Anak bruk khan brei thau di rahra ka bruk hu biak takik urang ngak hu jien mek tame bier blei hu sang daok xã hội, Mintri Padang ngak brei thau: Mintri hu ba tabiak dom sarak daong palagaih jang ka urang blei sang daok xã hội. Rajaei daok taduan mek panuac daong, ramik pasiam dự thảo Hukum sang daok (pasiam veik), tui jalan patrun patakik dom harak gar, taoh talaih dom kan kandah, tavak tavaiy dalam tuk pasang iek brei tapa urang hu blei, điều kiện piah hu blei, pah, pah blei sang daok xã hội. Ndom ka điều kiện, urang ngak pah sang daok, urang ngak tok hu harak pambuak bruk ngak saong harak lac daok ngak bruk di doanh nghiệp ngak pandap, pablei salih atau doanh nghiệp ngak mbang gah hạ tầng di labik ngak kong; hu jien mek tame bier, gaok kan kandah ka sang danaok lac meda blei hu sang saong klak tapa bruk xác nhận labik daok.

Harei paguh (22/8), mbang to yaom laik radaih ô tô camereip abih hu peih tabiak. Dalam dom laik radaih hu Mintri Công an ba tabiak, hu 11 laik radaih biak mekre hu ba tabiak pablei to yaom mbang ini. Gah chức năng oh pacang meneing dom laik radaih bhap bini hu ngak po saong oh kuhria labik daok. Dalam dom laik radaih ba tabiak to yaom, hu 2 laik di Hà Nội lac 30K-555.55 saong 30K-567.89, daok TP.HCM lac  51K-888.88. Tui lambaok Cục Cảnh sát giao thông (Bộ Công an), bruk to yaom laik radaih  ô tô hu peih ngak tui jalan online. Menuac urang atau kapul nyaom hu mbaok tame to yaom, njauk tame blah  web dgbs.vpa.com.vn piah tut angan tài khoản saong pilih ruah laik radaih tui hatai caong khin di drei. 

Dah page ini (21/8), anek saih tal sa di dalam TP.HCM hu tame sang bac, caga ka thun bac bahrau  2023-2024. Dalam dah page harei ini, abih tih dom anek saih tal sa di ban raya hu mai tal sang bac piah taduan tal bac, ngak randap haong gru pato. Dalam adit ini, dom anek saih hu pato tacei, yaih khan dom ilamo di labik bac, caga ka harei tame thun bac bahrau gam haong abih tih dom pakat bac karei di adit hadei. Thun ini, TP.HCM hu labaih 100.000 anek saih bac tal sa công lập. Dalam adit ini, abih tih dom anek saih jeng bac di var page piah ngak randap. Meng harei 28/8, abih tih dom anek saih di Ban raya di dom pakat daok veik jeng hu mai gilac veik sang bac, caga ka thun bac bahrau 2023-2024.

Hadei di labaih 2 thun meteh peih bruk padang ngak, tui kuhria, tatua Mỹ Thuận 2 hu pambuak pagam di bilan 10 tal saong ngak salah abih dom bruk daok veik di harei 31/12, pabak tukvak kayua po padang ngak ba tabiak. Tal urak ini, bruk padang ngak abih tih hu 70% bruk di nyu. Tal jhung bilan 10 meda ngak salah mbaok jalan bê tông nhựa pandiak. Tal urak ini, danak dak ngak hu salah taong abih 15 tatua praong, 1 tatua angaok jalan roya 80, 2 tatua nao tapa jalan. Binah jalan ginup prein dỡ tải lac 12 dalam 20 km, dalam bilan 10 tal meda dỡ tải binah puac di abih.

Tui Sở Kế hoạch saong Đầu tư tỉnh Đồng Nai, urak ini hu 20 danak dak praong daok hu peih ngak. Dalam nan, hu gam danak dak pakat tỉnh saong danak dak pakat negar. Abih tih phun jien brei ka dom danak dak praong lac labaih 4.000 tỷ đồng. Min, tal urak ini bahrau peih brei hu labaih 11% yaom jien tui bruk ba tabiak. Anak bruk ini, ong Võ Tấn Đức – quyen akaok UBND tỉnh Đồng Nai ieu kakei dalam tukvak anak tal, dom bhum palei hu danak dak praong njauk pataom prein tame pato tacei taoh talaih dom cuang kandah, abih di nyu nan lac bruk biyar jien, peih mbaok taneh.

Harei ini (21/08), Quốc hội Campuchia mbang VII hu peih mbang nyaom ka 1 ala bruk pan akaok di patao Norodom Sihamoni, jaik 1 bilan hadei di bruk tổng tuyển cử. Hu mbaok tuk peih mbang nyaom ka 1 Quốc hội mbang  VII ala bruk pan akaok di patao Norodom Sihamoni, hu 125 nghị sỹ saong dom tuai da-a. Dalam harak payua tal dom urang dalam Quốc hội mbang VII, patao Norodom Sihamoni ndom lac, dom urang quốc hội lac lambaok ka bhap bini, brei ngak abih drei piah daong ka bhap bini hu diukrai samu gauk, hu bac da-a, hu bruk ngak lagaih haong ilamu, prein yava saong bruk bac ta-a di drei

Thủ tướng Singapore Lý Hiển Long bahrau brei thau lac, negar ini caong lac meda mboh bruk patagok kinh te dalam thun ini. Min, urang pan akaok negar Singapore kakei lac, biến đổi khí hậu meda ngak kan kandah tal bruk ngak tabiak padai brah pandap mbang saong yaom kaom di dunya. Bruk lạm phát yaok thun di Singapore – oh gam phun jien pajeng ba jalan radaih saong jien mbang – daok, hu trun 4,2% dalam bilan 6 meng tanut 4,7% dalam bilan 5. Min, nyu jeng daok glaong jang dut saong tanut lạm phát hu kuhria mboh dahlau meng akaok thun ini, di tanut 2,5 -3,5%. Thủ tướng Lý Hiển Long brei thau, ong caong lac taneh ia meda plaih hu bruk laik trun di kinh tế min bruk lạm phát jeng daok di tanut glaong jang hatai caong maong.

Piah daong ka dom menuac nyin me-in mbia klaak bruk me-in mbia hu saim lagaih jang, harei ini ( 21/8), karja Australia hu ba tabiak ngak danak dak BetStop. Dom menuac khin klaak bruk me-in mbia di Australia meda tame blah web BetStop tut angan piah hu daong brei. Tuk tut angan angaok blah BetStop, dom menuac nyin me-in mbia meda njauk pacang cakak taong abih dom bruk me-in mbia online dalam takik di abih lac 3 bilan atau lac luac rai. Dom menuac njin me-in mbia oh peih hu tài khoản di dom Cty me-in mbia saong oh taduan hu dom yaih khan meng dom Cty me-in mbia. Yaok bruk me-in mbia online atau tapa phone di urang nan jeng hu pacang cakak abih./.