Ngak bruk haong dom gah pambuak tal di huyen Long Thành, tỉnh Đồng Nai ka bruk ngak danak dak Mblang kapal haok dunya Long Thành,  Phó Thủ tướng Trần Hồng Hà brei thau, ini lac danak dak praong di negar, lac danak dak piah salam uan dom danak dak praong di taneh ia. Yau nan min, mblang kapal haok ngak daok suai, oh sumu tukvak ba tabiak. Phó Thủ tướng caong khin tỉnh Đồng Nai ngak brei njauk tukvak peih taneh ngak mblang kapal haok Long Thành. Tỉnh njauk thau bruk peih taneh nan, lac bruk praong dalam dom bruk ngak di danak dak. Gam tacei ba dom mentri, dom gah, po buh jien tame ngak brei pathau khan taong abih gah ka bruk peih ngak taong abih danak dak mblang kapal haok Long Thành.

Mintri Pato Megru bahrau brei thau điểm pakacah anek saih naih joi pakat negar thun bac 2022-2023. Mbang pakacah rah tabiak dalam 2 harei lac harei 24 saong harei 25/2, hu labaih 4 rabau 500 anek saih di  63 Sở pato megru dom tỉnh, ban haong dom sang bac đại học hu mbaok tame. Sở Pato Megru Hà Nội lac labik hu anek saih tame pakacah rilo di abih, lac 184 anek saih, tut angan pakacah 12 môn saong hu 141 anek saih mek hu giải. Sở Pato Megru TPHCM hu 94 anek saih pakacah 11 môn saong hu 60 anek saih mek hu giải.

Di Ban raya HCM, 20 urang jakar cảnh sát jalan mbak hu bac megru gah cơ khí ôtô , hu chứng chỉ đăng kiểm, hu brei tame daong dom pasak đăng kiểm mneg harei 13/3. Tui bruk kuhria caga dahlau, dom radaih tal tuk kiểm định di bilan 3 di Ban raya HCM hu labaih 50.000 radaih, bilan 4 labaih 80.000 radaih,  dalam prein pabak tok hu labaih 31% bruk njauk hu. Cục cảnh sát jalan mbak  jeng daok pasram ka labaih 160 urang jakar, urang lin ka bruk kiểm định salamat ky thuat  saong khik caga alam moi truong, thau pandar dom mac jamraih dalam bruk kiểm định piah daong tuk khin hu.

Hợp tác xã Kruac bung kanduh hijao Bến Tre hu buh jien tame 13 tỷ đồng haong mbaok taneh praong abih tih labaih 4.000m2, hu 4 hạng mục lac: labik sang sơ chế, ngak hacih sa-at, tame kadung, kho la-an khik pandap, labik ngak ia iak, labik văn phòng saong parang iek dom pandap. Yau nan min rilo bilan tapa, Hợp tác xã ngak bruk biak takik, ngak piah mboh lac hu ngak. Rilo bruk tok ngak dalam tukvak katut panak bloh kreik pabah mbang, oh hu bruk ngak pandap, pablei salih. Meng akaok thun tal ini, HTX tok pablei salih hu labaih 20 tấn baoh kruac bhung.

Meng harei akok thun, bruk pacang caga jit kum manuk ada hu Cần Thơ peih ngak catang, abih di nyu lac hadei di tuk Campuchia tamuh dom sruh jit ruak manuk ada. Bhap bini dak harei dak thau sahaneng brei klauk vaccine caga ruak ka taphon manuk ada. Tui bruk ba tabiak, dalam thun ini ban raya peih ngak 3 mbang klauk jru cambaic laic. Piah bruk nan hu patagok siam, UB bhap bini ban raya caong khin karja dom palei kham pambuak haong gah thú y pasang iek. Abih di nyu nan lac juai iek lap anak bruk jit ruak mbuan ba tal bala. Gah chức năng kakei mikva urang ngak nong njauk brei pandar  dom jalan sinh học salamat dalam bruk raong glang, abih di nyu lac bhian pruh jru pametai anek ruak, brei var ro hacih sa-at.

Ấn Độ daok lac taneh ia blei phao ndao tame praong abih di dunya dalam vaktu 2018- 2022 haong 11% thị phần blei salih di dunya. Dalam 5 thun tapa, Nga jeng daok dang akaok lac taneh ia pabak phao ndao praong abih ka Ấn Độ, meblah 45% dom phao ndao hu blei tame. Dalam tuk nan, Pháp salih ka Mỹ jeng taneh ia pambuak bruk pablei salih gah quốc phòng praong ka 2 di Ấn Độ. Iek gah pandar cai ka quốc phòng, Ấn Độ dang ka 3 hadei di Mỹ saong Trung Quốc. Dom thun tapa,  Ấn Độ mek hu dom siam mekre bahrau dalam tuk peih ngak bruk Eng drei ngak dalam bruk ngak tabiak pandap quốc phòng.

Philippines saong Mỹ daok tame bruk pasram lin haong gauk ngan haong makna praong lac brei pakhang bruk quốc phòng di taneh ia ĐNA ini. Bruk pasram ini dui atah 3 adit hu mbaok di labaih 3.000 lin Philippines saong Mỹ. Tui bruk ba tabiak, dom bruk pasram hu dom asar kadha caga angaok langik saong ar tasik, dua gah peih ngak rilo mbang pasram cuh siuk biak meng phao sit, pháo binh, phao cối saong dom danak dak padang ngak.

Jabat công tố Hàn Quốc tabiak bruk truy tố 108 urang ka duas plaih nao ngak nghĩa vụ quân sự bắt buộc. Dom urang plaih bruk nan nao ngak ja dom harak lac njauk ruak glo akaok tuk nao sang iek ruak saong hadei di nan nộp harak ja nan ka karja. Tui Hukum negar Hàn Quốc, taong abih urang likei lac rahra taneh ia ini hu prein yava siam mekre jeng brei nao ngak lin dalam Lục quân 18 bilan, Hải quân dalam 20 bilan atau Không quân dalam 21 bilan. Meyah prein yava oh siam, oh ngak hu bruk di urang lin, urang nan hu adat oh brei nao ngak lin, oh brei ngak bruk yau sa urang duh ka bruk kein laba di xã hội./.