Akaok Mintri Ngak nong saong cak rok patagok palei pala bahrau patabiak Sarak parabha bruk ngak ka dom urang dalam Mban pato tacei peih ngak Danak dak “cak rok patagok khang kajap 1 trieu ha ngak padai chat luong glaong saong tathuak nerak bier pambuak haong patagok hijao bhum taneran kraong Cửu Long tal thun 2030”. Akaok Mintri Ngak nong saong patagok palei pala Lê Minh Hoan ngak Akaok Mban pato tacei. Iek tui bruk anak mata di bhum palei, 12 tinh, ban bhum Taneran kraong Cửu Long padang ngak Mban Pato tacei, kapul daong bruk peih ngak Danak dak… Gam tui di nan padang jalan ngak yaok thun saong tui yaok tukvak cambaih laih piah tui nan peih ngak Danak dak di bhum palei.

Miuyim tỉnh Ninh Thuận urak ini daok khik rilo kaya pandap sarak Cam hu yaom glaong, brei mboh ka yaok tukvak cakrok di ilamu sarak Cam meng puac abap VIII tal abap XVII. Piah patagok dom inem krung, abih di nyu lac dom kaya pandap pakat negar, tỉnh Ninh Thuận hu rilo kham merat dalam bruk ramik ngak pasiam veik dom inem mek piah khik tamo dom yaom glaong sajarah, ilamu saong mỹ thuật. Dom inem mek hu pambuak gauk jeng dom labik ravang ma-in, dui pachreih tuai mai ravang iek, duah thau. Taphia nan, Miuyim tauk QR code, ba mbuan lagaih ka tuai duah thau hu rilo jang

Festival 100 thun Li-u sáp Trà Vinh tui kuhria hu peih tabiak meng harei 25 - 31/8 (lac harei 22 - 28/7 saka ia bulan). Ini lac harei piah pok mayaom dom yaom glaong, gam tui di nan mayaih khan dom pandap meng janih baoh kayau angan je ini tabiak darak pasa dunya. Dalam tukvak peih tabiak, Festival daok pambuak haong Adit Vu lan Thắng hội huyện Cầu Kè thun 2024 ngan haong dom bruk ngak yau Harei pataom darak pablei salih; Labik pandap mbang; Harei pataom lân sư rồng, Parang iek thaot binguk ka Vu lan Thắng hội... Abih di nyu nan lac Harei pathau khan Sarak di Mintri Ilamo, Thể thao saong Du lịch ba Harei Vu lan Thắng hội huyện Cầu Kè tame angan Inem krung ilamo oh maong mboh pakat negar.

Sở Pato Megru tỉnh Đắk Lắk bahrau ba tabiak bruk pato caluai pacang caga mblung ia ka uranaih, anek saih dalam tuk padeih hè. Meng akaok thun tal ini, dalam tỉnh hu 25 anek saih metai kayua mblung ia. Piah patrun patakik bruk ini, gah pato megru hu ieu dom sang bac patagok bruk pathau khan, brei thau dom ilamu pacang caga mblung ia tal anek saih. Langiu di nan, dom sang bac pambuak bruk haong karja palei yaok pataom, pasang iek hadom danao, bingun, kraong, craoh… piah ba tabiak dom jalan pacang caga mblung ia, khik iek anek saih dalam tukvak padeih bac, padeih hè.

Urak ini, yaok adit, tỉnh Lâm Đồng hu labaih 70 urang rauk pandiak tabiak darah. Tui nan, dom urang ruak pandiak tabiak darah dalam tinh tagok 1.200 urang, tagok dua mbang dut saong tukvak ini  thun blaoh. Dalam dom urang ruak ini, hu 4 urang ruak trak saong 1 urang metai. Di huyện Di Linh hu labaih 300 urang ruak hu mboh di 47 sruh jit. Tinh daok pataom prein tame peih ngak gam gam rilo jalan langyah piah pacang caga, patakik abih dom urang njauk ruak saong metai kayua ruak pandiak tabiak darah ngak tabiak. Gam tui di nan jeng ba tabiak panuac kakei ka bruk mbuan tamuh tabiak jit ruak pandiak tabiak darah di dalam ban, ieu rahra paglaong hatai sahaneng ngak njauk tui dom jalan pacang caga jit ruak.

Mintri Y tế Hàn Quốc brei thau, hu jaik 4.000 urang ruak matai dalam tukvak tukvak meng thun 2017 tal thun 2023, hadei di tuk dom bilik cấp cứu oh taduan urang ruak kayua kurang y bác sĩ. Urang dang akaok gah salih ahrau jalan iek glang prein yava di Mintri Y tế Hàn Quốc brei thau, jaik abih dom urang ruak nan matai kayua oh hu bác sĩ halei taduan taong ruak ka urang, saong daok hu panuac lac, bruk iek glang prein yava di taneh ia daok gaok srau kadau khang di abih.

Dom dược sĩ France ba gauk padeih ngak mbang camriep kuhria dalam 10 thun tapa piah cagar veik bruk kurang jru tavao. Dom dược sĩ daok haduh hatai anak bruk dak harei dak hu rilo jru hu pablei online rilo jang saong dom urang ini jeng hu ba tabiak panuac ndok jien bilan glaong jang. Tui kuhria mboh di dom kapul pablei salih, labaih 2.000 labik pablei jru di dalam negar France kareik pabah mbang dalam 10 thun tapa. Dom công đoàn jeng haduh hatai ka jalan ba tabiak di Rajaei daong palagaih ka bruk pablei jru oh kê đơn online.

Mỹ bahrau hu sa urang bahrau njaom virus kum manuk ada H5N1 di manuac di bang Michigan. Ini lac menuac njaom kum menuac ada ka 3 di Mỹ hu pambuak tal jit kum menuac ada tamuh tabiak di dom labik praong raong lamo ia tasau dalam 3 bilan tapa. Urak ini pasak pasang iek saong pacang caga jit ruak (CDC) Mỹ oh ka mboh bruk njaom mbak virus meng menuac tapa menuac. Min jabat ini kakei dom urang taom gaok rilo haong athur njom virus, njauk peih ngak dom jalan pacang caga, dalam nan hu bruk cuk pataih pacang mbaok saong pandar pandap khik caga rup pabhap./.