Dom bác sĩ hu pilih ruah lac viên chức dom sang iek ruak, Pasak Y tế huyện kan kandah, kaoh pulao 

Jabat Rajaei bahrau hu harak brei thau panuac tamat di Phó Thủ tướng Rajaei Lê Văn Thành di mbang pasang iek bruk peih ngak danak dak padang ngak jalan cao tốc Bến Lức - Long Thành. Dalam nan, Phó Thủ tướng ieu ban raya HCM haong tỉnh Đồng Nai pataom tame, kham merat ngak ka nyu salah bruk peih taneh ka danak dak dahlau di harei 30-8. Danak dak padang ngak jalan cao tốc Bến Lức - Long Thành atah abih tih jaik 58km nao tapa tỉnh Long An, TP.HCM haong tỉnh Đồng Nai, lac jalan nduac samar praong di bhum piah daong patagok KTXH di bhum KT praong gah meraong.

Mintri Y tế bahrau peih tal bác sĩ chuyên khoa pakat 1, tal 4 ka 30 bác sĩ ranaih umo dalam dom tỉnh Tây Nam Bộ. Dahlau di tuk hu pilih ruah tame chuyên khoa pakat I, dom bác sĩ hu pilih ruah lac viên chức dom sang iek ruak, Pasak Y tế huyện kan kandah, kaoh pulao di dom tỉnh: An Giang, Bến Tre, Cà Mau, Đồng Tháp, Long An, Tiền Giang, Trà Vinh saong Vĩnh Long. Hadei di tuk salah tukvak pato pakai, dom bac si ranaih brei nao ngak bruk takik di nyu lac 5 thun di dom huyen kathaot hu ba nao bac megru.

Piah patrun, patakik bruk urang ngak gah y tế padeih bruk rilo kayua jien bilan takik, tỉnh Bình Dương brei ramik veik jien bilan ka dom urang daok ngak bruk hợp đồng tui Sarak 68 di Rajaei di sang iek ruak Đa khoa tỉnh Bình Dương. Tui nan, jien bilan ka urang hu ilamu thạc sĩ, chuyên khoa 1, bác sĩ nội trú lac 6 triệu 037 rabau đồng; bac tamat đại học lac 5 triệu 610 rabau đồng; cao đẳng lac 5 triệu 380 rabau đồng; trung cấp lac 5 triệu140 rabau đồng; sơ cấp hu tapa pato pakai bruk ngak lac 5 triệu đồng.

Dah page ini, labaih 1,3 triệu anek saih dom pakat Tiểu học, THCS saong THPT di ban raya HCM chreih chrai nao tal sang bac dalam harei tame thun bac bahrau. Thun bac bahrau 2022-2023, TPHCM hu jaik 700.000 anek saih tiểu học, labaih 400.000 anek saih THCS saong labaih 245.000 anek saih THPT. Ini jeng lac thun bac camriep abih peih tabiak danak dak bahrau ngan haong tal 10, pakat tiểu học ye peih tabiak di dom tal 1, 2, 3; pakat THCS peih tabiak di tal 6, 7.

Baha Serey Kandal di phường Vĩnh Phước, ban sit Vĩnh Châu, tỉnh Sóc Trăng bahrau pataom iek veik khóa bac Hè brei ka anek kamuan urang bangsa Khmer. Dom tal bac di baha hu peih tabiak meng bilan 6, hu abih tih 233 adei anek saih tui bac di dom tal bac 1, 2, 3 tui danak dak pato pakai akhar haroh Khmer. Tui Đại đức Lý Phét - Trụ trì baha Serey Kandal, langiu di pato akhar vak, sap ndom di bangsa Khmer, baha daok hu pablak tame pato brei thau dom adat cambat, tanarakun, ilamu meng kan di bhap bini piah ka dom adei thau saong khik ramik ilamu meng kan di bangsa drei.

Hàn Quốc saong Mỹ harei ini hu peih bruk pasram mesruh haong gauk yaok thun, pambuak veik bruk pasram biak, piah duah jalan pacang caga dom bruk cuh iek phao ndao di Triều Tiên. Bruk pasram mesuh Hàn – Mỹ hu peih tabiak dalam tuk Triều Tiên bahrau cuh 2 tên lửa hành trình meng ban sit di gah takai tasik gah tây Onchon di adit dahlau, hadei di tuk Hàn Quốc saong Mỹ tame bruk pasram mesuh haong gauk. Kanja Hàn Quốc khan lac Triều Tiên hu ngak dom mbang cuh iek tên lửa biak rilo dalam thun ini saong meda peih bruk cuhh iek hạt nhân mbang ka 7 oh thau tukvak halei.

Trung Quốc daok rah tapa bilan pandiak bhang khang di abih saong thu lagu di abih kuhria dalam 61 thun tapa. Urak ini, mbang pandiak bhang ini yam tapa harei ka 10 daok ngak kan kandah tal jaik abih dom labik di bhum gah meraong Trung Quốc tuk langik di rilo labik pandiak meng 35 tal 40 độ C. Mintri ngak nong Trung Quốc brei thau lac meda ba tabiak ngak jalan patagok ia hajan meng bruk parai jru hóa học tame dom taginum, saong brei pruh "jru khik ia" mangaok mblang hamu piah trun takik bruk samar thu, piah pacang khat lahik di pandiak bhang dui atah haong bilan pala.

Jabat khik ramik dom bruk samar drah di bhum Ulyanovsk di Nga brei thau, sa bala angaok jalan biak trak di radaih tải praong saong radaih buýt di harei 21/8 ngak ka 16 urang metai. Bala rahtabiak tuk urang peih radaih tải ginup tame radaih buýt daok pataok dalam labik ngak pasiam, hadei di nan ginuk tame sa radaih tai karei. dom jabat chức năng hu peih bruk cấp cứu dom urang njauk bala saong duah thau makna ba tal bala ini./.

Urang lang: Thu Thao & M. Phuong – 22/08