Mintri Nội vụ hu harak njauk hatai haong bruk padeih Tết Nguyên đán thun 2024 di Mintri Lao động - Thương binh saong Xã hội. Tui jalan ngak ini, urang jakar, công chức, viên chức padeih Tết Nguyên đán Giáp Thìn 2024 meng harei 8/2/2024 (29 bilan Mat) tal abih harei 14/2/2024 (5 bingun bilan 1), abih tih lac 7 harei padeih. Dahlau di nan, dalam dự thảo, Mintri LĐTBXH hu mek panuac dom mintri, dom gah piah pok tagok Thủ tướng Rajaei ba tabiak jalan padeih Tết Nguyên đán thun 2024, Mintri ba tabiak 2 jalan ngak piah padeih Tết jeng dui atah dalam 7 harei, tok karei di labik lac harei padeih camereip.

Gah klauk jru pacang ruak VNVC TP HCM bahrau mbaoh tangin pambuak bruk praong haong sa Cty di Tập đoàn Takeda (Japon) pabak vaccine pandiak tabiak darah ka Việt Nam. PGS.TS Trần Đắc Phu, dahlau daih ngak akaok Cục Y tế pacang caga, Cố vấn pakat glaong pasak pabak samar drah bruk y tế công cộng Việt Nam brei thau, rilo mbang jit pandiak tabiak darah rah dahlau daih hu oh takik menuac metai. Nan ye, meyah Việt Nam samar hu vaccine pandiak tabiak darah, meda daong patrun patakik dom menuac njauk ruak saong matai kayua ruak, meng nan daong jhul kadun likuk jit ruak ini hu khang kajap di Việt Nam. 

Hajan ia sua di dom tỉnh Bắc bộ, Trung bộ dalam dom harei tapa ngak brei 8 urang metai saong lahik, yaok pluh rabau ha njam patam khut, dauk ia, rilo jalan glut jaleih. Dalam nan, dom tỉnh Bắc bộ hu labaih 500 sang jaleih, khut saong rilo labik pacang caga bala meng langik tasik khut, tayah, dauk ia, khut jaik 28 rabau ha padai saong njam patam. Daok di bhum kreh negar, hu 422 baoh sang khut, jaik 3.000 ha padai dauk ia, khut labaih 2.000 ha phun pala karei karei.

Pasak pachreih nong tỉnh Cà Mau bahrau daong 2 rabau drei ada tasik ka bhap bini xã Viên An meng danak dak raong ada tasik lagaih haong biến đổi khí hậu di labik bhap bini daok di bhum đệm Bein negar Mũi Cà Mau. Tui danak dak, yaok sang hu brei 100 drei ada pajaih, gam haong pandap mbang, jru kháng sinh dalam tuk raong. Danak dak ini piah ngak brei hu rilo bruk sản xuất, pilih ruah urang raong lagaih haong bruk langik tasik di yaok palei, daong ka bhap bini tagok jien mek tame. 

Parang iek rup cih Áo Bà Ba ngan saong kadha: “Blah ao Bà Ba dahlau daih saong harei ini” daok peih tabiak di tỉnh Hậu Giang. Parang iek daok dalam dom bruk ngak di Festival Ao bà ba - Hậu Giang 2023, pataom hu labaih 100 blah rup cih ka Ao Bà Ba meng kan tal urak ini hu parang iek di mblang bein rup patau bờ kè Xà No, ban Vị Thanh. Tapa dom blah rup cih hu duah pataom, bhap bini saong tuai mai iek hu mboh dom yaom glaong ilamu meng blah ao cuk ini, Blah ao Bà Ba lac pandap ilamu meng kan biak gheih, mekre, oh labik halei hu yau nan.

Urang dang akaok Đại hội đồng Liên Hợp Quốc Dennis Francis hu panuac ieu karja Afghanistan pasang iek veik bruk pakauk oh brei urang kumei saong uranaih kumei nao bac dom sang bac đại học. Gam haong nan ndom lac, urang kumei saong uranaih kumei Afghanistan jeng yau urang likei, hu dom quyền oh lih tame hu, nan lac dom quyền anek menuac brei hu khik ramik saong iek praong. Nan ye ong ieu karja Afghanistan pasang iek veik sarak saong brei adat dom uranaih kumei hu nao tal sang bac, hu bac ta-a piah meda rik daong ka bruk cakrok di bol bhap rahra saong palei negar. 

Dom drei cagau hu UNESCO pok brei angan lac inem krung dunya di quận Hokkaido gah barak Japon daok mbuan si metai eik dalam bilan barak ini, kayua ikan hồi bo nyu mek ngak pandap mbang piah ndih bilan brak oh mai veik dom baoh kraong dalam bhum. Makna ikan hồi oh mai veik lac kayua tasik pandiak tagok ngak ka ikan mai suai jang. Urang ngak nong pak nan brei thau lac, urang mboh hu rilo cagau jang angaok mblang hamu saong huac lac janih athur ini samar tame dom labik thành thị piah duah pandap mbang, tapa nan nyu meda taom gaok tapak menuac sia dalam palei.

Dom urang ngak praong di Brazil hu panuac brei thau lac, glai nhiệt đới Amazon daok dang anak bruk thu lagu biak trak damak, meda ngak kan kandah tal 500.000 menuac di jhung thun ini. Piah caga bruk ini, rajaei Brazil brei padang kapul đặc nhiệm liên bang, pajeng ba pandap daong, lac ia, pandap mbang, jru tavao saong dom janih karei meng kapal haoh tal dom bang Amazonas saong Acre. Rajaei Brazil jeng hu brei labaih 27,7 triệu USD piah kuac dom baoh kraong piah khik ramik bruk nao mai tuk ia trun biar.