Mintri Ngak nong saong Patagok palei pala bahrau patabiak Sarak ka bruk cak rok patagok khang kajap bruk pala phun durain, chanh dây. Dalam nan hu panuac ieu kakei urang nong oh eng drei peih praong mblang taneh pala durain, chanh dây di dom bhum hu mblang taneh praong min pruh ia oh lagaih, oh eng drei tah klaak dom janih phun pala karei piah salih tapa pala bahrau phun durain. Dom tinh, ban njauk padang ngak dom jalan ngak, sarak daong ba, pachreih dom doanh nghiệp buh jien tame labik sơ chế, khik piah, pambuak haong urang nong, hợp tác xã, kapul pambuak bruk padang ngak mã số bhum pala, sơ chế, buh tame kadung, ngak tabiak, padang ngak dom chuỗi giá trị ngak tabiak, pataom blei, ngak tabiak, duah jalan pablei tabiak, pablei tabiak negar langiu baoh durain, chanh dây.

Tỉnh Tây Ninh hu rami ramik, caga ngak bahrau 11 mbaik tatua nao tapa kraong Vàm Cỏ Đông haong kraong Sài Gòn. Dom mbaik tatua ini hu daong palagaih bruk nao mai saong patagok bruk pambuak pagam dom tỉnh, ban dalam bhum kinh tế praong gah meraong, abih di nyu lac TP.HCM, Bình Dương, Bình Phước saong Long An. Bruk Tây Ninh brei padang 11 mbaik tatua tapa kraong Vàm Cỏ Đông haong kraong Sài Gòn hu daong pambuak 2 gah takai kraong, daong pambuak jalan nao mai mbuan lagaih haong bhum Đông Nam bộ.

Kayua kurang đơn hàng nan ye tỉnh Đồng Nai hu 100 doanh nghiệp ngan haong labaih 200.000 urang ngak njauk kan kandah gah jien bilan, lahik bruk ngak. Min, piah khik takai urang ngak, dom doanh nghiệp pilih ruah rilo jalan ngak piah ka urang ngak hu padeih adat thun, padeih ngak oh mbang jien bilan, sanya veik harak pambuak bruk. Piah klah rabha kan kandah haong urang ngak, rilo doanh nghiệp likau gah chức năng tỉnh Đồng Nai samar hu sarak daong urang ngak, daong tani tanat raidiuk, abih di nyu nan lac dom urang ngak daok atah di palei.

Thun 2022, Liên đoàn Lao động tỉnh Kiên Giang daok kuhria daong 57 “baoh sang công đoàn” brei ka urang đoàn, urang ngak kan kandah gah sang daok. Tal urak ini, hu jao bloh 20 baoh sang, dom baoh sang daok veik daok hu padang ngak, kham merat jao brei dahlau di tuk tame Tết Nguyên đán thun sak tapai 2023 piah ka urang đoàn hu sang mbang Tết. Yaok thun, Liên đoàn lao động hu jak ba, daong padang sang bahrau, pasiam veik 90 sang “Mái ấm Công đoàn” ka urang đoàn, urang ngak gaok kan kandah hu sang daok siam mekre.

Tỉnh Bình Thuận hu padang dom jalan ngak tani tanat yaom kaom di darak pasa dalam tuk Tết Nguyên đán. Dalam nan, biak caik hatai tal bruk khik tani tanat pandap panda pabak ka dom darak pasa di dom labik bhum ceik, bhum mikva bangsa takik saong huyện kaoh pulao Phú Quý. Abih tih yaom jien buh tame lac labaih 357 tỷ đồng, hu dom janih pandap pandar yaok harei, yau ye brah, pandap mbang ngak blaoh, saradang, manjek mbang, ralaow manuk, ada, ralaow limo, pabui... Piah bruk hu peih ngak siam tui njauk jalan ba tabiak lac caga khik piah pandap panda tani tanat yaom kaom di darak pasa, Sở Công thương Bình Thuận meda bhian jak ba doanh nghiệp duah gah pabak pandap panda, khik tani tanat, yaom lap jang. 

Akaok Mintri Pablei salih Mỹ Gina Raimondo ndom lac Mỹ oh duah jalan neh rabha haong Trung Quốc. Mỹ caong khin jhul patagok bruk pablei salih saong ngak mbang dalam dom gah oh lih tame kein laba kinh tế haong sron mbon taneh ia cốt lõi di Mỹ atau gaoh tal quyền anek menuac. Tui amuk Raimondo, dom urang pan akaok Trung Quốc jeng daok jhul samar bruk kham merat peih ngak dom sarak kinh tế saong công nghệ piah duh ka dom hatai caong praong gah quân sự. Nan ye bruk pagam pambak tame Trung Quốc meda ba mai dom rủi ro bahrau ka an ninh taneh ia Mỹ.

Urang ngak di dom Kapul nghiệp đoàn Công ty gilai điện ngầm Seoul Metro di Hàn Quốc peih bruk padeih meng dah page harei 30/11, piah cagar veik bruk patrun manieng urang ngak. Công ty gilai điện ngầm njauk ieu pataom urang ngak padeih hưu bloh saong dom urang oh hu angan dalam nghiệp đoàn tame ngak, salih ka dom urang padeih ngak piah plaih laik tame bruk klaih klaoh bruk ngak. Karja ban Seoul hu jalan ba tabiak paglaong bruk nduac radaih bus tame maong tabung glaong piah trun dom kan kandah oh caong hu meng bruk padeih ngak. Tui kuhria dom urang ngak hu mbaok tame bruk padeih ngak meda hu rilo jang di puac adit ini.

Cục Khoa học Y tế Thái Lan hu mboh urang camereip abih di taneh ia ini njom biến thể Covid-19 Omicron XBC saong urang ruak hu thit abih ruak. Jabat ini jeng mboh hu labaih 468 urang njaom biến thể BA.2.75 saong dom biến thể phụ di gah ini yau BA.2.75.2, BA.2.75.51 saong BA.2.75.1.2, dalam tuk dom urang njaom biến thể BN.1 saong dom biến thể phụ gah ini tagok rilo jang 4 mbang duk haong adit dahlau di nan. Dom urang njaom Covid-19 meda hu rilo jang dalam bilan la-an, saong hu panuac ieu bhap bini njauk nao klauk jru pabak veik piah patagok bruk pacang ruak./.