Mintri Y tế brei thau lac harei 21/4 hu jaik 2 ribau 470 urang njom ruak COVID-19 bahrau, tagok labaih 300 urang dut saong harei dahlau di nan. Ini lac harei ka 4 gam gam dom urang njom ruak bahrau tagok glaong. Dalam harei hu 245 urang thit ruak, 109 urang ruak suak yava meng oxy. Di TP.HCM, ong Nguyễn Hồng Tâm – yam ndok Pasak pasang iek ruak kik TP.HCM (HCDC) – brei thau lac dom harei tapa, dom urang njom ruak COVID-19 saong tame sang iek ruak tui kuhria tagok, rilo meng lac dom urang mbuan njom ruak glaong. Urak ini Sở Y tế TP.HCM hu pato tacei jalan peih ngak veik dom bruk khik caga anek manuac anak bruk njom mbak ruak.

UBND tỉnh Bình Phước ieu dom gah, dom puk palei, patagok jang bruk kuhria caga, saneng duah, pambuak bruk di dom po pandap saong bhap bini piah patagok pandap OCOP, pabak hatai caong di darak pasar.  Bình Phước ba tabiak bruk lac tal thun 2025 kham merat hu gac  150 pandap OCOP hu brei angan meng 3 patuk tagok, dalam nan 10% pandap 5 patuk tut angan tame taong yaom saong dak angan pandap OCOP pakat negar, pakhang pakajap saong paglaong takik di abih 50% pandap OCOP abih tukvak chứng nhận tui adat.                            

Dah page ini (21/4), di TP.HCM hu rah tabiak dom bruk uan salam Harei tapuk saong ilamo puac tapuk Việt Nam mbang ka 2 thun 2023.  Bruk siam lagaih di Harei tapuk saong ilamo puac thun ini di TP.HCM lac tabiak mbaok di 10 urang lambaok ilamo puac tapuk saong dom mbang ginum biai hu pambuak tal tapuk; dom bruk ini meda hu peih tabiak di 15 quận -huyện di ban raya. Yaok urang lambaok meda hu dom dalikan taeng di drei, meng nan meda rik tame bruk njom pambak asal kadha ka tapuk, jalan diukrai siam makre saong ba siam lagaih ka rahra, abih di nyu nan lac rai ranaih urak ini ka ilamo puac tapuk. Tukvak urak ini, di TP.HCM hu labaih 80 bruk ngak pahadar Harei tapuk saong ilamo puac tapuk Việt Nam.  

Piah samar ba tame pandar Sang iek ruak Đa khoa tỉnh Bình Dương hadei di rilo mbang pagun sanya, Bí thư Tỉnh ủy Bình Dương Nguyễn Văn Lợi bahrau nao pasang iek tapak, tacei pato dom gah padang ngak, samar ngak ka nyu salah, kham merat tal 11/2023 meda peih tabiak ngak iek. Danak dak sang iek ruak ini hu 1.500 papan ndih haong 2 pok thầu, lac padang ngak, pabak saong ngak dom hệ thống kỹ thuật; padang ngak saong caik hệ thống khí y tế saong pajeng ba mẫu bệnh phẩm.  Urak ini, dom pok thầu padang ngak hu meng 89% tal 92% bruk di nyu. Sang iek ruak ini hu phun jien buh tame ngak tui kuhria lac 2.300 tỷ đồng,  hu padang ngak meng thun 2012.

Urang pan akaok ban Cần Thơ brei thau lac, Jabat Cảnh sát pasang iek Công an ban bahrau tống đạt quyết định langyah bị can saong peih bruk cap khik ngan haong Mai Công Hưng, ndih tapui thun 1985, daok di bhum 2, phường Hưng Thạnh, quận Cái Răng, ban Cần Thơ, urang ngak Đăng kiểm di Chi cục Đăng kiểm ka 8 ka bruk mbang jien. Mai Công Hưng pagam pambak tame bruk ngak,  quyen di drei tuk hu brei bruk đăng kiểm dom sruh ghe gilai di mangaok jalan ia dalam taneh ia, hu taduan labaih 1 tỷ đồng di dom po gilai, urang khik ramik, tacei jalan piah klaak tapa dom adat ka bruk đăng kiểm. tui kuhria yaok mbang đăng kiểm, Hưng taduan hu 2 triệu đồng.

Japon sanya buh tame 50 triệu đô la Mỹ brei ka pasak ASEAN pacang caga dom bruk y tế samar drah saong jit ruak bahrau tagok (ACPHEED). Ini lac panuac di urang lambaok Japon di ASEAN Kiya Masahik khan haong báo chí bahrau ini. Kadha praong di bruk pambuak gauk ini, lac langyah dom bruk karei di gauk meda tamuh tabiak dalam taong abih dom gah, dalam nan hu gam bruk y tế cộng đồng. Yaom lac dom taneh ia daok pasang iek hu siam jit COVID-19 min jit jeng daok mbuan tamuh tabiak saong dunya brei caga.

Jabat khik ramik langik tasik, địa vật lý saong khí quyển Philippines brei thau lac, iek tui bruk kuhria mboh dahlau di bilai Science Garden di ban Quezon, bhum ini meda rah tabiak bruk pandiak bhang tagok tal 50 độ C di harei paguh (22/4) . Rahra di ban Quezon, Manila saong Pasay ​​meda rah tapa nhiệtglaong abih tuk paka pandiak tui kuhria lac tagok tal 50 độ C. Mayah sa urang pambuak haong chỉ số nhiệt meng 42 tal 52 độ C meda njauk mebuk pandiak. Dalam tuk nan nhiệt độ meng 52 độ C tagok hu parabha lac tanut biak kan kandah di abih.  

Akaok Mintri Jalan mbak Công chính Campuchia, ong Sun Chanthol brei thau, jalan cao tốc pambuak ban ine Phnom Penh haong ban sit Bavet, tỉnh Svay Rieng (jaik pabah mbang negar Mộc Bài, tỉnh Tây Ninh di Việt Nam) hu peih bruk padang ngak di bilan 6 thun ini. Jalan cao tốc Phnom Penh – Bavet hu pambauk ban ine Phnom Penh – Bavet, jaik taphia biên giới Việt Nam. Gah Việt Nam jeng meda brei padang ngak jalan cao tốc meng TP.HCM tal labik jaik Bavet (Campuchia). Duah gah meda ngak salah jalan ini di puac thun 2026 atau akaok thun 2027..