Hu mbaok saong brei panuac di Nyaom ndem biai haong doanh nghiep ka bruk pacang khuah padam apui, kong nghiep hoa, siam mekre, salamat saong salih pandar taka so piah ngak brei cakrok patagok kinh te-xa hoi di taneh ia peih ngak di page ini di TPHCM, Thu tuong Phạm Minh Chính mboh lac: Bruk pacang khuah, padam apui, daong urang gaok bala, tukvak tapa mek hu rilo bruk praong. Yau nan min, njauk brei mong gilac veik, langyah dom bruk piah ngak siam jang bruk pacang khuah padam apui. Gam haong nan dak padang ilamo pacang khuah, padam khuah; paglong bruk daong duah urang gaok bala dalam bhap bini.

Meng akaok thun mbiah tal ini, dalam tinh Vĩnh Long ba jaik 4.300 urang nao ngak bruk negar langiu tui harak pambuak bruk. Kham merat dalam thun ini ba hu 5.100 urang negar langiu ngak bruk tui harak pambuak bruk. Piah ngak hu bruk nan, Vĩnh Long pataom tame pathau khan, pato pakai paglong urang ngak bruk, daong phun jien mesre…daong urang duah hu bruk ngak lagaih saong siam jang. Urak ini, jien bilan di urang nao ngak bruk negar langiu hu meng 25 tal labaih 40 trieu dong sa bilan.

Urang ngak nong tinh Dong Thap daok tame bilan yuak padai he thu min takik bui sambai kayua takik hu padai saong yaom pablei biar. Dut saong tukvak ni saong akok bilan he thu, yaom padai trun labaih 300 dong sa kilo. Njauk ndem tal lac padai di dom bhum pataba ia mbak Go Cong di tinh Dong Thap yuak hu ala 5 tấn sa hecta yau nan ye  urang ngak nong oh hu laba labaih.

Mbiah tal ini, TPHCM daok veik 10 labik mbuan rah tabiak bala angaok jalan mbak, ralo pataom di bhum pasak. TPHCM  jeng hu 42 labik mbuan gal jalan, dalam nan hu 23 labik di pasak ban raya. Tui So Padang ngak, TPHCM daok dang anak dom bruk kan kandah langyah catang dom labik mbuan rah tabiak bala, dom labik mbuan gal jalan saong urang metai kayua gaok bala angaok jalan mbak parilo.

Kapol chu thap do ban Can Tho daok pataom tame jhul khang bruk dakwak ar khar, jak ba urang jakar, cong chuc, vien chuc, urang ngak bruk halan hatian brei darah. Kuhria rah tapa yaok harei Sang iek ruak Huyet hoc - Tame darah Cần Thơ brei tabiak labaih 500 don vi darah, sumu 3.500 - 4.000 don vi darah sa adit labaih 70 labik iek ruak di bhum Taneran kraong Cuu Long. Yau nan min, darah khik piah di Sang iek ruak daok takik.

Rajaei Thai Lan mbaok tangin sarak yaom jien labaih 40 ti Baht sumu labaih 1,25 ti USD piah daong labaih 4 trieu 600 ribau baoh sang urang ngak hamu padai. Dom jabat daok pambuak haong dom urang ngak padai, piah daong salih tapa ngak dom padai pajaih brei rilo asar siam saong lagaih haong bruk urang caong blei. Rajaei Thai Lan brei takik veik dom jalan daong yaom padai brah saong kuhria tal bruk padeih daong yaom kaom dalam 10 thun anak tal.

Rajaei Brazil birau khan brei thau dom jalan daong ka dom doanh nghiep gaok kan kandah kayua My tagok jien je ndap nda pablei tame tal 50%. Tui nan, paok jien daong yaom 30 ti real, sumu 5 ty 560 trieu dola My kuhria gam dom jien mesre laba lap, jien je biar saong rilo sarak karei, brei daong dahlau ka doanh nghiep sit saong dom don vi blei tame kaya mbang mbuan khut khat.

Gah daong bala Italia srong hu 20 urang metai saong daok duah veik. kuhria hu labaih 70 - 80 urang daok diuk, min rilo urang karei daok lahik kayua gilai pajeng 97 urang tableih trun tathik labik atah Lampedusa labaih 22 km. Kuhria meng akaok thun mbiah tal ini hu 675 urang metai di jalan pasak tame Địa Trung Hải. Kuhria tal harei 13/8, taneh ia ini taduan labaih 38.000 urang mai tapa truh./.