Page ini 25/4, Mentri Ngak nong saong Patagok palei pala pambuak haong Mentri Ilamu saong Cong nghe peih nyaom biai “Jalan cak rok patagok suai lavik ilamu, cong nghe saong salih birau gah ngak Nong saong Patagok palei pala tal thun 2030, pamong tal thun 2050”. Dalam dom thun tapa, ilamu cong nghe rik tame labaih 35% yaom patagok di gah ngak nong meng bruk roh duah, jao brei ilamu ba tame ngak tui dom pajaih phun pala, athur raong; pajaih phun glai; pajaih padai, pajaih phun mbang baoh saong dom jalan ngak iek, jalan pala, raong glang pajaih birau…pabak brei saong pabak prein khang piah cak rok patagok dom gah ngak nong.

Peih ngak danak dak bruk ngak negar patrun kathaot khang kajap thun ini, tỉnh Bình Thuận ba tabiak bruk patrun kathaot 0,52% sang kathaot dalam tỉnh saong khik ka urang kathaot hu mbang tui dom sarak daong pasiam raidiuk, hu pandar siam jang dom dịch vụ xã hội. Piah ngak hu bruk ini, tỉnh Bình Thuận ieu dom urang dalam mBan tacei pato dom danak dak bruk ngak negar di tỉnh brei thau lac, bruk patruh eik patrun kathaot lac asal kadha praong dalam danak dak, jalan ngak patagok KTXH di dom pakat. Meng nan pamedeih tagok hatai khin yam tagok di urang kan kathaot, pandar hu siam dom sarak, prein daong di karja, di bhap bini piah patagok KT sang, yam tagok tabiak truh kan kathaot khang kajap

Piah duh ka bruk nao mai di bhap bini saong radaih pajeng ba dalam 5 harei padeih Pacit da-a Po Hung, 30/4 saong 1/5, Kong ty cổ phần Phà An Giang brei 36 sruh phà praong hu prein pajeng meng 30 tấn tal 200 tấn piah pajeng tuai, radaih tapa kraong Tiền, kraong Hậu di 8 tapen kraong dalam tỉnh. Abih di nyu , Kong ty cổ phần Phà An Giang hu iew dom xí nghiệp phà brei caik hatai parabha brei lagaih bruk tagok saong trun kapal gilai, khik brei siam lagiah ka tuai tapa kapal gilai. Tacei pato saong peih ngak dom jalan khik kajap bruk pacang caga jit ruak COVID-19 tui tacei ba di gah ye te.

Tui Sở Y tế TP.HCM, meng dom mẫu ruak pasang iek anek ruak COVID-19 dalam bhap bini di Pasak pasang iek ruak kik (HCDC) saong Viện Pasteur, hu mboh dom mẫu karei, lac: XBB.1.9.1, XBB.1.16 saong XBB.1.16.1. Ini lac mbang camereip abih TP.HCM hu mboh 3 janih anek ruak bahrau ini. Daok anek ruak XBB.1.9.1 hu mboh di Hà Nội adit dahlau. Yau nan, 2 janih anek ruak XBB.1.16 saong XBB1.16.1 bahrau hu mbaok di Việt Nam. Sở Y tế TP.HCM kakei bhap bini pambuak haong karja dom pakat dalam bruk khik caga menuac mbuan njaom ruak  bahrau hu peih tabiak ngak veik, khik ramik 2 bruk lac cuk pataih pacang mbaok saong khử khuẩn haong klauk vaccine piah pacang caga COVID.

Hajan khang gam hangin gaving di melam 24/4 di tỉnh Tiền Ginag ngak khat lahik trak drap ar di bhap bini. Dalam nan hu 83 baoh sang glut jaleih saong par tabung, jaleih rilo phun mbang baoh, got điện…Tui kuhria tuk camereip, khat lahik labaih 1,6 tỷ đồng. Meng akaok thun tal ini di Tiền Giang hu 6 mbang hangin gaving ngak khut 179 baoh sang, jaoh jaleih labaih 14.560 phun mbang baoh, kuhria abih tih khat lahik labaih 14 tỷ đồng. Ong Võ Văn Thông, Yam ndoc Đài Khí tượng thủy văn Tiền Giang khan lac, meng kaok bilan 5 tal lac tame bilan hajan, dom mbang hajan akaok bilan gam hang hangin gaving, ja kla klak, nan ye bhap bini brei khik caga, plaih khat lahik.

Rajaei Campuchia bahrau ndom veik bruk khang hatai palahik ruak pandiak dom di thun 2025 meng bruk brei tagok dom jien buh tame ngak, dom pandap ngak, jalan ngak saong sanya ngak. Thủ tướng Hun Sen brei thau, meng thun 2016 tal urak ini, Campuchia oh hu urang halei cagar veik haong jru vaccine pandiak dom, saong meng thun 2018 tal ini, Campuchia oh hu urang halei metai kayua ruak pandiak dom. Gam haong nan, urang njaom ruak pandiak dom jeng trun, thun 2011, taneh ia ini hu jaik 110.000 urang ruak saong tal thun 2022, tok daok labaih 4 000 urang min.

Mỹ hu panuac caong Hàn Quốc tabiak panuac iew dom labik ngak chip di taneh ia ini oh patagok chip pablei ka Trung Quốc dalam tuk Bắc Kinh kurang kayua adat pakauk bruk ngak tabiak chip Micron di Mỹ. Mỹ ba tabiak panuac caong nan ngan haong Han Quoc dalam tuk Tổng thống Hàn Quốc Yoon Suk-yeol hu mbang ravang pakat karja tal My. Dahlau di nan, bilan 3 meng blaoh, Jabat khik iek khong gian mạng Trung Quốc brei thau, meda peih bruk taong yaom an ninh mạng ngan haong dom pandap hu Micron pablei di taneh ia ini.

Nam Phi daok caga brei to yaom trang trại raong tê giác praong abih di dunya. Ini lac trang trại hu khik caga catang, lac labik hu jaik 2.000 drei tê giác patih phương Nam – janih tê giác njauk urang man pateok tal jaik lahik abih di puac abap 19, min daok hu siam veik meng kham merat pabam pajaih saong khik caga dalam yaok pluh thun. Po di trang trại brei thau, harei hadei di tê giác dalam labik raong ini, pagam pambak tame bruk to yaom. Meyah bruk to yaom oh jeng, danak dak meda brei klaak, ba tal bruk tê giác patih phương Nam dang anak bruk mbuan lahik abih. Rajaei Nam Phi kuhria mboh lac thun 2022, taneh ia ini hu 448 athur quý hiếm njauk urang pametai yaom lac dom mblang bein negar hu patagok bruk khik iek.