Thủ tướng Phạm Minh Chính, Pal akaok nyaom biai, Akaok mban tacei jalan

Mesup ni (9/3) Mban tacei jalan salih bahrau hành chính di rajaei ginum biai mbang ka sa piah tong yaom bruk ngak thun 2021, jalan ngak, bruk ngak thun 2022. Pa akaok nyaom biai Thủ tướng Phạm Minh Chính Akaok mban tacei jalan ndom lac, thun 2022 hu angan Jum pataom – Njauk adat – Sami saamr – palagaih - siam mekre – Kein laba – Pasiam - Pattaya. Bruk salih bahrau hành chính brei hu jhul khang piah duh ka bruk ngak ni. Pagam tal salih bahrau jalan ngak, harak gar bộ máy, kol drei brei ngak siam, kayua nyu pagam tal abih kapul nyaom, njauk brei hu meta mong, duah thau cambaih laih, peih ngak siam, trun bruk ngak kan bhap bini, ngak brei bruk hành chính hacih saat, khang kajap. Dom bruk hagait oh ka ngak hu, dom hagait bhap bini hu rik panuac tame, ye brei abih hatai tui pang, pasiam, pabak tame.

mBan tacei jalan pacang caga COVID-19 saong pasiam veik kinh tế TPHCM hu ginum biai haong dom quận, huyện saong ban Thủ Đức di mesup ini. Tapa nan, akaok UBND TpHCM Phan Văn Mãi brei thau, anek ruak Omicron daok ngak brei tagok rilo menuac njom ruak dalam dom harei tapa. Hu panuac lac dalam 6 bilan tal, ban raya meda tamuh khang 1 mbang jit COVID-19. Panuac nan rilo takik jeng ngak duh hatai bol bhap rahra. Kayua yau nan ye, akaok UBND ban raya hu panuac ieu gah tui iek, taong yaom ka nyu njauk bruk daok rah tabiak di jit ruak piah hu bruk kuhria caga saong jalan ngak lagaih.

Tỉnh Cà Mau khan brei thau ka dom urang njom COVID-19 dalam harei . Urak ni Cà Mau hu salih meng jit ruak kan kandah tapa catang tagok tuk dom urang ruak dalam harei tagok glong . Anak bruk srau kadau di jit ruak, Bác sĩ Nguyễn Văn Dũng, Yam ndoc Sở Y tế tỉnh Cà Mau hu panuac cong, dom bilac Y tế nao mai song kapul COVID bhap bini ba abih pren ngak di drei kayua nan lac “gah tangin pambuak atah  di y tế cơ sở”, hu ngak bruk sami samar hong jit ruak, hu bruk iek glang pren yava camereip, brei F0 tong ruak di sang song tui iek F1 brei dok karei di sang.

Dom bein pala kruac aik di tỉnh Tiền Giang daok tame bilan paik baoh, thun ini kruac aik pala njauk, pablei hu yaom nan ye mikva urang nong biak chreih chrai. Tuk ini, kruac aik paik pablei di bein yaom meng 10-13 rabau sa kg. Ini lac yaom glaong dalam dom thun jaik ini nan ye urang pala kruac aik hu laba. Tỉnh Tiền Giang hu yaok rabau ha pala kruac aik, rilo meng lac di huyện Cái Bè, Cai Lậy, ban sit Cai Lậy. Kruac aik hu baoh luac thun, baoh hu rilo saong yaom tagok gaong di bilan pandiak.

Dom harei tapa, yaom xăng menyek gam gam tagok glong ngak brei yaom pandap mbang, pandap pandar tagok tui. Di dom drah pasa meng kan di ban raya HCM, rilo pandap tagok meng 5.000 -10.000 đồng/sa kg. Min, urak ni , di dom siêu thị jeng dok peih rilo danak dak trun yaom. Pagap yau, di dom siêu thị Saigon Co.op, kayua yaom kak je trun, meng 10% trun dok 8% nan ye hu labaih 10.000 pandap dalam nyaom pandap mbang that, pandap mbang công nghệ, dom pandap khan aow, jhik song dom pandap pandar dalam sang hu yaom pablei bahrau trun 2% thuế VAT. 

Bol lin Nga brei thau, halan hatian peih jalan brei ka menuac urang khin tabiak truh ban ine Ki-ép haong 4 ban karei di Ucraina. Urak ini oh ka thau dom jalan nan nao tapa Nga atau Bê-la-rút halei oh, lac jalan bo rajaei Ucraina tah klaak. Tui kuhria, jaik 2 triệu urang Ucraina nduac tapa dom negar jaik tapein, dalam nan hu labaih 1 triệu menuac tal Ba Lan, taneh ia hu labaih 500 km jalan tapen negar haong Ucraina.

Thủ tướng Australia meda samar tabiak bruk samar drah ka ia ndik ia sua di labik takai tasik gah Timun, hadei di rilo adit hajan khang ngak ka rajaei negar ni, patagok dom pren khang piah dong ka bhap bini . Tui kuhria hu takik di abih 20 urang metai di New South Wales meng di tuk labik ni hu hajan hangin khang. Gah ilamu ndom lacbiến đổi khí hậu ngak ka ia sua, khuah glai, ribuk song pandiak bhang di Australia rah tabiak dak harei dak rilo song catang jang.

Sa roh duah bahrau ini di Mỹ brei mboh lac, menuac njom Omicron jeng meda pambak ruak ka urang njaom dom anek ruak dahlau di nan saong tukvak njom mbak takik di abih lac 6 harei. Tui Tiến sĩ Amy Barczak di Sang iek ruak đa khoa Massachusetts, yaom lac oh thau cambaih hu hadom vi-rút meng njom mbak ruak ka urang karei, min mboh lac, dom menuac njauk COVID-19 hanjul meda njaom mbak dalam 6 harei atau suai jang. Kayua yau nan ye, dom bruk brei daok karei saong cuk pataih pacang mbaok njauk kuhria tal bruk ini, oh kuhria anek ruak halei, oh kuhria bruk klauk jru vaccine dahlau di nan./.

Urang lang: M. Phuong – Hani Pha – 09/03