Di Nyaom biai ilamo ka “Jalan khik ramik, patagok dom yaom glaong ilamo, ba jalan ngak mbang khang kajap ka urang kan kathaot saong mikva Khmer bhum ĐBSCL” bahrau hu peih tabiak di ban Cần Thơ, lambaok ka dom viện, sang bac, UBMT negar Việt Nam saong Mban bangsa dom tỉnh, ban dalam bhum ĐBSCL hu ginum biai piah duah tabiak jalan ngak mbang khang kajap dalam bhum mikva Khmer. Sa dalam dom cuang kandah hu ndem mayai nao mai rilo abih nan lac bruk pathau khan dom jalan ngak di Đảng saong sarak, hukum di Kanja piah paglaong hatai sahaneng tự lực, tự cường, patak pataom, jhul khang bruk ngak mbang dalam bhum mikva Khmer. Bruk ngak ini yaom lac mboh salih bahrau min ka oh pabak hu bruk ba tabiak. Rilo baoh sang daok pagam pambak tame bruk daong di Kanja, oh kham marat ngak mbang nan ye kan tabiak truh kan kathaot.

Meng akaok thun tal ini, tỉnh Gia Lai hu 3.160 urang njauk ruak pandiak tabiak darah, dalam nan hu 1 urang metai kayua pandiak tabiak darah/Dengue trak. Dalam tỉnh Gia Lai urak ini daok hu 174 sruh jit pandiak tabiak darah oh ka pacang cakak hu. Piah patrun patakik di abih dom urang ruak trak tagok, brei hu bruk ba tangin tame ngak khang di karja dom pakat, gah y tế, dom kapul nyaom chính trị - xã hội piah ba tabiak ngak dom bruk pacang caga pandiak tabiak darah, oh caik ka jit tamuh tabiak saong pambak praong.

UBND tỉnh Đồng Tháp bahrau peih bruk jao mỏ cuah di kraong Tiền pak xã An Nhơn, huyện Châu Thành ka Tổng Công ty Padang ngak ka 1 dang tapak ngak harak adat peih ngak pabak ka bruk padang ngak jalan nduac samar Cần Thơ – Hậu Giang saong Hậu Giang – Cà Mau. Ini lac mỏ cuah camriep hu Đồng Tháp jao ka po thầu ngak tui jalan sarak di Quốc hội saong Sarak di Rajaei. Mban Khik ramik danak dak, dom po thầu saong dom kapul hu pambuak tal daok samar drah ngak salah dom adat tui njauk adat dalam bilan 9 ini ngan haong 4 mỏ cuah daok gilac kayua tỉnh Đồng Tháp yaih khan. Di bhum ĐBSCL daok peih ngak 4 danak dak jalan nduac samar pasak, atah abih tih 355km, caong pandar cuah tuh mblang taneh lac labaih 53 triệu m3.

Durian daok lac phun pala ba jien tame glaong ka urang pala dalam tỉnh Bình Phước. Tui Sở ngak nong saong patagok palei pala Bình Phước, dalam tỉnh urak ini hu labaih 5.300ha pala durian, yaok thun paik hu 14.850 tấn. Tỉnh hu 31 bruk pambuak gauk dalam pala durian, dalam nan hu 20 doanh nghiệp baoh kayau hu mbaok tame pambuak gauk padang ngak mã số bhum pala di tỉnh. Urak ini, bruk pasang iek, khik ramik mã số duh ka bruk pablei tabiak negar langiu hu tỉnh Bình Phước peih ngak 6 bilan sa mbang saong hu pathau khan mai Cục Khik caga phun pala, piah khan brei taneh ia blei tame thau, piah khik ramik mã số bhum pala saong labik tame paok. 95% baoh durian that di Bình Phước hu pablei tapa Trung Quốc, daok veik hu pablei dalam taneh ia. 

Trà Cú lac huyen kan kandah, lac labik hu rilo urang bangsa Khmer daok di tỉnh Trà Vinh. Meng sa huyen kan kathaot, hu buh jien tame, daong dom sarak bangsa, yau ye Danak dak 135, Danak dak 134 saong dom danak dak bruk ngak negar karei, nan ye tal akaok thun ini, huyen hu abih tih 15 dalam 15 xa mek hu tanut chuan palei pala bahrau. Huyen daok pataom tame paglaong chat luong saong khik kajap dom asal kadha mek hu, dalam nan brei ngak dahlau di abih bruk daong mbang ngui piah tani tanat bruk ngak, patrun kan kathaot khang kajap ka mikva. Kayua jalan ngak parilo dom bruk mbang ngui, gam haong dom sarak daong ba, ba kein lagaih piah ka mikva Khmer nan ye rahra pak huyện Trà Cú pasiam veik jien mek tame biak rilo, dom baoh sang kan kathaot di thun 2022, trun labaih 6,8%, tagok 3,32% dut saong jalan ba tabiak.

Sa bruk parang iek pakat dunya ka ilamu công nghệ mbang camereip hu peih tabiak di Rio de Janeiro di Braxin. Labaih 70 kadha pambuak gauk di ilamu saong công nghệ dui pachreih hu yaok ratuh menuac mao maong iek pak di dalam harei peih mbaok. Dom kadha hu parang tabiak yau mac định hình dom talei rohim, pui hadah piah langyah bruk vật lý lượng tử atau robot hu pagam tal bruk megei nao  mai di anek menuac… Parang iek dui pachreih hu menuac sia meng dom công nghệ thực tế ảo, dom kadha di trí tuệ nhân tạo, hoạt hình, kadha me-in nghệ thuật atau video.

Kadha daoh ngan haong asal kadha "Slow Dancing" hu samar drah tame dalam bảng xếp hạng Billboard Hot 100 saong taduan hu panuac taong yaom siam gheih di urang pang. Tui nan, Slow Dancing di V – lac urang dalam nyaom BTS – hu tabiak mbaok dang kajap di labik ka 51. Ini lac sa labik dang biak siam gheih ngan haong sa solo K-Pop. Anak mata, lac sa urang dalam kapul nyaom BTS, V oh daok lac angan oh daok atah di mangaok Labik dak padang biak angan je ini. Ini lac kadha daoh hu labik dang glaong abih di saai. Dahlau di nan, V bhian mek hu labik dang ka 79 di mangaok labik dang di Billboard Hot 100 ngan haong kadha Christmas Tree. Meng jak jeng bahrau ini, Slow Dancing di V oh lac mek hu dom jak jeng saong kỉ lục di Hàn Quốc bo daok hu dom bruk biak siam njauk caik hatai di mangaok darak pasa ragu ragam dunya.

Tui dom jabat ngak tui adat hukum di Kosovo, dom jien xu 2 euro ja daok hu pandar daok tagok khang dalam thun ini. Urang gah adat hukum hu pasang iek, mboh labaih 30.000 đồng xu 2 euro ja dalam 6 bilan akaok thun ini, tagok jaik 7 mbang duk haong thun blaoh. Jien xu ja di Kosovo dahlau daih mbuan thau kayua oh hu từ tính min urak ini, jien xu ja trak yau jien biak. Di bilan 4, cảnh sát Kosovo hu cap mek sa urang likei saong sa urang kumei daok ba tui 10.600 đồng xu 2 euro ja meng Bắc Macedonia tame Kosovo./.