Thun ini, Mintri Ngak nong saong patagok palei pala daok peih ngak danak dak padang ngak palei pala bahrau. Kham marat tal puac thun 2023, dom xa mek hu tanut chuan palei pala bahrau lac 78%; hu  7-8 tỉnh ban hu pok brei angan lac ngak salah bruk padang ngak palei pala bahrau; hu 9.500 pandap di danak dak “Yaok xa sa pandap” (OCOP) hu pok brei angan lac mek hu meng 3 patuk tagok. Dalam thun tapa, dalam taneh ia hu 6.009 xã (samu 73%) mek hu tanut chuan palei pala bahrau.

Thun 2022 brei mboh bruk pambak praong biak siam meng Danak dak yaok sa xã  sa pandap ( daok iew lac OCOP) di Hậu Giang, tuk hu tal 70 pandap hu brei angan OCOP pakat tỉnh, kuhria taong abih pandap hu taduan angan hadei di 5 thun peih ngak tagok 175 pandap OCOP. Dom pandap kaya nong hu tame danak dak  OCOP di tỉnh, yau ye: padai, kruac aik oh hu asar, baoh me-mbat, menaih Cầu Đúc, pa-ok, panat, kruac bung, ikan salat…lac dom pandap hu pala – raong ralo, bingi karei hu tỉnh palih ruah ba tame quy hoach di gah ngak nong.  

Dom harei ini, yaom quýt hồng angan je di huyện Lai Vung, tỉnh Đồng Tháp daok trun khang, trun tagok meng yaom 22.000-25.000 đồng/kg. Tukvak Tet thun sak tapai 2023, urang nong daok di huyện Lai Vung pablei tabiak darak pasa labaih 45.000 tấn quýt hồng, dom urang nong daok piah veik piah pablei tame dom harei ia bilan bak baoh di bilan sa, min yaom oh glaong dut saong tukvak dahlau di tết. Urak ini, mblang taneh pala quýt hồng di huyện Lai Vung labaih 200ha. Tukvak tapa, huyện Lai Vung jeng hu peih ngak jak jeng Harei Quýt hồng piah dui tagok gah kinh tế hu makna praong di bhum palei.

Kayua pandiak thu lagu, njom ia mbak di bilan thu 2023, nan ye labaih 30.200 baoh sang bhap bini di tỉnh Kiên Giang mbuan kurang ia pandar. Piah hu ginup ia pandar ka bhap bini, tỉnh brei buh tame labaih 31 tỷ đồng piah pasiam bruk kurang ia di dom labik bhum atah bayah, bhum taphia negar, koh pulao; gam  iew dom bhum palei brei caga dahlau ia di dom binek, kuac ngak brei hacih dom bingun daok hu, kuac veik bingun piah caga; Jhul samar bruk ngak dom danak dak ba ia daok ngak piah samar ba tame pandar pabak ia ka bhap bini.

Pambuak tal bruk urang ame pacang khik anek anak drei asau oh pacang cambuai ye njauk po asau taong paoh, rahtabiak di sa chung cư di Quận 7, Phó akaok UBND TP.HCM Dương Anh Đức, jao UBND Quận 7 dang tabiak, pambuak haong dom kapul hu pambuak tal samar drah ngak cambaih laih, langyah catang tui njauk adat  hukum bruk palao asau oh pacang cambuai, oh njauk adat saong ngak ka urang karei njauk rambuac; pathau khan bruk ka UBND TP.HCM. Dahlau di nan, di mangaok mạng xã hội hu sa clip brei mboh bruk urang ame pacang khik anek njauk po drei sauk taong paoh njauk rambuac di mbaok njauk jhik tal 5 jalan, jaoh tagei.

Tui hãng tin AFP, kuhria tal page ini 8/2, dom menuac metai kayua megei baoh taneh  di Thổ Nhĩ Kỳ saong Syria tagok labaih 7.300 urang. Dom menuac njauk rambuac jeng tagok 35.000 urang. Gah Y tế  dunya (WHO) kuhria mboh lac dom menuac metai dalam mbang megei baoh taneh meda tagok tal 20.000 urang. Tổng thống Thổ Nhĩ Kỳ birau ba tabiak bruk samar chip dui atah 3 bilan di 10 tỉnh gah Đông Nam taneh ia ini piah ba mbuan lagaih di abih ka kapol urang daong duah manuac gaok bala jeng yau pasiam veik bruk khut khat hadei di mbang megei baoh taneh.

Tui kuhria, dah page ini tui maong Việt Nam, Tổng thống Mỹ Joe Biden meda puac harak ka bruk liên bang mbang ka 2 anak Quốc hội Mỹ. Dalam harak ndom puac di drei, ong Joe Biden meda tacei tabiak saong ndom cambaih tal dom jak jeng ngak hu dalam tukvak dua thun par quyen meng blaoh. Gam tui di nan, meda brei thau bruk tabiak tranh cử Tổng thống dalam mbang pilih ruah 2024 anak tal, yaom lac hu takik manuac sia gam dalam đảng Dân chủ oh pachreih tui.

Harei 6/2,  Hội đồng Bảo an Liên hợp quốc hu peih ginum biai pambuak tal bruk ngak pahala di Ukraine. Di mbang nyaom, urang dang kaok nyaom Ngak bruk ba urang mai daong samar di  Liên hợp quốc brei thau, jaik 40% bhap bini Ukraine  daok khin hu daong meng bruk pahala samar chip. Labaih 6 trieu urang lahik sang daok, jalan mbak njuak khut tayak trak. Dom taneh ia di Hội đồng bảo an hu panuac iew, dom gah samar brei lang yah hu bruk sron mbon hoa binh, padeih bruk mesruh gauk yau urak ini di Ukraine.