Meng harei ini (10/7), Mintri Pato magru peih jalan daong pilih ruah anek saih di https://thisinh.thitotnghiepthpt.edu.vn piah ka anek saih peih bruk tut angan tame, rami ramik veik hatai caong pilih ruah đại học thun 2023 (oh patakik dom mbang salih). Anek saih njauk sangka hatai caong ka 1 lac hatai caong brei ngak dahlau abih saong tuk langyah veik, anek saih njauk tame sa hatai caong duy nhất nan ye anek saih njauk ramik veik labik dang lagaih haong hatai caong di drei. Yau nan meda plaih hu rilo bruk suan ka anek saih pambuak tal maluk mã tổ hợp, mã jalan ngak yau dahlau daih.

Sở jalan mbak pajeng ba TPHCM hu panuac caong samar padang ngak jalan paseit Thủ Thiêm – Long Thành piah pambuak TP.Thủ Đức haong Mblang kapal haok Long Thành. Tui roh duah, jalan pasei Thủ Thiêm – Long Thành atah 37,35 km, hu 20 ga, labik akaok ga lac Thủ Thiêm (TP.Thủ Đức, TP.HCM), labik jhung ga lac Mblang kapal haoh Long Thành (tỉnh Đồng Nai). Abih tih yaom jien buh tame ngak tui kuhria lac 40.500 tỷ đồng. Jalan pasei ini piah duh ka bruk pajeng ba tuai damuai di pasak TP.HCM haong Mblang kapal haoh Long Thành.

Meng akaok thun tal  ini, di Đồng Nai, hu labaih 1.600 uranaih njauk ruak tangin takai cambuai njauk tame sang iek ruak. Piah trun manieng dom kan kandah dalam bruk taong ruak di dom sang iek ruak di tỉnh, Đồng Nai hu peih bruk parabha saong taong ruak ka urang ruak iek tui ruak ka nyu lagaih meng dom labik iek ruak camriep tagok tal sang iek ruak pak tỉnh. Kayua parabha bruk iek ruak hu siam meng dom sang iek ruak cơ sở nan ye thun ini, yaom lac dom urang ruak tangin takai cambuai tame sang iek ruak rilo min sang iek ruak pakat tỉnh di Đồng Nai oh tapa prein yau dahlau deih.

Rilo harei tapa, urang ngak nong miền Tây bui sambai kayua padai hè thu pala njauk saong yaom padai glaong jang thun 2022. Di tỉnh An Giang, padai OM18 hu urang mai blei haong yaom 6.900 đồng/kg, OM5451 hu yaom 6.750 đồng/kg. Mikva ngak padai brei thau, yaom jien sahui saong khak drak urak ini trun rilo duk haong bilan đông xuân nan ye mikva hu laba. Rilo urang ngak nong di Sóc Trăng jeng chreih chrai brei thau lac yaok pluh thun tapa, thun camereip padai hè thu pablei hu yaom glaong. Tui Chi cục Pala drak saong Khik caga phun pala tỉnh Sóc Trăng meng hu labik pablei brah tabiak negar langiu siam, nan ye yaom padai jeng tagok tui, urang ngak nong chreih chrai lo.      

Bruk glut jaleih di ar kraong, ribaong daok rahtabiak samar drah saong ngak khat lahik praong jang di rilo tinh, ban di bhum ĐBSCL. Pak di tỉnh An Giang,mbaok jalan oh khang gam haong dom sruh radaih nao mai dak harei dak rilo ngak ka bruk glut jaleih biak kan piah ngak pasiam. Oh taeng hagait dom  jalan dalam labik daok di bhap bini, jalan roya 91 daok rah tui kraong Hậu jeng deih yau nan. Hu dom gah jalan khut tal yaok piluh mét, jalan mbak njauk gar. Tal urak ini, rilo labik glut jaleih bahrau rahtabiak jeng ngak kan kandah tal gah jalan ini. Tui Sở Jalan mbak pajeng ba tỉnh An Giang, piah tani tanat salamat, dom gah jalan quy hoạch bahrau nan ye atah labaih 50m labik kraong ribaong.

 Hajan ia sua saong glut jaleih taneh daok rah tabiak di rilo labik di Thái Lan saong Trung Quốc. Dom mbang hajan yau tuh ia saong dui atah dalam dom harei tapa ngak brei dauk khang di tỉnh Phuket di Thái Lan. Hu dom labik dauk dalam meng 60cm-100cm ngak ka jalan radaih oh nao mai hu. Dalam tuk nan, ia di dom kraong, ribaong nduac tabiak tasik daok glaong biak glaong. Karja jeng hu ba tabiak dom panuac brei thau ka ia dauk ia sua, glut jaleih taneh di dom labik mbon ceik piah ka bhap bini, tuai damuai caga pacang, plaih. Dalam tuk nan, di tỉnh Hồ Bắc – Trung Quốc jaik pluh urang jeng daok lahik hadei di mbang glut jaleih taneh khang di sa labik công trường padang ngak.

Yaok ratuh urang di cu jeng daok gar di jalan tapen negar Mỹ - Mexico kayua dom adat tame negar bahrau bo kanja Mỹ brei tapa di bilan 5 bahrau blaoh. Adat bahrau brei ka dom urang di cư likau tị nạn di jalan tapen negar, min njauk cang di Mexico saong njauk tut angan tame nộp harak gar likau tị nạn tapa sa ứng dụng bắt buộc. jalan cang ka harak gar brei tapa dui atah ngak ka rilo urang njauk klak nao. Tui paka di Rajaei Mỹ brei mboh, dom urang di cư hu mboh tuk daok tapa jalan tapen negar suan hukum hu trun 69% dalam sa bilan tapa.

Bruk Mỹ payua bom chùm ka Ukraine daok gaok bruk oh njauk hatai di rilo taneh ia, kapul nyaom dunya saong dalam taneh ia Mỹ. Bom chùm lac sa janih patagok di bom bi, tuk 1 baoh bom hu palaik palao trun,  nyu parai tabiak yaok pluh tal yaok ratuh baoh bom sit jang di gah dalam. Kayua yau nan ye, meda ba tal metai lahik rilo di sa labik praong. Dom baoh bom oh patuh meda daok dalam haluk saong mbuan patuh ba tal metai lahik dalam yaok pluh thun. Liên hợp quốc hu panuac ieu dom taneh ia ngak njauk tui Công ước di Liên hợp quốc ka pakauk pandar bom chùm. Bruk ngak nan di Mỹ jeng gaok bruk oh njauk hatai di dom taneh ia dalam NATO saong dom taneh ia ayut di Mỹ yau ye Canada, Anh saong Tây Ban Nha./.