Thun ini, Mintri Công an daok peih mbang pakacah taong yaom piah pilih ruah tame dom sang bac đại học, cao đẳng. Tui kuhria meda peih pakacah di harei 2 saong harei 3/7, aval jang thun dahlau 2 adit. Thun 2023, adat pilih ruah đại học jeng hu khik tani tanat, njauk rami ramik dom jalan ngak ilamo piah ba mbuan lagaih ka urang pakacah, katut panak veik tukvak pilih ruah ka dom sang bac piah meda peih mbaok thun bac bahrau di akaok bilan 9. Bruk tut angan tame pilih ruah di urang pakacah hu mbuan lagaih jang.

Bộ Chỉ huy Quân sự TP. Cần Thơ brei thau, Tết Quân dân uan Chôl Chnăm Thmây thun 2023 hu peih ngak di xã Định Môn, huyện Thới La, ban Cần Thơ. Urang jakar, urang lin tapon nyaom bol pan phao kraong dalam ban hu pambuak bruk haong karja palei peih ngak rilo bruk yau ye: padang ngak jalan nao mai, ngak ar pacang glut jaleih, caik gom truac hadah dom jalan...Langiu di nan, ban hu peih bruk alin hadiah sang jum pataom brei ka sang urang Khmer daok kan kandah ka sang daok, brei jien bac ka anek saih kham merat yam tapa kan kandah, bac da-a siam, peih bruk pakacah , dom kadha me-in meng kan di bhap bini bangsa Khmer.

Meng harei 30/3 tal harei 2/4 anak tal, Hiệp hội Du lịch saong Sở Du lịch TP.HCM meda peih harei Bánh mì Việt Nam mbang ka 1 thun 2023, di Sang Ilamo Dam dara (Quận 1). Harei ini meda pataom hu 120 gian hàng bánh mì di dom kapul, nhà hàng, tiệm bánh mì, labik pabak brei di TP.HCM saong di dalam taneh ia, gah pabak negar langiu. Harei ini rik tame padang ngak saong brei mboh yaom glaong, jang yau angan bánh mì Việt Nam, gam tui di nan jeng pok mayaom dom nghệ nhân, dom urang ngak duah jalan ngak tabiak yaom glaong di ahar bánh mì.

Tui mBan khik ramik danak dak padang ngak jalan radaih tỉnh Bình Thuận, labik jalan tapen tasik ĐT 719B atah 8km pambuak jalan roya 1 tal labik tasik Tiến Thành hu ngak salah dahlau di harei 25/3. Jalan ini lac labik peih ngak adat peih mbaok Thun Du lịch pakat negar 2023 di tỉnh Bình Thuận, tui kuhria hu peih tabiak di melam 25/3. Urak ini nhà thầu gam padang ngak, gam pambuak bruk haong dom gah piah panduan ba dom hạ tầng kỹ thuật, khik njauk tukvak brei ka radaih peih nduac.

Meng akaok thun 2023 tal urak ini, yaom durain tagok glaong (labaih 100.000 đồng/kg), hu tuk tabung glaong tagok tal labaih 200.000 đồng/kg. kayua yau nan ye rilo urang nong  di tỉnh Đồng Tháp  ba gauk salih taneh ngak padai, dom janih phun mbang baoh karei tapa pala durain ngan haong mblang taneh tal yaok piluh ha. Gah ngak nong kakeimikva njauk caik hatai tuk salih tapa durian. Kayua di bhum hu taneh riya, langik tasik lagaih, phun durain meng hu baoh rilo saong siam. Urak ini, tinh daok pataom prein tame salih ilamo kỹ thuật pala durain piah tani tanat chất lượng; daong ka sang bein  caga dahlau hu ilamo pala plaih vụ, paik baoh oh gam tukvak haong dom bhum pala karei.

Gah du lịch dunya daok mboh bruk tagok veik biak samar haong bruk tuai ravang me-in nao tal Trung Quốc biak rilo. Hadei di 2 bilan pacadu dom jalan pacang jit, peih pabah mbang veik haong dunya, Trung Quốc hu jaik 40 triệu mbang urang tame tabiak negar, tagok tal 112 mangaok sa rituh duk haong tukvak ini thun blaoh. Hu labaih 3 triệu 360 rabau hộ chiếu hu ngak brei ka rahra Trung Quốc. Bahrau ini Mỹ, Nhật Bản, Hàn Quốc brei klaak atau brei cadu meneing dom jalan pasang iek jit ruak ngan saong tuai Trung Quốc nan ye kuhria mboh dahlau lac, anak tal, tuai Trung Quốc tabiak negar langiu tagok khang jang.

Piah pachreih hu gah tư nhân buh jien tame ka danak dak ban ine bahrau Nusantara, Tổng thống Indonesia Joko Widodo brei thau meda klaak kak je tui jien mek tame bắt buộc ngan haong dom doanh nghiệp dalam taneh ia buh jien tame danak dak padang ngak ban ine bahrau dalam gah cơ sở hạ tầng saong dịch vụ công hu yaom 10 tỷ rupiah. Nusantara meda lac sa ban bahrau, hadah krah saong siam ka alam môi trường. Bruk padang ngak ban ine bahrau tui kuhria hu ngak salah di thun 2045, ngan haong yaom buh tame tui kuhria lac 466 ribau tỷ rupiah (samu labaih 30 tỷ đôla Mỹ).  

Ủy ban châu Âu (EC) bahrau brei thau pok jien daong ngak pahla bahrau yaom 50 triệu euro brei ka bhum Nam Phi saong Ấn Độ Dương. Dom kadung jien ini hu daong pacang bruk srau kadau padai brah pandap mbang saong lavang lavaih, pasiam bruk hu pandar dom dịch vụ, pabak prein caga pacang dom bala saong jhul patagok bruk bac megru yaom lac gaok bruk samar drah di dalam bhum./.