Page ini ( 14/12), di Ha Noi, peih nyaom biai mbang ka sa Nyaom roya Kapul Dam dara CSHCM pakat negar mbang 12, vaktu 2022 -2027. Hu mbaok dalam nyaom roya, hu 980 urang lambaok  ka labaih 22 trieu urang jakar, urang đoàn, dam dara Viet Nam dalam saong langiu negar. Ngan haong kadha “ Caong khin - Jum pataom – Khang hatai – nao dahlau – Hadah krah”, Nyaom roya mbang ini brei pataom iek veik  taong abih bruk peih ngak Sarak Nyaom roya kapul Dam dara CSHCM pakat negar mbang 11 vaktu 2017 -2022, brei thau bruk ngak, jalan ngak di Kapol dam dara saong bruk  uranaih vaktu 2022 -2027; palih ruah urang tame BCH T.Ư Đoàn mbang 12, vaktu 2022 -2027.

Ngan saong kadha “Yam tabiak tasik praong” harei pataom ikan pra mbang camereip hu peih tabiak di tỉnh Đồng Tháp dalam 2 harei, lac harei 16 saong harei 17 bilan 12 ini. Harei pataom hu Mintri ngak nong saong patagok palei pala pambuak haong tỉnh Đồng Tháp peih ngak pamaong tal dak padang thaot binguk “pasak” ikan pra, yaih khan, pok meyaom bruk raong ikan pra, sa dalam dom gah kinh tế praong di bhum taneran kraong Cửu Long. Ini jeng lac jalan peih tabiak ka dom doanh nghiệp pambuak bruk pabak – pablei dalam taneh ia saong duah dom gah pambuak bruk pablei salih hu prein khang ka janih pandap ini. 

Birau ini, urang nong tỉnh Tiền Giang patagok khang taneh pala phun mbang baoh di taneh hamu padai, ta-eng di dom huyện gah pai di tỉnh yaok thun hu labaih 1.000 ha taneh hamu padai hu salih tapa pala dom janih phun mbang baoh, ralo abih lac phun panat saong durien. Dalam tuk nan, bruk dui ba điện tal urak ini oh hu padang ngak tui sumu bruk patagok taneh pala phun mbang baoh, ba tal điện hạ áp oh pabak hu bruk pandar di bhap bini. Njauk caik hatai lac rilo mikva brei dui ba điện tui hatai di drei meng sang daok tame bein phun baoh kayau piah pandar iek glang phun mbang baoh oh khik hu salamat.

Piah daong palagaih ka urang ngak nao palei mbang Tết, Liên hiệp HTX Pablei salih TP.HCM (Saigon Co.op) ba tabiak danak dak “Sruh radaih haniem phul – Gam haong Saigon Co.op nao palei mbang Tết”. Dalam nan, danak dak brei ka urang ngak kan kathaot, brei dahlau ka urang ngak hu harak lac sang kathaot  saong hu meng 2 thun tagok oh ka hu nao palei mbang Tết. Danak dak hu 10 sruh radaih meng TP.HCM nao  22 tỉnh, ban di Tây Nam Bộ; gah kreih negar saong Tây Nguyên. Tukvak khan brei urang ngak thau lac hu ginup kadha piah hu mbaok dalam danak dak lac meng harei 27/12/2022 tal harei 5/1/2023.

Tỉnh Đồng Nai meda buh tabiak jaik 900 tỷ đồng piah daong ka urang jakar y tế di dom labik iek ruak di karja dalam tỉnh, piah daong ka dom urang y tế abih di nyu nan lac di dom labik y tế  đặc thù hu sahanang hatai ngak bruk, daong ka urang ruak hu siam jang. Yaom daong hu paraha  6 tanut tui bruk ngak, yaom meng 1 tal 4 trieu dong sa bilan. Tui kuhria, bác sĩ taduan hu 4 trieu đồng sa bilan,  điều dưỡng taduan hu 3 triệu đồng sa  bilan, brei kuhria mbang tui meng harei  1/1/2023. Langiu di nan, urang jakar y tế  di dom khu phố di dom phường, ban sit jeng hu daong  500 ribau đồng sa bilan.

Sa kapul nghị sỹ Mỹ hu yaih khan danak dak hukum pakauk oh brei pandar TikTok di Trung Quốc pak di negar Mỹ. Danak dak hukum piah khik caga rahra Mỹ meng bruk pacang saong pakauk giao dịch meng Cty truyền thông xã hội halei di Trung Quốc, Nga atau dom taneh ia daok gaok bruk oh lagaih meng dom taneh ia ini. Tui danak dak hukum ini, Tổng thống Mỹ meda brei taong phạt TikTok saong dom Cty truyền thông xã hội karei piah pacang cakak bruk pablei salih di dom Cty ini di Mỹ. Rilo bang di Mỹ pakauk pandar TikTok mangaok dom thiết bị saong dom komputer rajaei kayua huac gah an ninh taneh ia.

Takik di abih 50 urang metai di ban ine Kinshasa di Cộng hòa Dân chủ Congo hadei di tuk hajan praong ba tal ia dauk ia sua saong glut jaleih taneh. Thaok binguk bruk nan hu urang ba tagok angaok mạng  xa hoi brei mboh, taong abih labik jaik ban ine Kinshasa dauk dalam gluh baok, sang danaok saong jalan mbak njauk lubang taneh glut cakak, rilo jalan mbak praong dauk dalam ia. Karja brei thau lac meda pasiam samar abih dom khut khat  kayua hajan ia sua, gam brei daong ka dom baoh sang gaok bala.

Sa-ai Matthew Haines, sa urang daok di ban sit tapen tasik Fish Hoek, tỉnh West Cape di Nam Phi hu ramik ngak baoh sang di drei haong labaih 200.000 baoh gom Giáng sinh hadah blat blan saong peih pabah mbang taduan raok urang tame maong iek, piah pambak tabiak bruk bui sambai ka rahra daok pak ini hadei di dom thun kan kandah. Baoh sang blat blan di sa-ai dui pachreih hu menuac sia meng sit tal praong mai maong iek. Sa-ai Haines khin klah rabha bui sambai ini haong dom urang daok dalam kan kandah, oh hu jien nao du lịch./.