Hadei 4 mbang ngak bruk njauk sami samar, ngan haong abih hatai kham  ngak siam bruk, page ini, di Ha Noi, Nyaom roya pakat negar Mat tran Negar Viet Nam mbang 10 hu tamat blaoh. Nyaom roya hu khan tapa Sarak Nyaom roya Mat tran Negar Viet Nam mbang ka 10, vaktu 2024 -2029 brei mboh bruk kham merat  di taong abih bhap bini Viet Nam dalam saong langiu negar jum pataom, daong gauk, thau hu bruk lagaih, yam tapa kan kandah, kham merat ngak hu jayak bruk ngak tui ilamo birau, salih birau taneh ia, khin rahra kaya medam taneh ia khang kajap, dan chu, sumu gauk, hadah hadai siam mekre. Ong Đỗ Văn Chiến, Ủy viên Mentri Chính trị, Akok Trung ương Đảng, Akok Ủy ban Trung ương MTTQ Viet Nam mbang 9 hu pok ngak veik Akok UB Trung uong MTTQ Viet Nam mbang 10.

Tinh Vinh Long daok srap gap dom kein lagaih piah peih ngak “Fesival Kiak Lan Bhong meriak– Kinh te Hijao tinh Vinh Long mbang ka I”. Bruk padang ngak di bhum Taneran kraong Cuu Long, peih praong da-a Ban Raya Ho Chi Minh. Festival pataom tame dua asal kadha pasak lac Kiak Lan Bhong saong Kinh te Hijao hu brei kein lagaih piah ka tinh Vinh Long peih ngak saong jhul samar drah bruk ngak, yaih khan dom kein lagaih ka bruk ngak yu lit di palei bruk ngak kiak, lan Mang Thít – sa palei bruk ngak kiak lan danei angan, oh dreih pak halei dalam bhum Taneran kraong Cuu Long. Gam haong nan, brei kein lagaih piah bhum palei yaih khan dom bruk jak jeng saong kein lagaih di bhum palei, tapa nan daong dui pachreih buh jien tame ngak mbang.

Harei ini 18-10, ia ndik di Ban raya HCM gilac veik tagok glong abih meng lavik mai lac 1 met 8 di harei 30/9/2019,  ia tagok njauk tuk hajan praong meda dauk biak dalam. Di page ini, ia ndik tagok glong, dom labik di quan 7 dauk ia oh ka trun kayua hajan harei kabroi ye ia ndik tagok veik di page ini, bruk ia dauk tame dalam jang, ngak kan kandah tal raidiuk jeng bruk nao mai daok dang di rahra. Ini lac mbang ia ndik glong dalam thun, ngak kan kandah tal bruk nao mai jalan mbak,  dom bruk ngak kinh te- xa hoi di Ban raya.

Daok di Ban Can Tho, harei ini ia tagok taduan mboh ia glaong abih di balai Can Tho angaok kraong Hậu dalam mon 5h lac 2,20m, tapa tanut ka 3 lac 0,20m, kuhria mboh dahlau lac ia di Can Tho daok tagok veik tapa tanut ka 3 saong tukvak ia tagok glaong dalam bier harei mesup. Ini lac mbang ia tagok hu pabung glaong tapa tanut báo động 3 meng 0,18 – 0,28m. Gah chuc nang Can Tho mboh lac dalam dom harei ia tagok meda gaok hajan praong ngak ia dauk praong di dom labik taneh biar, bhum tapen kraong di ban Can Tho.

Dom harei jaik ini, hajan praong di gah angaok kraong ngak ia sre mai, gam dom binek ia peih tathuak ia, ngak ia dauk ralo baoh sang, 920 ha taneh phun pala dom janih dauk dalam ia, ba theik athur raong, manuk ada di bhap bini di dom xã di huyen Hàm Thuận Bắc, tỉnh Bình Thuận. Hajan ia dauk 122 baoh sang, dalam nan  hu labaih 20 baoh sang ia dauk dalam, bhap bini njuak panduan nao labik karei.  Urak ini, UB bhap bini huyen hu tacei ba dom đơn vị pagam dom talaoh brei thau ia ribuk, ia dalam, di dom labik mbuan gaok bala piah mikva thau, caga plaik njiak.

Dom mbang hajan praong, dalam dua harei tapa ngak ia dauk 33 tinh di Gah Meraong negar Prang, ngak rilo tinh ban daok dalam tanut bhong ka bruk mbuan gaok ia sua praong. Mentri Nội vụ Pareng brei thau hu pandar labaih 1.000 bol lin padam pui khuah nao tal dom tinh gah Meraong hu brei padeih ngak bruk.

Kapol dom taneh ia châu Mỹ birau khan brei thau, ralo dom kaoh pulao di bhum Caribe meda lahik meyah ia tasik daok tagok glong, ye bruk ngak pahaha gaok kan kandak ralo. Dalam tuk langik tasik salih kan daman yau urak ini, tui  kuhria mboh dahlau ia tasik tagok meg 10 tal 25 cm, dalam tuk hu jalan pacang caga dahlau. Mbiah tal thun 2050, rilo kaoh pulao di Caribe meda dauk dalam tasik meneng atau karam abih, ba talk 1,2 tỷ urang mbuan panduan ba nao labik karei. Bruk nan oh lac ngak kan kandah tal bruk ngak mbang, kinh te, bo daok ngak jhak tal drap ar inem krung saong ilamo di ralo jamaah rahra.

Harei pataom dakikan hu thaok  binguk New York 2024 daok rah tabiak di ban New York, Mỹ. Hu ieu lac harei pataom mbaok truyện tranh praong abih dalam labik gah Pun negar Mỹ, harei pataom mbaok truyện tranh peih ngak dalam 4 harei haong dom kaya me-in bhap bini, nyaom pataom, parang iek saong balai pablei salih. Dom rapaneh truyện tranh, gah brei ba tabiak truyện tranh, dien vien Hollywood hu mbaok tame harei pataom mbaok saong ndom meyai haong urang takre. Tui hội đồng yulit di ban, bruk ini kuhria lac hu ba mai labaih 80 triệu đôla ka ban New York./.