau nan ye, Cao ủy châu Âu ka y tế hu panuac ieu dom taneh ia thành viên jhul samar bruk klauk pabak, klauk mbang vaccine ka 4 kuhria meng akaok jit praong. Dom taneh ia châu Âu daok klauk pabak ka dom menuac umo thun labaih 60, dom menuac hu ruak dalam rup saong urang ngak gah y tế./.

Urang lang: Hani Pha & M. Phương – 26/07