Di Nyaom biai Kapul rami ramik tacei jalan di Bhum Taneran kraong Cửu Long hu peih tabiak di dah page ini pak tỉnh Bạc Liêu hu khan brei thau Harak Quyết định di Thủ tướng Rajaei ka bruk dak padang Kapul rami ramik tacei jalan bhum taneran kraong Cửu Long kayua Phó Thủ tướng Rajaei Lê Minh Khái ngak akaok kapul. Kapul rami ramik tacei jalan bhum Taneran kraong Cửu Long hu bruk ngak lac rami ramik tacei jalan ka dom bruk dalam bruk yau ye dak padang, rami ramik saong peih ngak bruk Quy hoạch taneh ia dalam dom bruk hu pambuak tal, quy hoạch bhum taneran kraong Cửu Long, quy hoạch tỉnh, ban dalam bhum Taneran kraong Cửu Long tukvak 2021-2030, pamaong tal thun 2050.

Hadei di tuk hu dom urang njauk ruak đậu mùa khỉ di 2 tỉnh Đồng Nai saong Bình Dương, Mintri Y tế hu tacei pato gah y tế dom puk palei pataom tame langyah, pasang iek sruh jit, oh caik brei patuh khang ruak đậu mùa khỉ, patakik di abih dom urang ruak saong menuac metai dalam bhap bini. Ini lac bruk praong piah meng nan, taong yaom bruk ruak. Dom gah pambuak tal njauk patui jalan pasang iek pabah mbang negar, pasang iek menuac meng bhum jit mai, pasang iek dalam bhap bini tuk hu urang ruak saong dom labik karei. Bruk samar mboh urang ruak dalam bhap bini hu rik daong praong dalam bruk pacang labik, brei daok karei, plaih njaom mbak dalam bol bhap rahra.

Sở Lao động - Thương binh saong Xã hội, Tỉnh Đoàn Kiên Giang pambuak gauk bahrau peih Danak dak “melam pataom ia bilan pomi” thun 2023 ka uranaih main buo sambai Tết Trung Thu. 300 uranaih hu mbaok tame melam main Tết Trung Thu, dalam nan hu 100 adei sang biak kan kandah, adei lac sang kan kathaot, uranaih bhum bangsa takik, bhum atah biyah, hu taduan pandap yaok paok 300.000 đồng. Piah ba kein lagaih ka dom adei hu raok Tết Trung Thu bui sambai, dui pachreih hatai dom adei kham marat bac taa, dom huyen, ban, jabat, kapul nyaom, sang bac di dalam tỉnh Kiên Giang jeng peih mbang main Tết Trung Thu ka uranaih ngan haong dom bruk ngak siam, lagaih.

UBND tỉnh Tuyên Quang bahrau peih bruk taduan mek harak pok adat chat pui di urang Pà Thẻn di xã Hồng Quang, huyện Lâm Bình hu ba tame harak angan Inem krung ilamu phi vật thể pakat negar. Tal urak ini, tỉnh Tuyên Quang hu 16 inem krung hu Mintri Ilamu, Thể thao saong Du lịch ba tame Harak angan Inem krung ilamu phi vật thể pakat negar, rilo rija roya hu padang ngak veik saong hu peih ngak yaok thun, dui pachreih hu rilo bhap bini saong tuai damuai mai hu mbaok.

Dalam tỉnh Cà Mau hu 157 anek saih gaok kan kandah oh hu nao bac. UBND tỉnh Cà Mau hu pato tacei jabat chức năng hu mbaok tame ngak bruk, pasang iek yaok urang cambaih laih, hu jalan lagaih piah daong ka dom adei hu nao bac, oh caik ka anek saih halei kayua gaok kan kandah njauk padeih bac. Ong Lê Hoàng Dự, Phó Yam ndok Sở Pato magru Cà Mau brei thau, hadei di tuk hu bruk pachreih ba di kanja bhum palei, urak ini jeng daok 131 adei ka oh hu nao bac. Urak ini dom sang bac saong dom bhum palei daok patui veik nao tal yaok baoh sang, duah thau cambaih laih yaok baoh sang adei piah hu jalan daong lagaih, jak ba baoh sang saong daong ka dom adei hu nao bac.

Brei panuac di Đại hội đồng Liên Hợp Quốc, Đại sứ Triều Tiên Kim Song brei thau, taneh ia ini daok samar patagok prein pacang caga, saong hu panuac brei thau dahlau lac bán đảo Triều Tiên daok dang anak bruk mbuan hu mesruh metak hạt nhân. Tui urang ngak praong gah ngoại giao Triều Tiên, bruk daok jhak tagok di bán đảo ini mai meng dom bruk quân sự daok ngak papandik di Mỹ saong Hàn Quốc. Nan lac dom bruk pasram mesruh angan ieu lac Hala pacang tự do Ulchi, bruk tabiak mbaok Kapul Tư vấn Hạt nhân, gam haong dom panuac pandik pandoa khin lih tame quyền ngak po di Triều Tiên. Cagar veik, urang lambaok di Hàn Quốc daok di Liên Hợp Quốc Kim Sang-jin lac dom baoh panuac di gah Triều Tiên pamaong tame Hàn Quốc lac “oh njauk oh biak”.

Tapa yaok pataom bahrau hu pathau khan brei mboh, dom pandap mbang bo rahra New Zealand klak nao yaok thun lac biak praong, tagok tal labaih 3 tỷ đô la New Zealand.  Makna ngak ka pandap mbang njauk klak nao, tui pasang iek mboh hu mateh lac kayua pandap mbang khut dahlau di tuk pandar, 32% lac pandap abih tukvak dahlau di tuk pandar. Dalam tuk yaom kaom cai pandar daok tagok ngak ka rilo urang njauk trun manieng dom paok jien ka bruk blei pandap mbang, ye ini lac bruk palai pajoa biak praong.

Kapul Trăng Lưỡi liềm Đỏ I-rắc brei thau, abih tih dom menuac njauk bala pui khuah di sa ndam lakhah dalam tỉnh Nineveh melam 26/9, tagok labaih 450 urang. Dalam dom menuac njauk rambus hu yaok pluh menuac biak trak, mbuan metai. Dahlau di nan, Gah Y tế tỉnh Nineveh brei thau, takik di nyu, 100 menuac metai saong labaih 150 urang karei njauk rambus kayua pui khuah. Makna ba tal khuah lac kayua am cuh pháo bingu di gah dalam labik ngak lakhah./.