Di mbang taom mbaok, pok meyaom 33 anek saih mek hu jai Olympic saong ilamo kỹ thuật dunya thun 2022, akaok negar Nguyễn Xuân Phúc hu jao Huân chương Lao động hạng Nhì ka 10 anek saih, Huân chương Lao động hạng Ba ka 7 anek saih, saong 9 anek saih hu taduan Harak pok mayaom di Thủ tướng Rajaei. Ini lac dom adei mek hu dom jak jeng glaong di dom mbang Olympic dunya. Akaok negar brei thau lac, dom jak jeng ini brei ka drei hu pabak hatai jia biak khang ka gah pato magru, ka ilamo, duah jalan ngak bahrau di urang Việt Nam; dalam nan hu biak rilo anek saih naih joi mek hu jai dunya hu jeng dom urang hu mbaok meta, jeng dom urang roh duah ilamo praong di taneh ia.

Tỉnh ủy Bình Phước brei tabiak mbaok “Sổ tay đảng viên điện tử" saong mbang camereip abih hu pandar kong nghe tri tuệ menuac ngak tame bruk số hóa bruk ngak di đảng. Siphau tangin urang đảng hu padang ngak meng ilamu kong nghe bahrau, pandar ứng dụng mangaok phone pan tangin dom trình duyệt internet, piah daong tổ chức đảng saong urang đảng salih bahrau, paglaong siam lagaih, kein laba bruk peih ngak, bac megru, thau cambaih sarak di Đảng...; peih bruk duah thau hatai sahneng di menuac sia tui nền tảng ứng dụng.

Tỉnh Vĩnh Long bahrau peih mbang pok mayaom, thuong ka jaik 860 urang lac Bí thư Đảng ủy pakat xã saong chi bộ puk palei, labik dalam tỉnh Vĩnh Long. Di mbang taom mbaok, Bí thư tỉnh uỷ Vĩnh Long Bùi Văn Nghiêm brei thau lac, meng hatai abih drei dalam bruk ngak, dom urang ini gam haong chi bộ peih ngak siam dom bruk chính trị, padang  chi bộ haci hacih, khang kajap gah chính trị, jalan sahaneng saong đạo đức; peih ngak siam bruk dân chủ cơ sở, rik daong praong tame bruk jak jeng di tỉnh.

Di nyaom biai pataom iek veik sarak 68 saong sarak 126 di Rajaei ka dom sarak daong urang gaok kan kandah kayua jit praong COVID-19 rah tabiak harei 26-12, ong Phan Văn Anh – phaok akaok Tổng iên đoàn Lao động Việt Nam ba tabiak panuac caong lac: urang ngak lahik bruk ngak meda taduan hu bruk daong 1 mbang yaom 3 triệu đồng sa urang, urang brei padeih di anak meta kayua takik bruk ngak, hu daong sa mbang 2 triệu đồng sa urang. Tui yaok pataom di Tổng liên đoàn Lao động Việt Nam, urak ini hu labaih 482.000 urang ngak di 1.200 doanh nghiệp di 44 tỉnh ban njauk cakak trun tukvak ngak bruk, kayua doanh nghiệp takik hu bruk ngak.

 Thành đoàn TP.HCM bahrau mbaoh tangin pambuak bruk haong Công ty TNHH Thực phẩm Orion Vina peih ngak danak dak padang ngak pasiam sang vệ sinh dalam sang bac saong pasram ilamo pacang caga bruk taong paoh anek saih dalam tukvak 2022-2025. Danak dak ba tabiak jalan lac meda padang ngak takik di nyu 30 baoh sang vệ sinh saong 30 danak dak pasram ilamo pacang caga taong paoh anek saih di ban raya HCM saong dom tinh, ban hu hatai caong.

Chủ tịch Trung Quốc Tập Cận Bình hu tacei dom gah chức năng patagok kham merat peih ngak dom bruk y tế saong peih ngak dom bruk cambaih laih piah khik caga siam mekre, salamat saong prein yava di bhap bini. Ong Tập Cận Bình ndom lac, Trung Quốc njauk peih ngak dom bruk y tế praong jang, pakhang paga pacang dalam bhap bini piah pacang caga saong pasang iek jit ruak, khik caga siam mekre, salamat, prein yava di bhap bini. Panuac ini hu ba tabiak dalam tuk dom jalan pacang caga daok hu klaak nao, tukvak brei daok karei hu dui katut panak veik saong bruk nao mai jeng hu pacadu…

 Brei panuac di tuk peih bruk padang ngak,  pasiam jalan roya 41 di tỉnh Kampong Speu di harei 26-12, Thủ tướng Campuchia Hun Sen brei thau lac, daok labaih 4 triệu rahra Campuchia ka oh klauk mbang ka 3 pacang caga COVID-19. Kayua yau nan ye Thủ tướng Hun Sen ieu kakei rahra kham merat nao klauk jru pacang caga ruak khik ka rup drei, ka gauk gar saong ka rahra anak jit praong. Thủ tướng Hun Sen brei thau lac, mayah rahra nao klauk jru ginup mbang ye rahra meda khang kadang jang, urang njom ruak jeng oh njauk trak.

Gah pasang iek quyen anek menuac Syria brei thau, 6 urang di gah an ninh kayua urang Kurd pan akaok saong 2 urang di gah Jihad metai dalam mbang taong oh jeng di kol IS jaik sa sang guk kreik kol cực đoan di gah brak Syria. Bruk taong nan pamaong tame sa labik an ninh di urang Kurd daok di Raqqa, labik hu sa sang guk di gah tình báo quân sự, labik kreik yaok ratuh kol Jihad. Urang dang akaok gah pasang iek hu jabat daok di negar Anh, ndom lac: "Kol Jihad daok pamaong tame sang guk ini./.