Nyaom biai Nghị sĩ ranaih di dunya mbang ka 9 kayua Quoc hoi Viet Nam peih ngak  meng harei 14 tal harei 17/9, di Ban ine Hà Nội, hu mbaok di yaok rituh nghị sĩ ranaih  mai meng 173 taneh ia. Bruk dang tabiak peih ngak Nyaom biai  Nghị sĩ ranaih dunya mbang 9 lac bruk hu makna praong piah Quoc hoi Việt Nam patui veik brei mboh bruk ngak di drei ngan hoang bhap bini dunya; patagok bruk ngak di dom nghị sĩ ranaih, dam dara, rik tame bruk langyah dom kadha ngak kan kandah di dunya saong peih ngak Danak dak Nghị sự 2030 di LHQ ka bruk cak rok patagok khang kajap. Mbiah tal tukvak ini, QHVN caga blaoh blai ka Nyaom biai  Nghị sĩ uranaih dunya mbang 9. Ini lac piah yaih khan pambak praong tal ayut sahabat di dunya ka ilamu meng lavik mai di taneh ia, anek manuac, sarak pambuak bruk haong negar langiu jeng yau bruk jak jeng cakrok patagok kinh te - xã hội di Viet Nam.

Tổng Công ty Tân cảng Sài Gòn bahrau taduan daong raong 5 anek saih lac anek di urang taong ikan sang biak kan kandah di dom huyện Châu Thành, Ba Tri saong Bình Đại, tỉnh Bến Tre haong yaom daong 500.000 đồng sa bilan sa kamuan tal tuk dom kamuan bak 18 thun. Langiu di nan, yaok kamuan daok hu alin radaih juak saong 2 triệu đồng meng Công ty Hoa tiêu Tân Cảng saong Công ty Cổ phần pajeng ba thủy Tân Cảng. langiu di nan, Tổng Công ty Tân cảng Sài Gòn jeng hu daong ka tỉnh Bến Tre 160 triệu đồng piah padang ngak dua baoh sang anit ranam ka sang sarak kanja; jao 50 paok pandap ka 50 sang urang taong ikan gaok kan kandah, yaok paok yaom 1 triệu đồng.

Tui UB bhap bini tỉnh Bình Phước, thun 2022 bala meng langik tasik ngak khut khat dalam tỉnh labaih 17 tỷ đồng. Ta-eng bilan 8 meng blaoh, khat lahik  kayua bala meng langik  labaih 19 tỷ đồng. Urak ini, dalam tỉnh hu 62 binek ia praong sit, hu padang ngak meng 15 -20 thun ini mai, yau nan mbuan talah rah tabiak bala. Abih di nyu, dalam dom harei tapa, jalan ĐT 755 B atah 33,6 km lac jalan sa ta-eng pambuak dua tỉnh Bình Phước saong Lâm Đồng njuak glut jaleih trak. Rilo labik talah taluy gah ala lih tame mbaok jalan, ba tal bala ka urang nao mai ngaok jalan. Yau nan min, Bình Phước oh ka hu jien piah pasiam veik ka dom danak dak binek ia khut tayah nan.

Ndom ka bruk uranaih umo 4 thun njauk sa urang dam bhik trun kraong Rạch Giá, ban Long Xuyên, tỉnh An Giang harei 11/9 meng blaoh, Akaok UBND tỉnh An Giang Nguyễn Thanh Bình hu alin harak pok mayaom ka dua anek ame saai Bùi Hữu Thành saong Bùi Ngọc Thọ ngak bruk pajeng ghe gilai padai hu chat trun kraong daong sraong hu kamuan. UBND ban Long Xuyên jeng hu brei harak mayaom kayua bruk ngak oh huac matai lahik di dua anek ame ong Thọ saong saai Thành. Dom kapul nyaom, manuac urang hu dom bruk ngak gheih dalam bruk samar drah pagui mek urang bhik uranaih trun kraong jeng hu Công an tỉnh An Giang pok mayaom. 

Công an huyện Bình Chánh, Ban raya HCM daok pasang iek ngak brei cambaic laic bruk dua uranaih likei mblung ia metai di xã Vĩnh Lộc B. Dua urang likei umo 15 thun saong 6 thun, anek di sa-ai Lê Thị Cum Bọ (umo 40 thun, palei daok di Tây Ninh). Dahlau di nan, biar harei 11/9, dua diuk pasang sa-ai Bọ tagok huyện Bình Chánh ngak harak gal. Mbiah tal jiak mong 6 biar harei sup, sa-ai iew phone mai ka anek likei kacua yaok pluh mbang oh mboh pang. Haduh hatai, sa-ai iew urang daok jaik nan tapa sang iek ye mboh dua thong dép caik di ar hlung danao. Taduan hu panuac khan, Công an huyện Bình Chánh mai njuk ia duah mboh rup tau dua kamuan ala ia di melam nan. Hu thau, dom bilan dahlau sa-ai Bọ jeng lahik anek 2 thun kayua , mblung ia danao jaik sang.

Campuchia oh hu jalan padang ngak binek thủy điện di kraong Mekong piah patrun dom kan kandah kayua bala meng langik tasik saong ngak jhak tal alam môi trường. Tui Mintri Mỏ saong Năng lượng Campuchia, dua bhum di mangaok jalan ia nduac khang di kraong Mekong di tỉnh Kratie, tỉnh Stung Treng hu ginup lagaih piah padang ngak sang mac thủy điện hu prein khang meng 800 - 1.000 MW piah pabak ka bruk pandar điện cak rok patagok kinh tế - xã hội di taneh ia.

Mentri Nội vụ Ma-rốc brei thau, abih tih urang metai saong njauk rambus dalam mbang megei baoh taneh  rah tabiak di melam 8/9 di taneh ia ini tagok tal labaih 8.400 urang, dalam nan hu 2.901 urang metai,  saong labaih 5.500 urang njauk rambuac. Ta-eng bhum AL Haouz hu labaih 1.700 urang metai. Urak ini, bruk daong daok peih ngak samar, gam gam hu mbaok yaok pluh  ribau urang lin, lin padam apui, dân phòng, urang halain hatian, gam haong dom urang daong mai meng dom taneh ia di dunya. Yau nan min, daok hu ralo palei saong bhap bini daok dalam dom labik tapen daning ceik atau di dom ceik glong, oh ka nao tame hu meng jalan radaih.

Kapul Chữ thập Đỏ saong Trăng lưỡi liềm Đỏ dunya brei thau lac, metai lahik dalam mbang ia sua biak trak damak di ban Derna pak Liby meda daok tagok khang, tuk daok hu tal labaih 10.000 urang daok lahik. Urak ini, takik di nyu 2.000 urang metai. Dom urang jakar brei thau lac, dom mbang hajan khang di Derna nyu ngak ka dom binek khut talah, palai pajoa sang danaok saong jalan mbak. Ia sua dui theik nao abih tih labik rahra daok di Derna, lac labik bo kanja hu tabiak panuac lac bhum njauk bala khang. Rilo taneh ia di dunya hu payua pandap daong tal Liby./.