Patui Danak dak mbang nyaom  ka 4, Quốc hội mbang XV, maong 8 dah page harei ini 11/11, Quốc hội ginum biai di hội trường ka danak dak Hukum Giao dịch online (pasiam veik). Dahlau di tuk brei panuac tamat mbang ginum biai, akaok Mintri Thông tin saong Truyền thông Nguyễn Mạnh Hùng hu panuac langyah, ngak cambaih dom bruk bo urang Quốc hội ba tabiak.

Sở Công Thương tỉnh Bình Dương pambuak bruk haong Pasak pablei salih dunya ban bahrau WTC Bình Dương peih nyaom darak parang iek “Bình Dương EXPO 2022”. Bruk njauk ndom tal abih di Bình Dương EXPO 2022 lac parang iek “Pambuak bruk blei – pablei pandap panda” saong parang iek "Tea haong cafe tỉnh Bình Dương 2022”, hu mbaok labaih 150 doanh nghiệp, HTX. Tapa ini, UBND tỉnh Bình Dương hu khan brei thau saong tabiak harak pok angan pandap OCOP ka 19 pandap mek hu tanut 3 patuk. Bruk ngak ini piah patui bruk pok meyaom, yaih khan pandap mek hu chuẩn OCOP pakat tỉnh tal tangin urang blei pandar.

Ndem ka bruk pablei salih xang manjek di dalam TPHCM, kuhria tal bier harei 10/11, 90% labik pablei salih xang manjek hu peih pablei yau krung. Piah khik tani tanat xăng manjek di dalam ban, Sở Công Thương meda peih dom mbang ginum biai haong dom urang pablei, đầu mối, thau samar drah dom kan kandah piah lang talaih. Gam tui di nan, jak ba dom đầu mối hu labik pabak khik piah praong, klah rabha haong dom labik pablei sit daok kurang labik pabak xang. Patui veik bruk ieu Sở Jalan mbak pajang ba brei dui atah tukvak brei adat ka radaih pajeng xang manjek hu nduac di tukvak tabung glaong di kreih bilan 1/2023.

Ndom veik ka bruk Công ty TNHH An Giang Samho di tỉnh An Giang brei padeih labaih 5.300 urang ngak kayua kurang bruk ngak pandap pablei tapa negar langiu saong dom sarak daong ka urang ngak njauk padeih bruk, urak ini công ty ini brei daong ka urang ngak hu harak pambuak bruk ngak mala 12 bilan njauk brei padeih bruk lac 2 triệu đồng sa urang. Liên đoàn Lao động tỉnh An Giang jeng hu daong yaok urang njauk padeih bruk lac 500.000 đồng. Langiu di nan,công ty brei samar đóng bảo hiểm xã hội ka 500 urang ngak padeih bruk dahlau daih min oh ka hu salah bảo hiểm xã hội.

Danak dak Festival bingu Đà Lạt mbang ka 9 thun 2022 ngan haong kadha "Đà Lạt – ban bingu luac thun", hu peih tabiak meng harei ini tal puac bilan 12. Festival bingu Đà Lạt hu 9 danak dak praong, yau ye: labik bingu, danak dak ilamo "Bảo Lộc - Hương trà, sắc tơ"; Danak dak ilamo brei thau Festival bingu Đà Lạt mbang ka 9 thun 2022; Parang iek thời trang "Tơ lụa – jalan inem krung ilamo" saong labik parang iek "Thiên đường Tây Nguyên"; Danak dak ilamo Uan salam thun  2023… Tapa nan, rik daong jhul khang bruk du lịch saong paglaong raidiuk, ilamo saong mbang ngui di bhap bini dalam ban.

Mintri Giao thông Công chính Campuchia brei thau, jalan nduac samar pambuak ban ine Phnom Penh haong ban sit Bavet, tỉnh Svay Rieng, jaik pabah mbang negar pakat dunya Mộc Bài, tỉnh Tây Ninh (Việt Nam) hu peih bruk padang ngak di thun 2023 haong yaom jien tui kuhria lac labaih 1,6 tỉ USD. Jalan nduac samar ini hu makna biak praong dalam bruk pambuak pagam Trung Quốc, Myanmar, Thái Lan, Campuchia haong Việt Nam.

Liên hợp quốc hu brei tapa sa sarak brei thau bruk daok kanjak jhak nao di Apganixtan, piah peih jalan ka patagok bruk daong brei. Akaok Đại hội đồng Liên hợp quốc brei thau, 15 tapa bloh meng di tuk Taliban pasang iek taneh ia, kinh tế daok laik trun, bruk pahla dak harei dak jhak nao. 2/3 rahra daok eik lipa. Dahlau di nan, Liên hợp quốc di Apganixtan brei thau Taliban njauk taduan abih dom bruk pametai menuac bo oh tapa xét xử, taong paoh, cak mek ban glai ban glo meng di tuk Taliban tagok par karja.

Kapul ngak pahla Save the Children di negar Anh brei thau, dom uraniah njauk lavang lavaih kayua kurang mbang di Đông Bắc Syria tagok 150%. Bruk lavang lavaih di uraniah tagok rilo kayua rilo sang di Syria laik tame kan kathaot eik lipa saong oh hu jien blei pandap mbang. Jien mek tame kuhria rah tapa di dom baoh sang di Syria oh tagok, min yaom pandap mbang tagaok jaik 800% meng thun 2019 tal thun 2021 saong oh ka mboh dang veik kuhria meng akaok thun ini. Syria daok laik tame bruk srau kadau kinh tế trak di abih kuhria meng di tuk bruk mesruh gauk patuh tabiak di thun 2011./.

Urang lang: Thu Thao & M. Phuong