Nyaom biai ndom biai nao mai di Thủ tướng Rajaei haong dam dara thun 2023 meda hu peih tabiak di harei 26/3 anak tal, di Jabat Rajaei. Nyaom biai meda ndem mayai nao mai ka bruk peih ngak dom jalan ngak, sarak saong dom adat hukum ngan haong dam dara; bruk ngak di dom jabat, kapul pambuak tal quyen saong kein lagaih tui njauk adat di dam dara; dom asal kadha di thẩm quyền atau bruk ngak hu pathau khan haong jabat hu thẩm quyền lang yah dom caong khin di dam dara; bruk ngak di dam dara dalam bac magru, ngak bruk,  pato pasram, hu mbaok tame cak rok patagok kinh tế-xã hội saong khik caga taneh ia; dom caong khin karei di dam dara.

Thun ini, tỉnh An Giang kham merat hu gilac 8 xã mek hu angan xã palei pala bahrau saong 8 xã mek hu angan xã palei pala bahrau paglaong. Jien mek tame kuhria rah tapa bhum palei pala di dom xã palei pala bahrau hu 53 triệu đồng sa urang sa thun, tanut trun kathaot rilo gah trun meng 1 - 1,2% sa thun. Piah ngak hu yau nan, tỉnh An Giang daok brei jhul khang bruk pathau khan ka padang ngak palei pala bahrau lagaih haong yaok tukvak, peih ngak praong dalam saong siam lagaih bruk pakacah gauk padang ngak palei pala bharau piah pok meyaom, pachreih ba kapul nyaom, menuac urang, ngak brei pambak praong dalam bol bhap rahra, dalam puk paga

Tỉnh Sóc Trăng bahrau Peih pakah Harei pataom mbao Xuân sak tapai thun 2023 ngan haong kadha: uan Đảng, uan Xuân sak tapai 2023. Harei pataom mbao xuân hu dom bruk ngak, yau ye parang iek dom ấn phẩm báo chí Xuân sak tapai di tỉnh saong dalam taneh ia; Parang iek thaot binguk, thaot báo chí dom jak jeng, kinh tế, chính trị, ilamo, xã hội, an ninh quốc phòng; Vak iek saong parang iek thư pháp… Harei pataom mbao Xuân thun ini hu peih tabiak dalam tuk rahra daok chreih chrai anak dom jak jeng di thun 2022 dalam bruk cak rok patagok kinh tế - xã hội, tani tanat quốc phòng - an ninh, dak padang Đảng, padang hệ thống chính trị saong daok ba tabiak danak dak pacacah gauk peih ngak bruk ngak di thun 2023.

Dom urang ngak, tame ngak bruk dalam harei akaok thun di TPHCM meblah 95%. Tapa pasang iek di Sở Lao động, Thương binh saong Xã hội ban raya, hu 499 doanh nghiệp caong pilih ruah dalam quý 1 ini labaih 14.300 lao động, dalam nan caong hu rilo abih lac gah jhik, gah ngak takhaok ngan haong 5.000 urang. Dalam bilan 2 ini, pasak dịch vụ bruk ngak dam dara pambuak haong dom jabat dalam ban meda peih danak dak Daong prein urang ngak piah pambuak urang ngak di dom tỉnh. 

Tui yaok pataom meng Tổng Cục du lịch, Bà Rịa-Vũng Tàu lac tinh dang ka 2 hadei di TP.HCM ka bruk taduan raok rilo tuai dalam tuk Tết Nguyên đán thun sak tapai ngan haong labaih 669.000 mbang tuai. Tui Sở Du lịch tỉnh, hu yau nan, lac meng hu bruk kuhria caga dahlau piah raok tuai hu dom puk palei dalam tỉnh saong dom doanh nghiệp du lịch peih ngak siam. Tui kuhria hadei di mbang padeih Tết, tuai meda mai Bà Rịa - Vũng Tàu ma-in xuân, pambuak haong nao ravang dom labik tâm linh, caong hu salamat, siam makre dalam thun bahrau.

Tui pathau khan bharau abih di Gah Hacih mbong patih dunya, Hungary hu maong lac taneh ia hu bruk tham nhũng abih dalam 27 taneh ia di Liên minh Châu Âu dalam thun 2022. Bulgaria saong Romania dang patui di nan dalam bảng xếp hạng. Roh duah di Gah Hacih mbong patih dunya jeng brei thau, top 3 taneh ia takik tham nhũng abih di Liên minh châu Âu lac Đan Mạch ngan haong 90 điểm, patui di nan, lac Phần Lan saong Thụy Điển.

Rajaei Mỹ hu khan brei thau ka tukvak padeih bruk samar drah ka COVID-19, hadei di jaik 3 thun taneh ia ini pandar dom jalan ngak pacang caga jit biak catang piah patakik bruk njom mbak di jit ruak. Bruk samar drah di taneh ia saong di prein yava di rahra kayua COVID-19 hu kanja Mỹ ba tabiak mbang camriep di thun 2020. Bruk samar drah nan hu rilo mbang brei dui atah jang saong tui kuhria meda tamat dalam dom bilan anak tal. Nhà Trắng brei thau lac, bruk samar drah ka COVID-19 meda brei dui atah sa mbang tra tal harei 11/5 saong hadei di nan meda padeih abih.

Lambaok Liên Hiệp Quốc ka urang tị nạn, gam haong 41 kapul nyaom pambuak bruk dunya saong dalam taneh ia, hu panuac ieu rik pataom 556 triệu đô la Mỹ piah daong ka dom urang tị nạn di Sudan. Yaom jien nan, piah daong ka labaih 900 rabau urang tị nạn di Sudan.  Urak ini Sudan lac taneh ia tị nạn praong ka 2 di châu Phi, tuk taduan labaih 1 triệu urang tị nạn saong menuac likau tị nạn./.