Tal urak ni, danak dak oh ka ngak salah bloh kayua rilo makna karei di gauk

Mesup ni, Thủ tướng rajaei Phạm Minh Chính hu mai rivang sang ga pasak Bến Thành song ga Ba Son di jalan metro ka 1 (Bến Thành - Suối Tiên). Hu peih tabiak ngak di thun 2008, min, tal urak ni, danak dak oh ka ngak salah bloh kayua rilo makna karei di gauk. Urak ni, danak dak ngak hu labaih 91,4 % bruk di nyu, song ban raya Hồ Chí Minh dok hu panuac cong dui atah tuk vak ngak salah atah jang 2 thun, tal quý IV/2023. Hadei di tuk, pang po đầu tư brei thau ka jalan ngak danak dak metro ka 1, Thủ tướng rajaei hu panuac pandar dom gah pagam tal ngak brei salah danak dak Metro Bến Thành - Suối Tiên, dom mintri, dom gah, jabat hu mbaok tame langyah cambaih laih, dom kn kandah, tavak tavaiy ka danak dak.

Pahadar 75 thun Harei TBLS, melam ini, mBan Tuyên giáo Trung ương dang tabiak pambuak bruk haong Mintri LĐTB saong XH, rayo papar binguk Việt Nam peih ngak danak dak cầu truyền hình "Khúc tráng ca hòa bình" di 6 labik pambuak gauk lac: Hà Nội, TpHCM, Quảng Nam, Bình Định, Hà Giang haong An Giang. Danak dak nan piah brei mboh veik saong hadar kanal dom blah sajarah hào hùng di bangsa, dom menuac urang ndih trun saong var klaak rup drei brei ka hatai caong hu sron mbon - hòa bình di urang Việt Nam dalam sajarah bangsa. Blaoh harei ini, dom rai hu nao tapa bruk mesruh atau dom menuac hu haniem phul diukrai dalam samar oh hu sap phao, sap mbom, siu jeng mboh drut drui, khan brei ka gauk thau dom bruk, dom menuac hu ngak jeng sron mbon - hòa bình. 

Jeng uan bruk ini, Kapul Chữ thập đỏ tỉnh Bình Thuận peih bruk brei pandap song jien mbaok ka 50 boh sang dalam sarak karja, hu rai duik kan kandah di xã Nam Chính, huyện Đức Linh. Tong abih dom pok pandap hu yaom 30 triệu đồng, yaom lac oh rilo, min, brei mboh hatung hatai di Kapul chữ thập đỏ tỉnh hu payua tal yau panuac thau dar phol tal dom boh sang thương binh, liệt sĩ di tuk pahadar harei 27/7.

Di dom tỉnh dalam bhum taneran kraong CL daok tame tabung glaong bilan hajan, nan ye bruk glut jaleih takai kraong saong ar tasik gam gam rah tabiak. Tui panuac khan di Tổng cục Pacang caga bala meng langik tasik, tal urak ini, bhum taneran kraong CL hu takik di abih lac 751 labik glut jaleih, atah abih tih tagok tal 976km, rilo jang 147 labik glut jaleih duk haong thun 2020. Urak ini hu jaik 20.000 sang bhap bini di Đồng Tháp, An Giang, Vĩnh Long, Cần Thơ saong Cà Mau daok tapen dom kraong mbuan njauk glut jaleih, brei hu samar panduan ba nao labik karei.

Urakni, TPHCM hu 16 urang metai, kayua ruak pandiak tabiak darah, tagok 13 urang dut song thun 2021. Gam song dom urang metai, tong abih urang ruak pandiak tabiak darah jeng tagok samar . Di ban raya hu labaih 32.000 urang, tagok jiak 300% dut song tuk vak ni thun 2021. Piah caga taduan raok urang ruak tame taong ruak pandiak tabiak darah, Sở Y tế hu padang jalan taduan raok, taong ruak pandiak tabiak darah tui 3 kadha lac: mala 2.000 urang , meng 2.000 tal 4.000 urang song meng 4.000-6.000 dok tong ruak di sang iek ruak, piah caga dom pren khang, piah taduan, iek glang, tong ruak, patrun urang ruak trak song metai kayua pandiak tabiak darah.

Sa mbang megei baoh taneh khang 7,3 độ bahrau rah tabiak tuk mesup ini di tỉnh A-bra, negar Philipin. Pasak di mbang megei baoh taneh daok atah di ban sit Dolore jaik 11 km saong daok di labik dalam 10 km. Dom sang glaong rilo tal di ban ine Manila, atah di labik megei baoh taneh labaih 300km jeng mboh megei biak khang. Labik sang Thượng viện di ban ine jeng njauk panduan nao.. Cảnh sát Philippines brei thau, bhap bini mboh biak huac, ba gauk nduac tabiak truh sang daok. Pabah mbang tho di dom siêu thị jeng pacah abih, saong rilo sang jeng mboh ra-ai, mbaih. Jabat địa chất Philippines khan lac mbang megei baoh taneh meda ba tal rilo mbang megei sit saong ngak brei khut khat.

Dalam bruk pagui mek kol jru phiel bahrau di abih, dom gah chức năng di ban ine Mexico City di Mexico bahrau chap khik hu 1,6 tấn cocaine song chap hu 4 urang. Dom jru phiel hu padauk dalam dom khoang bí mật di 2 sruh radaih dui song hu pajeng meng Colombia tal Mexico meng jalan tasik. Ni lac, bruk pacang jru phiel ka 2 di jabat chức năng Mexico dalam bilan 7 ni. 

Meng labaih 3.400 urang njauk ruak, Mỹ urak ini lac taneh ia hu menuac ruak đậu mùa khỉ glaong abih di mangaok dunya. Pasak pasang iek saong pacang caga jit ruak Mỹ kuhria mboh lac, dom menuac njauk ruak đậu mùa khỉ meda hu rilo jang dalam dom adit tal, sa binah lac kayua bruk patagok dut iek saong bruk pathau khan hu siam jang. Dahlau di nan, gah Y tế Dunya hu tabiak panuac brei thau bruk khẩn cấp di dunya ka ruak đậu mùa khỉ saong brei thau lac mbang tamuh jit rilo meng mboh di dom urang likei ndih daok yau diuk pasang haong urang likei karei"./.

Urang lang: Hani Pha & M. Phương – 27/07