Dang akaok nyaom biai online dalam negar ka peih bruk rami ramik đơn vị hành chính pakat huyện, pakat xã tukvak 2023 – 2030 rah tabiak dah page ini (31/7) di Hà Nội, Thủ tướng Phạm Minh Chính ndom lac, dalam xaman halei, kol drei jeng rami ramik, padang kanja lagaih haong bruk daok rahtabiak di anak mata. Ini lac bruk kan, bruk nhạy cảm, pambuak tal rilo menuac, pambak tal bruk ngak di rahra. Min, kol drei oh lac oh ngak kayua kanja daok tavak tavaiy, daok kateik angaok gauk, oh lagaih haong bruk di anak mata. Bruk cak rok patagok, bruk di taneh ia salih bahrau, kayua yau nan ye kanja njauk salih bahrau. Tui Mintri Nội vụ, urak ini dalam taneh ia peih bruk rami ramik 21 đơn vị hành chính pakat huyện saong 1.056 đơn vị hành chính pakat xã, trun hu 8 labik hành chính pakat huyện saong 561 labik hành chính pakat xã.

Rilo thun tapa, tỉnh Tây Ninh hu peih ngak samu gauk dom sarak ka pato megru, y tế, ilamu, patagok... piah daong ka urang bangsa takik tani tanat raidiuk, daong ngak brei salih karei mbaok meta palei pala di bhum taphia negar. Pagap yau bruk salih bahrau raidiuk, bruk ngak mbang, ngak huak di labaih 200 sang urang Khmer daok di xã Tân Đông, huyện Tân Châu labik jaik taphia haong negar Campuchia. Urak ini rilo sang tabiak truh kan kathaot, thun 2022, jien mek tame di dom sang dalam palei hu meng 200-250 triệu đồng sa thun.

Ninh Thuận lac sa dalam 19 tỉnh ban tapen tasik hu mblang taneh ngak sara saong hu sara praong abih dalam taneh ia. Piah paglaong yaom pandap saong cak rok patagok  bruk ngak sara hu khang kajap, tinh daok pataom prein tame buh jien tame pandar ilamo công nghệ piah paglaong năng suất, chất lượng, parilo janih pandap panda piah pabak ka hatai caong di darak pasa. Dalam nan pataom tame pachreih dom prein khang buh jien tame cak rok patagok mblang taneh ngak sara praong tui jalan công nghiệp; pandar ilamo công nghệ, peih bruk pandar jamriak dalam bruk ngak, abih di nyu nan lac bruk kuac mek saong rao sara hadei di tuk kuac mek, patagok năng suất ngak tabiak sara takik di abih 30%, chất lượng sara hu tani tanat.

Di tỉnh Tiền Giang, urak ini panat Xiêm daok hu yaom glaong, panat janih 1 yaom 30.000-31.000 đồng/kg, panat janih 2 yaom 28.000-29.000 đồng/kg. Tui Sở Ngak nong saong Patagok palei pala Tiền Giang, thau hu rilo janih baoh kayau hu prein meriak gauk yau ye panat, durian, thanh long,… saong hu pablei tui jalan chính ngạch tapa darak pasar Trung Quốc, tỉnh hu ba brei ilamu kỹ thuật pala tui jalan GAP piah paglaong chất lượng dom kaya nong pablei tapa negar langiu, saong pachreih dom kapul nyaom, menuac urang, urang nong padang bhum pala sa janih, peih bruk pabak mã số bhum pala duh ka bruk pablei tui jalan chính ngạch tapa darak pasar Trung Quốc.

Tui pathau khan di Jabat thường trực mBan Pato tacei pakat negar ka pacang caga bala langik tasik, hajan khang, glut jaleih, hangin rabuk dalam 2 harei 29 - 30.7 di dom tỉnh Bình Thuận, Đắk Lắk, Đắk Nông, Lâm Đồng, Bà Rịa - Vũng Tàu, An Giang, Hậu Giang, Bạc Liêu, Cà Mau ngak brei metai lahik menuac saong khut khat biak praong drap ar. Dalam nan, 5 urang metai (Lâm Đồng 3, Bình Thuận 1, Bạc Liêu 1) saong 1 urang njauk njauk lam lahik (Lâm Đồng),  89 baoh sang jaleih, 446 baoh sang khut tayah, par tabung; 3.869 ha padai. Daok bruk raong glang saong kaya ikan, hu 31 drei athur, 275 drei manuk ada metai; 12 ha kaya ikan khut lahik ; 5 labik jalan roya, rilo jalan palei glut jaleih.

Bruk patagok GDP dalam meteh thun ini kuhria meng akaok thun di Trung Quốc brei mboh lac, hu 13 tỉnh, ban saong bhum tự trị tagok tapa 6%. Dalam nan, bruk patagok di Thượng Hải, Hải Nam saong Tây Tạng tapa 8%, Cát Lâm saong Nội Mông tapa 7%. Kuhria rah tapa tui akaok menuac di bhap bini, duk saong tukvak ini thun blaoh, Thượng Hải saong Bắc Kinh, dom tỉnh Chiết Giang, Giang Tô saong Thiên Tân hu jeng 5 tỉnh ban dang akaok di Trung Quốc ka jien mek tame kuhria rah tapa tui akaok menuac di bhap bini.

Adat pakauk pablei brah tabiak negar langiu di Ấn Độ harei 20/7 meng blaoh, ngak ka urang blei brah mbnag daok huac lac brah tagok yaom. Rilo taneh ia di dunya hu mboh bruk rilo cửa hàng njauk rami ramik yaom pandap panda saong patakik veik brah pablei, dalam tuk rahra daok jak gauk nao blei brah khik piah. Rilo thaot binguk di mangaok mạng xã hội brei mboh bruk caong khik piah brah di rahra daok tagok glaong ka oh bhian mboh. Ấn Độ lac taneh ia ngak tabiak brah praong abih di dunya, meblah tal labaih 40% dom brah pablei tabiak negar langiu di dunya.

Dom menuac metai kayua ia dauk ia sua saong jaleih taneh mai meng rabuk Doksuri di Philippines tagok tal 25 urang, takik di abih lac 20 urang daok lahik.  Rilo labik jeng daok dauk dalam ia. Langiu di bruk menuac metai, lahik, rabuk Doksuri daok ngak kan kandah tal jaik 2 trieu 400 rabau menuac, hu 50.000 menuac njauk klaak sang nao plaih saong urak ini jeng daok di dalam dom labik plaih bala. Rabuk jeng ngak khut rilo sang danaok, njam patam, jalan mbak saong tatua. Dalam tuk nan, rabuk Khanun, lac rabuk ka 6 tuh tame Philippines daok khang tagaok, tui nan hu dom mbang hajan hangin di grauk labik dalam taneh ia./.