Danak dak padang ngak jalan cao tốc Bắc – Nam gah timur vaktu 2021-2025

Di tuk brei thau pathau khan kan kathaot rilo gah thun 2021 rah tabiak tuk mesup ni di Hà Nội brei mboh lac, ngan song tanut kathaot rilo gah bahrau, hu 10 triệu urang kan kathaot hu mbang tui meng dom sarak song danak dak pakat negar di rajaei ka bruk khik ramik xã hội song patrun kan kathaot dalam tuk vak 2021-2025. Tui akaok mintri Chủ nhiệm Ủy ban bangsa Hầu A Lềnh, bruk pandar jalan duah thau kan kathaot rilo gah hu dong biak prong dalam bruk dak padang, peih ngak song dut yaok ka bruk jak jeng di sarak bangsa dalam tuk vak meng bloh.

Ndom ka bruk peih ngak danak dak padang ngak jalan cao tốc Bắc – Nam gah timur vaktu 2021-2025, cao tốc Cần Thơ – Cà Mau (labik Cần Thơ – Hậu Giang). Lambaok mBan khik ramik danak dak Mỹ Thuận brei thau, danak dak tui kuhria hu peih tabiak ngak dalam thun ini saong meda ngak salah di thun 2025. Tui kuhria mboh dahlau, jien piah bayar, piah daong tái định cư labik tapa Cần Thơ lac labaih 600 tỷ đồng. Urak ini bruk jao cọc peih taneh hu ginup abih saong caong khin ban Cần Thơ samar jao taneh njauk tukvak piah peih ngak danak dak.

TP.HCM hu 105 danak dak padang ngak, san lấp, lih mek suan adat hukum ar pacang khik ramik takai krong, ribong. Dalam nan, rilo di abih lac huyện Bình Chánh, patui di nan lac huyện Nhà Bè song ban Thủ Đức… Anak bruk ni, Sở jalan mbak pajeng ba ban raya hu panuac ieu UBND quân, huyện hu danak dak ngak suan, patagok bruk pasang iek, langyah khang ngan song dom bruk padang ngak danak dak suan adat dalam bruk lih mek hành lang khik ramik; gam song nan, jak ba bhap bini, doanh nghiệp taok talaih danak dak padang ngak lih mek dalam ar pacang khik ramik takai krong, ribong.

Pambuak tal bruk di “Tịnh thất Bồng lai”, mesup ini, jabat chức năng tỉnh Long An brei thau, amuk Lê Thu Vân – lac menuac bo gah công an daok duah, hu mai tabiak mbaok di Phường 15, quận Phú Nhuận, TP.HCM. Amuk Lê Thu Vân (ndih tapui thun 1957) njauk gah An ninh điều tra, Công an tỉnh Long An tabiak harak khởi tố bị can, piah duah thau ka duas "pagam pambak tame dom quyền tự do dân chủ lih tame kein laba di karja, quyền, kein laba njauk adat hukum di kapul nyaom, menuac urang ", tui Khoản 2, paka 331 Bộ luật hình sự thun 2015, pasiam, pabak thun 2017.

Công an xã Tân Hòa, huyện Đồng Phú, tỉnh Bình Phước brei thau, hu daa gauk gar dalam boh sang uranaih umo 7 thun tagok ngak bruk piah duah thau, ngak ka cambaih laih dom vết thương di mangaok rup kamuan. Dahlau di nan, saai T.O daok di xã Tân Hòa hu đăng thaot binguk uranaih kumei labaih 7 thun, song rilo vết thương di mangaok rup tagok blah facebook cá nhân. Tui saai T.O, beir harei 27/7, saai tapa sang di uranaih kamei dalam puk, ye mboh kamuan hu rilo vết thương di mangaok rup. Medhi lac, kamuan njauk tong paoh, saai khan ka công an. Bruk nan daok hu pasang iek, duah thau, ngak brei cambaih laih.

Urang pan akaok Triều Tiên lac Kim Jong-un bahrau hu panuac lac rajaei di Tổng thống Hàn Quốc Yoon Suk-yeol saong bol bala taneh ia ini meda dang anak bruk "lahik abih" meyah Seoul hu sa bruk ngak jhak halei. Panuac nan hu ba tabiak dalam tuk Tổng thống Hàn Quốc hu jalan ngak biak khang ngan haong dom bruk ngak di Triều Tiên, tapa dom bruk daok kuhria patagok quân sự, dalam nan hu gam bruk brei taong tame dahlau. Urang pan akaok Triều Tiên jeng ndom lac karja di ong daok caga anak bruk xung đột quân sự haong Mỹ.

Anak bruk mbuan si hu rilo jang dom urang ruak đậu mùa khỉ njom mbak dalam bhap bini tuk hu tal 44 urang njom dalam negar, harei ni, Australia brei thau ruak đậu mùa khỉ, lac ruak njom mbak trak pakat negar . Panuac khan ni hu peih tabiak jalan ka dom gah chức năng ba tabiak dom jalan pacang caga samar drah ngan saong jit ruak.

Karja bang Guerrero di Mexico brei thau, hu 9 urang metai saong 5 urang karei njauk rambus dalam bruk radaih ginuh gauk angaok sa jalan cao tốc tuk mesup ini (tui mon pak nan). Hu thau, sa sruh radaih ô tô sedan nduac samar tuk langik hajan ginuh tame gah likuk sa sruh radaih pajeng kayau, ngak brei urang peih radaih pajeng kayau blait tangin nduac tapa jalan gah daih ginuh tapak tame sa sruh radaih pajeng pandap karei. Bala nan ngak brei bruk nao mai angaok jalan nan dang veik dalam jaik 3 mon./.

Urang lang: Hani Pha & M. Phương – 28/07