Pambuak tal đáp án mon Tiếng Anh dalam mbang pakacah tamat THPT 2023, Mintri Pato magru brei thau lac 2 đáp án jeng njauk abih. Dahlau di nan, harei 3/7, Mintri pato magru  ba tabiak đáp án 14 môn pakacah trắc nghiệm di mbang pakacah tamat trung học phổ thông thun 2023. Hadei di nan, rilo urang mboh lac dalam câu 31- mã đề 401, câu 46 - mã đề 402, câu 50 - mã đề pakacah 409 hu đáp án ka oh  tantu, cambaih laih. Mintri pato magru njauk brei công nhận gam dua bruk pilih ruah B saong C piah khik kein laba ka anek saih.

Di dalam TP.HCM urak ini hu 32 labik glut jaleih takai kraong, ribaong, dalam nan hu 8 labik khang rilo, 24 labik khang mbiah ngak kan kandah tal 1.300 sang bhap bini. Urak ini, dom gah pambuak tal daok pasang iek, taong yaom dom labik daok mbuan si glut jaleih. Ong Bùi Hòa An, Phaok Yam ndok Sở jalan mbak pajeng ba TP.HCM brei thau, ban raya hu caik tabiak 150 tỷ đồng piah pacang bruk glut jaleih. Hadei di tuk pasang iek, Sở jalan mbak pajeng ba meda hu panuac ba tabiak dalam bilan ini piah samar pasiam, oh caik rah tabiak glut jaleih di dom labik daok mbuan glut jaleih.

Kapul gilai taong ikan di tỉnh Bến Tre urak ini hu jaik 3.000 sruh; dalam nan, gilai atah meng 15 mét tagok labaih 2 ribau sruh, meblah 69% gilai ikan, pachreih hu labaih 18.000 urang ngak. Piah pacang caga bruk taong cap ikan suan adat hukum, oh pathau khan saong oh hu khik ramik (IUU) dalam tukvak samar drah, dom gah chức năng hu jhul khang bruk pasang iek bruk cap mek ikan di mangaok tasik. Kapul hu brei ka 259 baoh sang mbaoh tangin tame sanya hu mbaok peih ngak Danak dak “paglaong bruk pathau khan hukum ka urang jakar, rahra di bhum tapen neger, kaoh pulao” peih dom jalan kakei bruk ngak suan peih ngak tui IUU.

Urang ngak nong tỉnh Hậu Giang daok tame bilan yuak padai Hè thu. Urak ini, padai pablei di mblang hamu yaom glaong jang meng 300-400 đồng sa kg duk haong sa adit dahlau.  Yaom lac yaom padai daok tagok hasit min padai yuak hu takik jang padai bilan Hè thu dahlau. Tui panuac khan di urang ngak nong daok pak ini, kayua tukvak jaik di ini, hu hajan praong dui atah ngak ka padai jaoh jaleih ba tal trun chất lượng saong năng suất. Meng padai yuak hu yau nan saong yaom pablei yau urak ini, urang ngak padai laba hu 20 triệu đồng sa ha dalam bilan padai Hè thu ini.

Yaok ratuh baoh sang rahra daok di bhum Cồn Phụng, xã Long Hòa, huyện Châu Thành, tỉnh Trà Vinh daok ieu daong kayua glut jaleih. Dom labik hàm ếch rahtabiak dak harei dak rilo di i Cồn Phụng. Biak rilo baoh sang njauk panduan ba nao daok di labik karei piah plaih njaik di kan kandah. Rilo meng lac mikva di Cồn Phụng jeng lac sang kan kathaot. Raidiuk kan kandah, bruk panduan ba nao daok di labik karei lac bruk kan. Tui kuhria, bruk glut jaleih tui kuhria ka oh mboh padeih. Rahra biak caong maong gah chức năng samar drah hu jalan ngak piah daong ka rahra tani tanat raidiuk.

Akaok Mintri pablei salih Mỹ hu panuac oh njauk hatai haong bruk Trung Quốc bahrau ini khan lac pasang iek bruk pablei tabiak negar langiu gallium saong germanium, dom kim loại piah ngak “chip bán dẫn” saong dom pandap điện tử karei.  Mỹ brei thau lac meda ginum biai haong dom gah pambuak bruk saong dom taneh ia ayut piah langyah bruk ini, jeng yau dak padang khang kajap dom bruk pabak brei. Dom urang ilamu gah kinh tế mboh lac, bruk ngak di Trung Quốc piah cagar veik dom kham merat di Mỹ piah pacang jalan tagok gah công nghệ di Trung Quốc. Bruk ini rah tabiak dahlau di mbang ravang Trung Quốc di akaok mintri jien padai Mỹ Janet Yellen.

Dom urang rph duah ilamo brei thau lac, harei 4/7 hu jeng harei pandiak khang abih tuk nhiệt độ tui kuhria di dunya glaong di abih tagok tal 17,18 độ C, dalam harei ka dua gam gam. Tanut nhiet do trak damak di mbang pandiak sa mbang tra pathau khan lac panuac njauk kakei ka dom kanjak jhak di biến đổi khí hậu ngan haong gah kinh tế, prein yava saong mbang ngui di rahra. Dom urang roh duah ilamo kakei lac, dom kanjak di mbang sarau kadau di langik tasik daok dak harei dak mboh cambaih laih saong meda oh trun manieng hu tal tuk khí thải sang kreih hu cakak trun abih.

Hajan praong ba tal ia sua ia dauk khang di ban Trùng Khánh, Trung Quốc, ngak brei 15 urang metai, 4 urang lahik. Trùng Khánh hu tabiak cảnh báo sambo màu kanyik katam, lac tanut glaong ka 3 dalam 4 tanut brei thau dahlau ka bruk mbuan hu ia dauk ia sua di dom baoh kraong. Dalam bilan blaoh, hajan praong di Trung Quốc, ba tal ia dauk, ia sua saong jaleih taneh. Rajaei taneh ia ini brei patagok tanut brei thau dahlau ka bala meng langik tasik saong patagok ieu kakei rahra caik hatai sangka. Thun ini, dom labik gah brak Trung Quốc hu pathau khan ka bruk ia dauk ia sua jhak di abik kuhria dalam 50 thun./.