Dalam nyaom biai pakat negar taong yaom bruk peih ngak Kết luận ka 01 di Mintri Chính trị mbang XIII ka bruk patui peih ngak Sarak ka 05 “Ka jhul khang bruk bac megru saong ngak tui jalan hadah krah siam mekre di Hồ Chí Minh” hu peih tabiak di dah page ini (12/6), akaok Mban Tuyên giáo Trung ương Nguyễn Trọng Nghĩa brei thau lac, yaok urang jakar, urang đảng, abih di nyu nan lac urang dang akaok pakat ủy, kanja, njauk paglaong bruk ba akaok nao dahlau, eng drei ngak, yau kreih camin hadah dalam bruk bac megru saong ngak tui Wa, pasram đạo đức cách mạng. Patui jalan ngak pasiam 3 bruk lac: bac tui Wa, ngak tui Wa saong pok mayaom dom urang jakar, urang đảng, pabak panuac ieu kakei padang ngak kapul urang jakar hu ginup phẩm chất, prein ngak bruk, angan je, dak padang Taneh ia, duh ka rahra saong bruk cak rok patagok di taneh ia dalam tukvak bahrau.

Mintri jalan mbak pajeng ba bahrau hu harak payua jabat rajaei likau neh labik tapa tỉnh Bình Phước jeng danak dak độc lập di bruk padang ngak jalan cao tốc TPHCM - Chơn Thành. Tui Mintri GTVT, bruk kaoh labik tapa tỉnh Bình Phước jeng danak dak độc lập meda lagaih jang kayua ieu pataom hu prein khang di puk palei, mbuan dalam bruk peih mbaok taneh, tái định cư saong lagaih jang dalam bruk pabak vật liệu, pandap piah ngak. Daok phun jien piah peih ngak danak dak, Mintri GTVT ndom lac, Mintri Kế hoạch saong đầu tư pachreih tui pathau khan di Rajaei ka bruk ramik caga jaik 5.000 tỷ đồng brei ka taong abih danak dak jalan cao tốc TPHCM - Chơn Thành, dalam nan hu 1.000 tỷ đồng daong brei ka labaih 7 km labik nao tapa tỉnh Bình Phước.

Dahlau deih oh hu jalan nding raok ia hacih, mikva Cam saong Raglai di rilo bhum palei dalam tỉnh Ninh Thuận njauk pandar ia meng kraong, ribaong, binek piah pandar, piah ngak mbang huak. Thau lac bruk pabak ia hacih saong saat puk palei lac bruk praong, Ninh Thuận hu jak ba, pablak tame dom phun jien piah pasiam veik, peih praong dom danak dak pabak ia puk palei hu prein meng 3.000-8.000m3 sa harei melam. Dom danak dak ini hu padang ngak jaik dom danak dak thủy lợi atau kraong ribaong praong piah tani tanat ia dalam bilan thu.

Urak ini yaom baoh ada di tỉnh Đồng Tháp daok tagok glaong. Yaom baoh ada hu urang blei salih blei di mblang hamu meng 3.100 - 3.400 đồng sa baoh, glaong jang dom bilan akaok thun meng 1.200 - 1.500 đồng sa baoh, tui nan, urang raong laba hu labaih 1.500 đồng sa baoh. Yaom baoh tagok glaong lac kayua mikva yuak blaoh padai bilan Đông Xuân, nan ye tapon ada baoh palao langiu hamu hu ba mai kreik dalam var ro ngak ka năng suất baoh trun. Đồng Tháp hu tapon ada abih tih labaih 7 triệu drei, huyện Tháp Mười saong Tam Nông hu pilih ruah ngak labik raong ada baoh. Mikva raong ada palao langiu mblang hamu dalam yaok 1.000 drei yaok malam baoh hu 500-800 baoh.

UBND tỉnh Vĩnh Long bahrau tabiak bruk samar drah di bruk glut jaleih di xã Phú Đức, huyện Long Hồ. Dahlau di nan, di dah page harei 9/6, di puk Phú An, xã Phú Đức rahtabiak bruk glut jaleih takai kraong atah labaih 150 m, mbang dalam tame mbaok haluk meng 4 - 7 m. Glut jaleih ngak ka jalan oh nao mai hu, ngak kan kandah tal bruk ngak saong nao mai di 23 baoh sang, ngak ka 8 baoh sang hu dom labik pacah ra-ai tabiak, glut tame dalam. Dalam dom harei tapa, dom urang pan akaok dom pakat dalam tinh hu mai tal labik glut jaleih daong ka rahra pasiam bruk glut jaleih, dom urang ngak pahla hu brei jien, pandap mbang daong ka dom baoh sang njauk kan kandah. Ini lac bruk glut jaleih ngak lahik biak rilo taneh pala drak saong taneh daok di dom baoh sang rahta saong daok mbuan glut jaleih dalam tukvak anak tal.

Thái Lan hu peih bruk pasang iek phiếu veik ngan saong 47 labik buh phiếu di 16 tỉnh, ban hadei di mbang pilih ruah harei 14/5 meng blaoh, saong mboh lac oh hu salih karei hagait duk haong bruk pasang iek hu khan brei thau di harei 15/5. Dahlau di nan, UB Bầu cử Thái Lan hu panuac ieu pasang iek phiếu veik di 47 labik buh phiếu dalam taneh ia hadei di tuk mboh dom phiếu bầu dalam mbang pilih ruah harei 14/5 nyu labaih kurang jang dom menuac hu mbaok buh phiếu.

Gah jalan mbak pajeng ba công cộng Jakarta – Indonesia brei yah klaak bruk ieu cuk pataik pacang mbaok di dom sruh radaih pajeng rilo manuac. Dom tuai mboh prein yava khang kadang, oh mbuan njom mbak ruak atau njom COVID-19 hu brei taoh pataih pacang mbaok tabiak di dom sruh radaih hu rilo manuac. Daok dom urang mboh glaih glar dalam rup atau meda mbuan njauk njom ruak COVID-19, jeng njauk cuk pataik pacang mbaok. Urak dom urang njom ruak COVID-19 di Indonesia tui kuhria mboh trun dalam mateh thun ini.

Mỹ Latin daok dang anak bruk prein yava tâm thần kayua jit praong COVID-19. Dalam nan, dom bruk mai meng lahik bruk ngak, lahik gauk gar saong drap ar, srau kadau gah kinh tế daok ngak ka rilo urang praong duh hatai khang, ba tal dom bruk prein yava tâm thần biak trak damak. Roh duah bahrau ini di UB pakat glaong ka prein yava tâm thần hadei di COVID-19 brei mboh lac, duh hatai lac bruk hu rilo, ngak kan kandah tal labaih 20% menuac sia dalam bhum. Ini jeng lac makna ba tal bruk urang pametai rup eng tagok 7%, dalam tuk bruk ini di dunya dak harei dak trun./.