Nyaom roya Phật giáo pakat negar mbang ka IX, tukvak 2022-2027 hu peih tabiak di harei ini di Ban ine Hà Nội. Ngan haong kadha “Kỷ cương - trách nhiệm – Jumpataom – patagok”, di  nyaom roya ini, Hội đồng chứng minh, Hội đồng trị sự Giáo hội Phật giáo Việt Nam ba tabiak jalan ngak phật sự, dom bruk ngak praong piah cak rok patagok Giáo hội dalam 5 thun hadei di tukvak IX. Nyaom roya mbang ka IX meda peih dom adat cambat pok ngak Đức pháp chủ saong Hội đồng chứng minh; pok ngak Chủ tịch saong Hội đồng trị sự, tấn phong giáo phẩm; peih bruk pasiam Hiến chương...

Chủ tịch UBND TP.HCM Phan Văn Mãi brei thau, tal harei ini, TP bahrau peih brei hu 34% phun jien đầu tư công. Piah jhul patagok bruk peih brei phun jien đầu tư công, ong Phan Văn Mãi pok panuac likau Thủ tướng Chính phủ, tacei pato dom Mintri, dom gah tham mưu brei pabak phun jien di dom danak dak yau ye Metro ka 1; jalan vành đai 3. Langiu di nan, TP.HCM hu panuac caong Thủ tướng rajaei pasang iek, rami ramik brei phun jien meng kadung jien pakat negar vaktu 2021-2025 piah buh tame 3 danak dak blei pandap panda y tế brei 3 sang iek ruak lac: Sang iek ruak Đa khoa bhum Thủ Đức, Sang iek ruak Đa khoa bhum Hóc Môn saong Sang iek ruak Đa khoa bhum Củ Chi.

Meng hatai kham marat pasiam sang taih tahak ka bhap bini, thun ini, Mặt trận Negar dom pakat dalam tỉnh Vĩnh Long hu jak ba dom kapul, manuac urang sa tangin haong gauk rik tame padang ngak bahrau 1.716 baoh sang anit ranam ngan haong paok jien lac labaih 85 tỷ đồng saong ngak pasiam 47 baoh sang haong yaom jien abih tih abih lac 780 triệu đồng. Tukvak anak tal, Mặt trận Negar Việt Nam tỉnh Vĩnh Long hu jak ba dom kadung jien piah daong ka dom urang ini, kham marat padang ngak pasiam dom sang taih tahak ka dom sang kan kathaot, sang jaik kathaot.

UBND TP Cần Thơ bahrau brei thau angan 63 kraong ribaong bingun danao dalam ban oh brei lam klaak, piah khik kajap bruk pacang dauk saong khik caga halau ia. Dom mbang triều cường thun ini nyu glaong jang thun ia tagok glaong abih lac thun 2019, ngak kan kandah praong tal bruk ngak mbang, ngak huak, bruk nao mai, pablei salih di bhap bini. Langiu di bala meng langik tasik, daok hu bala mai meng menuac ngak, tuk dom kraong ribaong piah tathuak ia saong pacang caga ia dauk daok dak harei dak takik nao. Meng bruk ini, ban Cần Thơ hu jalan langyah dom bruk ngak suan gah padang ngak, lih mek, lam lahik dom kraong, ribaong.

Harei Pataom ilamo - Du lịch Bạc Liêu saong Dạ cổ hoài lang thun 2022 ngan haong kadha "Bạc Liêu pambuak pagam asal siam mekre abih di inem krung saong hatai caong cak rok patagok" daok hu peih tabiak di tỉnh Bạc Liêu. Harei pataom hu 14 bruk ngak praong, rilo janih, hu mbaok di labaih 500 nghệ sĩ, nghệ nhân, diễn viên di 25 tỉnh, ban dalam taneh ia. bruk njauk mayai di Harei pataom lac brukpambuak gauk di ilamo haong du lịch. Dalam nan, gam pok mayaom yaom glaong di kadha Dạ cổ hoài lang kayua aruah nhạc sĩ Cao Văn Lầu paneh tabiak atah di ini labaih 100 thun, gam khik ramik saong pambak tabiak Ilamo Đờn ca tài tử Nam bộ hu UNESCO pok brei angan lac inem krung ilamo oh maong mboh di menuac sia dunya.

Urang Trung Quốc blei tal meteh dom sang chung cư pablei ka menuac negar langiu daok di Thái Lan dalam 8 bilan tapa. Dalam nan rilo meng lac dom sang siam chit jien (penthouse) praong meng 150-300m2 tapen kraong Chao Phraya. Yaom yaok baoh sang lac jaik 5 triệu bạt (140.000 USD). Dang patui di nan dalam angan menuac negar langiu blei sang di Thái Lan lac urang Mỹ, Prang, Nga, Anh, Australia, Ấn Độ, Campuchia.

Gilang paraik patagok châu Phi (AfDB) hu brei tapa paok jien hu yaom 5 triệu 1 rituh 20 ribau USD ka Danak dak ngak pandap mbang samar drah di Liberia. Danak dak ngak pandap mbang di Liberia meda hu peih ngak meng urak ini tal thun 2024, brei ka rajaei taneh ia ini pabak dom paok daong samar drah tapak ka dom urang nong mbuan gaok kan kandah. Paok daong ini jeng brei ka rajaei Liberia ba mbuan lagaih ka urang nong hu pandar pajaih saong khak drah bahrau.

Italy tabiak bruk samar drah hadei di tuk 7 urang metai kayua hajan praong ngak brei jaleih haluk di mangaok pulao Ischia di taneh ia ini harei 26/11. Thủ tướng Italy hu panuac  tabiak bruk samar drah ka mbang ia dauk ia sua saong jaleih taneh biak khang, saong brei daong ka bhap bini gaok bala jaik 2 triệu Euro. Di bilan 2/2021, sa mbang jaleih taneh rah tabiak di labik takai tasik Italy jaik Genoa, ngak brei sa labik taneh kubo glut jaleih, yaok ratuh pati dar urang metai njauk ia ba seik tabiak tasik./.