Tukvak jaik di ini, Cục Khik ramik phun pala, Mintri ngak nong saong patagok palei pala rilo mbang taduan hu khau tin di taneh ia blei tame hu pambuak tal bruk oh ngak njauk tui dom panuac ieu kakei ka bruk pasang iek phun pala, abih di nyu nan lac bruk bleih saleih mã số bhum pala. Dom janih kaya nong njauk kakei rilo, yau ye patei, pa-aok, durain, panat, thanh long, darang… pablei tabiak tapa darak pasa Trung Quốc; durain, chôm chôm, maraik hu labaih jru tavao tapa tanut brei adat tuk pablei tabiak tapa darak pasa Đức, France, Tây Ban Nha, Hàn Quốc… Anak bruk ini, rilo doanh nghiệp ieu kakei Mintri ngak nong saong patagok palei pala samar drah padang ngak adat, chế tài dalam bruk pandar mã số bhum pala saong labik papaok, khik ramik mã số bhum pala saong mã số labik papaok hu siam lagaih jang, njauk khik caga po dang akaok mã số.

Mintri Y tế bahrau hu harak ieu patagok pasang iek bruk pablei salih, pandar "binguk klao" hu khí dinitơ monoxide (N2O). Tui Mintri Y tế, khí N2O lac hóa chất hu pandar rilo dalam bruk ngak pin ia harei, kaoh, cakak saong gây mê dalam y học... Mintri Y tế hu tabiak adat khik ramik saong pandar phụ gia pandap mbnag, dalam nan hu khí dinitơ monoxide N2O... Min urak ini khí dinitơ monoxide N2O hu ba tabiak pandar suan bruk di nyu. Hu dom labik daok rah tabiak bruk pablei salih, pandar "binguk klao" di dom kuan bar, vũ trường, kuan karaoke, labik me-in sambai ngak jhak tal prein yava urang pandar.

Piah khik kajap salamat dahlau, dalam saong hadei di Harei negar 2-9 anak tal, Bí thư Thành ủy TP.HCM Nguyễn Văn Nên ieu kakei dom jabat, kapul di ban raya tani tanat bruk an ninh trật tự, tuk halei jeng patagok dom bruk ngak caga dahlau, oh iek lap, tuk halei jeng caik hatai, oh caik var jar, caga hu dahlau, patuak drei anak dom bruk; tani tanat an ninh trật tự, ba kein lagaih ka rahra sahanang hatai ma-in dalam tuk lễ. gam haong nan, samar drah langyah dom bruk an ninh chính trị tui jalan ngak “4 di labik:, “3 halain hatain”; pataom prein tame tani tanat khik kajap bruk an ninh trật tự dahlau, dalam saong hadei di lễ, ba kein lagaih ka rahra sahanang hatai ma-in dalam tuk lễ.

UBMT negar Việt Nam tỉnh Đồng Tháp bahrau peih bruk pataom iek veik 20 thun Harei Jum pataom bangsa, vaktu 2003 – 2023. Tapa 20 thun peih ngak, Harei pataom daok jeng bruk sinh hoạt chính trị praong dalam di  yaok rairah bhap bini, rik daong praong tame bruk cakrok patagok KTXH, khik kajap sron mbon puk palei, haong labaih 90% labik daok di bhap bini peih ngak Harei roya Jum pataom biak praong meng mbaok meta gah langiu tal asal kadha gah dalam, ba chreih chrai bui sambai dalam bhap bini. Uan harei pataom ini, tỉnh Đồng Tháp hu peih bruk padang ngak labaih 1.600 mbaik tatua palei pala, padang ngak bahrau saong ngak pasiam labaih 8.900 baoh sang jum pataom haong yaom jien abih labaih 426 tỷ đồng.  

Sở Pato magru Bình Thuận bahrau hu harak payua tal dom jabat, kapul nyaom, manuac urang di dalam tỉnh ka bruk padang ngak jalan talei phone pandiak di Sở, piah taduan khau tin pathau khan ka dom bruk ngak suan pambuak tal đạo đức di gru pato, peih ngak dom adat mek rahra ngak pasak, bruk taong paoh gauk dalam sang bac saong dom bruk ngak suan karei dalam gah pato magru. Hadei di tuk taduan hu khau tin, Sở Pato magru tỉnh Bình Thuận meda peih bruk pasang iek patuak piah samar drah ngak pasiam saong langyah dom bruk ngak suan ngan haong dom kapul, manuac urang di thẩm quyền. Jalan laik phone pandiak lac laik phone di Yam ndok Sở 0975809823, di Chánh Thanh tra Sở 0975143467 saong laik phone cố định 0252 – 3822681

Bruk tagok yaom jien laba khang kadang di Cục Dự trữ liên bang Mỹ (Fed) ngak brei yaom jien laba thế chấp mbang akaok meti tagok labaih 7% hadei di jaik 2 pluh thun. Bruk ini ngak brei trun pandiak darak pasar sang danaok taneh riya daok pandiak tagok hadei di jit praong COVID-19. Tui gah jien padai Freddie Mac, bruk thế chấp cố định (bhian lac tukvak 30 thun) daok trun  tagok vil val tanut 7,09% - glaong jang rilo duk haong 5,13% di sa thun dahlau saong 3,9%. Dom urang ilamu gah sang danaok taneh riya mboh lac, bruk nan meda lac bruk  "cuang kandah" praong abih ngan saong urang blei saong meuac pablei sang di Mỹ kuhria meng dahlau mai. 

Urak ini, dom tuai du lịch MICE (du lịch pambuak gam parang iek, nyaom biai) meng Việt Nam tapa Thái Lan biak rilo saong daok tagok khang, meblah labaih 10% abih tih tuai MICE châu Á mai tal negar ini. Meng urak ini tal puac thun, Thái Lan ba tabiak jalan dui pachreih veik 15.000 mbang tuai MICE meng Việt Nam, patagok tuai du lịch MICE Việt Nam tal 50.000 urang. Doanh nghiệp Việt Nam rilo meng lac sangka tal dom gah blei tame, pablei tabiak, logistics, công nghiệp trak, công nghiệp ngak tabiak… tuk hu mbaok tame dom mbang parang iek, nyaom biai di Thái Lan. Gah du lịch Thái Lan meda daong ka dom doanh nghiệp Việt Nam hu mbaok tame parang iek di negar ini dom phun jien, yau ye jien nao mai, mbang daok, bruk pambuak gauk… tui yaok bruk.

Dalam tuk langik pandiak thu dak harei dak khang, rajaei Prang daok pachreih bruk pandar ilamu pandok mek ia kakua. Meng dom blah halam di động hu ngak meng katak (polypropylene) atau ngak meng thép, hu pagam di mangaok dom gheng thép oh caraih, galong meng 2-4m hu caik mabok mbaiy nao gah ngin ba tui taginum saong ia kaua, dom blah halam ini meda pataom mek dom ia kakua sit par dalam không khí. Dom ia kakua ini pataom veik dalam halam saong hu biak rilo meng 20-40 lít dalam yaok mét vuông halam yaok harei. Jalan ngak ini meda daong hu binah halei ka bruk kurang ia, min kan piah ngak praong./.