Dah page ini (18/4), di Bình Dương, Mintri pato magru hu peih nyaom biai cak rok patagok pato magru bhum Đông Nam bộ tal thun 2030, pamaong tal thun 2045. Tukvak tapa, gah pato magru di bhum ini mek hu dom jak jeng hu makna praong. Min, di pak ini jeng daok dom kan kandah, yau ye dom sang bac mek hu tanut chuan negar daok bier; bruk tapa prein taduan di dom sang bac, labik pato magru, pato ka uranaih; chất lượng gah urang ngak ka oh pabak hu panuac ieu kakei di bruk cak rok patagok. Kayua yau nan ye, Đông Nam bộ njauk hu jalan langyah ka nyu lagaih piah ngak pasiam saong cak rok patagok dalam tukvak anak tal. Di pak ini, dom urang lambaok gam mayai nao mai, parabha ilamo ba tabiak dom jalan langyah piah cak rok patagok bruk pato magru di bhum ini dalam tukvak anak tal hu siam lagaih jang.

Ban Thường vụ Thành ủy TP.HCM bahrau hu harak brei thau panuac tamat di mBan tacei jalan Thành ủy ka patagok bruk pan akaok, tacei pato, pasang iek bruk peih jien phun đầu tư công, dom danak dak, bruk ngak praong dalam ban raya. Tui nan, meda hu 38 danak dak praong hu Thường trực Thành ủy saong dom urang dalam mBan Thường vụ Thành ủy tui iek. Dalam nan, UV Bộ Chính trị, Bí thư Thành ủy TP.HCM Nguyễn Văn Nên tui iek 3 danak dak lac: Danak dak padang ngak jalan pasei ban raya, jalan ka 1 (Bến Thành- Suối Tiên); Danak dak langyah bruk dauk ia kayua triều cường di TP.HCM haong Danak dak pasiam môi trường ribaong Tham Lương - Bến Cát - Rạch Nước Lên.   

Tui pasak kuhria mboh dahlau bruk langik tasik negar, bilan hajan thun ini meda hu aval jang yaok thun. Kayua yau nan ye, gah ngak nong tỉnh Bình Thuận meda peih bruk pala drak bilan hè thu njauk jalan ba tabiak, pabak ia pandar ka rahra tal 30/6. Tui jalan ba tabiak di Công ty Thủy lợi tỉnh Bình Thuận, iek tui halau ia hu blaoh di urak ini di danak dak kraong ribaong, công ty meda brei dahlau abih ia pandar tal harei 30/6, ia pruh ka vụ đông xuân, thanh long tal 30/4. Ia daok veik hu ramik piah pala drak di hè thu 2023. Bilan hè thu caga dahlau ia piah pruh ka labaih 51 ribau ha, dalam nan padai lac labaih 30 ribau ha, thanh long saong phun mbang baoh lac 20 ribau 800 ha.

Tui kuhria, dalam dom thun tal, gah raong glang di Tây Ninh meda mek tame hu yaok thun labaih 3.000 tỷ đồng gah yaom jien pablei pandap saong mangaok 300 tỷ đồng gah jien laba. Tỉnh khan lac ngak nong pandar công nghệ glaong lac sa dalam 4 bruk salih bahrau praong dalam patagok KTXH di tỉnh. Dalam nan, vaktu 2022-2025 quy hoạch 3 bhum raong glang. Tukvak 2026 - 2030 quy hoạch 2 bhum raong glang. Urak ini Tây Ninh jeng daok kham merat dui pachreih urang buh jien tame peih ngak dom danak dak, dalam nan hu dom danak dak raong glang praong, công nghệ glaong, piah ba gah ngak nong di tỉnh tagok glaong tui jalan ngak nong công nghệ glaong khang kajap.

Tui sarak 28 ka bruk brei masaiy jien laba lap hu peih ngak dalam Danak dak bruk ngak negar cak rok patagok kinh tế- xã hội bhum mikva bangsa takik saong bhum ceik tukvak 2021-2030 di Rajaei, mikva bangsa takik, bhum ceik hu masaiy jien meng Gilang paraik sarak kanja ngan haong yaom laba lap lac 3% sa thun, tukvak masaiy lavik abih lac 15 thun puah ngak sang danaok, cak rok patagok kinh tế, salih bruk ngak. Di tỉnh Bình Định, labaih 600 baoh sang mikva bangsa takik di 4 huyện bhum ceik An Lão, Vân Canh, Vĩnh Thạnh saong Hoài Ân tut angan masaiy jien padang ngak sang danaok, pasiam veik sang danaok, salih bruk ngak, ngan haong abih tih phun jien hu masaiy lac labaih 27 tỷ đồng. Tal tukvak urak ini, hu 40 baoh sang mikva bangsa takik hu brei masaiy.

Gah Y tế Thế giới (WHO) bahrau hu panuac ieu châu Âu caik hatai sangka haong ruak đậu mùa khỉ anak bilan lễ hội.  Lambaok Gah Y tế Dunya WHO di châu Âu brei thau, dalam tuk châu Âu daok caga yam tame bilan lễ hội, bruk “Caga blaoh ka nyu" daok hu peih tabiak tuk châu Âu daok yam tame bilan lễ hội piah pathau khan ka bhap bini mboh lac ruak đậu mùa khỉ jeng daok saong bhap bini jeng brei paglaong hatai sangka.  Bruk nan jeng ieu dom menuac mbuan njauk ruak đậu mùa khỉ brei samar thau dom triệu chứng di ruak, nao dut iek saong jhui ndih daok haong gauk meyah mboh hu dom kadha medil lac ruak.  

Cảnh sát Indonesia meda pandar radaih điện khik caga an ninh ka Nyaom biai pakat glaong abih ASEAN mbang ka 42 di Labuan Bajo, Đông Nu-sa Teng-ga-ra meng harei 9-11 tal bilan 5 anak tal. Bruk pandar radaih điện di mbang nyaom pakat glaong lac sa kadha Indonesia caong brei mboh bruk sanya trun manieng khí thải ngak tabiak hiệu ứng nhà kính. Tui gah cảnh sát Indonesia, 35 ô tô saong 80 radaih pacang khik hu pajeng mai meng jalan tasik tal pabah lamnge Labuan Bajo di puac adit blaoh.

Dom urang điều tra di Japon bahrau duah mboh sa inem mek mangaok daning di 1 nhà kho atah di labik Thủ tướng Kishida Fumio njauk urang glum baoh patuh jaik 40 mét. Gah chức trách daok pasang iek, duah thau prein khang di baoh patuh mek hu di labik piah taong yaom cambaih bruk . Bruk patuh rah tabiak di puac adit blaoh (harei 15/4) tuk Thủ tướng Japon Kishida Fumio daok caga ndom puac di sa pabah lamnge di ban Oa-ca-ya-ma, gah pai taneh ia Japon. Thu tuong Japon tuk nan kuhria puac harak pachreih tui sa urang ứng cử dalam bruk pilih ruah pabak tame Hạ viện. Bruk patuh ngak brei 2 urang njauk rambus, dalam nan hu sa cảnh sát.