Blah web Rajaei brei thau lac hu pataom pathau khan tagok Thủ tướng, dom phó thủ tướng dom khau tin, báo chí, panuac ndom di menuac sia pambuak tal dom bruk rami ramik yaom xang manjek saong bruk jao tanut blei xang manjek meng negar langiu di Mintri Công Thương. Hadei di tuk pasang iek pathau khan, Thủ tướng Phạm Minh Chính ieu kakei akaok Mintri Công Thương langyah tal labik tal dhua bruk daok kurang xang manjek di dom labik, khik kajap bruk cambaih laih, siam lagaih. Gam haong nan, Rajaei ieu kakei Mintri Công thương peih ngak samu gauk dom jalan khik kajap bruk pabak xang manjek ka darak pasa dalam taneh ia; rami ramik yaom tui njauk adat hukum; paglaong bruk pasang iek darak pasa, langyah catang dom bruk ngak suan.

Mintri Công an peih ngak bruk tabung glaong ka siam mekre salamat mangaok jalan mbak nao mai dalam taneh ia meng harei 15/11 tal harei 5/2/2023. Bruk ngak ini piah khik kajap siam mekre salamat jalan mbak, jalan pasei saong jalan ia, samar pacang caga, duah mboh, pacang cakak saong pataom tame langyah meng got dom bruk ngak suan adat nao mai, abih di nyu lac dom bruk bala radaih biak trak. Pacang caga, patrun bruk gar jalan, pacang cakak saong langyah catang dom bruk pataom gauk ngak srau kadau jalan nao mai, pakacah radaih suan hukum, duh ka bruk nao mai, me-in sambai, pajeng ba tuai damuai saong pandap panda di bhap bini...   

Piah caga pandap pabak ka bhap bini di tukvak Tết Nguyên đán Thun sak tapai 2023, Sở Công Thương tỉnh Tiền Giang brei thau lac tui jalan ba tabiak, thun ini hu 8 doanh nghiệp tut angan tame danak dak khik caga, pabak pandap panda pandar yaok harei ka tuk Tết tui danak dak tani tanat yaom kaom. Taong abih tih yaom pandap panda caga khik piah lac labaih 450 tỷ đồng, tagok 13% dut saong Tết thun 2022. Tui kuhria prein blei di tuk Tết thun ini meda tagok labaih 30% dut saong Tết Nguyên đán Thun sak rimaong 2022 kayua kinh tế hu ngak pasiam hadei di tuk jit praong COVID-19.

Meng ini tal jhung thun, dom doanh nghiệp di TPHCM caong hu 43.000 urang ngak gah menyim, jhik, jamriak cơ khí, jao pandap, ngak pandap mbang menyum… Kayua pambak meng srau kadau di darak pasar dunya, ngak brei dom doanh nghiệp jeng gaok kan kandah dalam bruk duah đơn hàng, khik ramik bruk ngak mbang. Piah diuk hu haong dom kan kandah nan, rilo công ty brei menuac ngak padeih meneing, atau padeih ngak di harei senecar piah khik takai urang ngak, piah hu ginup menuac ngak tuk hu dom đơn hàng bahrau..

Dalam harei Ok Om Bok di mikva bangsa Khmer Nam Bộ bahrau blaoh, Miuyim ilamo bangsa Khmer Trà Vinh pachreih hu jaik 9.000 mbang tuai mai rivang iek. Amuk Sơn Thị Hiền lac urang ngak di Miuyim ilamo bangsa Khmer Trà Vinh brei thau lac, meng di bilan 4 bahrau blaoh tal urak ini,  miuyim hu raok tui kuhria lac 500 tuai sa harei, abih di nyu nan lac dom tuai tagok di dom harei puac adit saong tuk lễ. Langiu di tuai mai rivang ma-in, miuyim daok raok kapul anek saih, sinh viên, tuai negar langiu mai duah thau, roh duah ka ilamo bangsa Khmer.

Tổng thống Mỹ Joe Biden kuhria tabiak tranh cử veik saong meda brei thau ka bruk ini di akaok thun 2023. Hatai sahneng ka bruk tabiak tranh cử veik Tổng thống Mỹ di ong Joe Biden hu ba tabiak hadei di tuk mboh lac bruk pilih ruah kreh nhiệm kỳ harei 9/11 lac siam ka nền dân chủ di Mỹ. Ong Biden yam tapa umo 80 di bilan 11 ini, daok dang anak dom panuac tangi sua lac ong meda tabiak tranh cử Tổng thống mbang ka 2 halei oh.

Urang ngak gah jalan mbak di France saong Anh ba gauk padeih ngak, tui nan ngak ka bruk nao mai di ban ine London saong Paris njauk klaih klaoh luac harei 10/11. Di France, mbang padeih ngak piah kateik greik tagok Tổng thống Macron dahlau di tuk ong ba harak dui atah jien bilan hưu ba tal bruk oh njauk gauk. Daok di Anh, mbang padeih ngak di dom urang ngak gah jalan pasei, jalan tasik saong jalan mbak dalam tuk daok kamlah gauk dui atah ka bruk cakak trun bruk ngak, jien bilan hưu saong kein ngak bruk. Ini lac dom mbang padeih ngak bahrau di abih di châu Âu piah ieu dok jien bilan glaong kayua yaom pandar urak ini tagok biak samar jang.

Taliban pakauk oh brei kumei Afghanistan tame dom công viên saong nyaom darak praong di ban ine Kabul. Bruk ini hu ba tabiak daok jhul urang kumei Afghanistan laik tame kan kandah jang, dalam nan urang kumei pakauk oh brei nao mai tuk oh hu urang likei nao tui saong pacap brei me-om khan tuk tabiak truh sang. Dom sang bac brei ka anek kumei umo praong jeng brei kreik pabah mbang labaih sa thun ini mai di taneh ia ini./.

Urang lang: Thu Thảo & M. Phương