Uan Katê thun ini di mikva urang Cam, Công ty TNHH NA PLAN Việt Nam hu jabat ngak bruk di  tỉnh Ninh Thuận bahrau peih bruk alin hadiah 250 pok pandap ka mikva urang Cam sang kan kandah daok di xã Phước Hữu, huyện Ninh Phước. Yaok pok hu brah, mì, pandap mbang yaok harei, yaom abih tih jaik 63 triệu đồng hu Công ty ba tal tangin mikva Cam. Ini lac bruk ngak biak hu makna, daong ka mikva bui sambai chreih chrai uan raok Kate. Saong tapa nan jeng brei mboh hatung hatian di doanh nghiệp brei ka bol bhap rahra.

Di thị xã Tịnh Biên, tỉnh An Giang bahrau rah tabiak Harei pakacah nduac limo Bảy Núi mek cup Papar binguk An Giang mbang ka 29, hu mbaok  64 yau limo mai meng tỉnh An Giang saong Kiên Giang. Harei pakacah nduac limo Bảy Núi hu  peih ngak, di tuk uan harei Sene Dolta di mikva bangsa Khmer Gah Meraong. Harei kacah nduac limo jeng sa labik pataom dom ilamo siam gheih di bhum Bảy Núi An Giang, tapa nan, daong khik ramik saong patagok ilamo saong padang bruk pambuak gauk gul pataom bangsa; ngak bruk bui sambai chreih chrai dalam harei Sene Dolta di mikva bangsa Khmer.

Dalam 3 bilan puac thun ini, darak pasanr urang ngak di TP.HCM caong pilih ruah labaih 83.000 urang ngak, rilo meng lac dom gah ngak kong saong yit vu. Yaom lac bruk caong hu urang ngak di TP.HCM biak rilo min darak pasar urang ngak daok dang anak bruk kurang labaih tui labik, tui bruk. Dalam quý 3 hu 92% urang ngak hu ilamu nao duah bruk ngak, min dom urang pilih ruah tok pilih ruah menuac ngak bharau, oh hu ilamu. Darak pasar daok caong hu rilo urang ngak hu ilamu trung cấp bruk ngak saong urang ngak phổ thông, min menuac ngak ka dom gah ini daok kurang.

Baoh li-u siem hijao saong baoh kruac bung kanduh hijao di Bến Tre bahrau hu Jabat sở hữu ilamo Canada pabak brei harak pacang khik nhãn hiệu brei angan. Cannada lac darak pasar praong bo tỉnh Bến Tre pamoang tal piah pablei kaya pandap yaom glaong. Kayua yau nan ye, gah ngak nong patagok bruk pathau khan, tacei ba urang ngak nong pala li-u siem hijao, kruac bung kanduh hijao jeng yau dom janih phun mbang baoh karei tui tieu chuan VietGAP, Global GAP piah paglaong baoh kayau hu siam, praong, rilo. Bến Tre hu taneh bein li-u siem hijao saong kruac bung hijao praong abih saong chat luong biak glaong di bhum taneran kraong Cửu Long

Tui kuria, tabung glaong ia nik di miền Tây lac meng harei ini 30.9 saong dui atah tal harei 2.10. Ia  di gah angaok kraong Cửu Long jaik tanut báo động 1. Rabuk Yagi saong Rabuk ka 4 ngak brei hajan praong di bhum Myanmar, Thái Lan saong Lào, gam haong nan, ngak brei hu khối ia biak praong di angaok kraong Mekong. Ia ini daok mai jaik tal bhum ĐBSCL saong meng harei ini meda yam tame tukvak tabung glaong ia ndik miền Tây. Dalam adit ini, ia ndik meda tagok jang, Tui kuhria, ia glaong abih dalam harei di Tân Châu saong Châu Đốc meda tagok tal tabung glaong thun ini di dom harei meng 30.9 - 2.10 tal.

Dom urang lập pháp Hàn Quốc bahrau brei tapa hukum hình sự hóa bruk pandar atau iek thaot binguk saong dom video deepfake hu asal kadha khieu dam, haong bjalan phạt tagok tal 3 thun daok guk saong jien taong phạt 30 triệu won, samu labaih 22 ribau 600 đôla Mỹ. Cảnh sát Hàn Quốc langyah hu labaih 800 mbang urang tội phạm tình dục dalam thun ini. Tui cảnh sát, jaik abih urang gaok bala haong urang ngak duas nan jeng lac dam dara. Oh lac di Hàn Quốc, dom negar dalam dunya jeng daok patagok bruk pacang caga bruk patagok di dom asal kadha deepfake.

Takik abih 66 urang matai saong 60 urang karei njauk rambus dalam 2 harei tapa tuk hajan yau ia tuh ngak brei glut saong jaleih taneh di Nê-pan. Hajan praong daok ngak brei 70 urang karei lahik, rilo jalan praong di Nê-pan brei kreik veik, jalan radaih, jalan kapal haok klaih klaoh, Karja Nê-pan brei thau, takik di nyu 254 menuac matai saong 65 urang lahik kayua bala meng langik tasik kuhria meng kreih bilan 6 tal ini.

Phần Lan bayar gilac 2 drei cagau juk praong ka Trung Quốc dalam bilan 11 ini – dahlau jang 8 thun kayua bein athur labik nyu diukrai oh hu daok prein bayar jien ka bruk raong glang. 2 drei cagau jut hu ba nao tal Phần Lan dalam bilan 1/2018. Phần Lan kuhria raong 2 drei cagau jut ini dalam 15 thun. Bein athur hu buh jien tame 8 triệu Euro (lac labaih 220 tỷ đồng) piah padang labik daok ka cagau jut saong buh tame 1,5 Euro (samu labaih 41 tỷ đồng) yaok thun piah raong glang kol nyu. Trung Quốc maong cagau jut yau “gaon pambuak langiu”, bhian alin hadiah atau brei ka dom negar nyim dom yau cagau piah patagok bruk pambuak gauk saong paglaong thaik thaot dunya.