Rajaei bahrau ba tabiak sarak ka 24 tacei tabiak tanut jien bilan cơ sở ngan haong urang jakar, công chức, viên chức saong kapul bol pan phao kraong. Tui nan, meng harei 1-7-2023, pandar tanut jien bilan cơ sở 1,8 triệu đồng sa bilan ka 9 nyaom urang. Sarak tacei tabiak tanut jien bilan cơ sở pandar ka urang jakar, công chức, viên chức, urang hu mbang jien bilan, jien phụ cấp saong urang ngak bruk dalam dom jabat, kapul ngak bruk di Đảng, Kanja, Mặt trận negar Việt Nam, kapul chính trị - xã hội saong kapul hu kadung jien kanja daong phun jien piah ngak di trung ương,  tỉnh, ban di trung ương,  huyện, quận, ban sit, ban di tỉnh, ban di trung ương saong kapul bol pan phao kraong...

 Di Bình Dương, Kapul dam dara CS HCM pakat negar bahrau peih bruk pok meyaom 54 "jaing ranaih naih joi" pakat negar mbang ka 14.  Ini lac dom urang ngak hu mbaok tapak tame bruk ngak, tuk halei jeng kham merat yam tapa yaok kan kandah piah ngak hu rilo jang bruk ba tabiak, lac dom kỹ sư thau sahneng duah bahrau, ba mai kein laba glaong ka doanh nghiệp.  Dom kreih camin hadah tabiak meng rilo labik glaong- biar karei di gauk, rilo bruk ngak karei di gauk, min hu hatai dreih yau gauk lac takre sahneng duah bharau, abih drei ka bruk ngak saong caong rik daong ka bruk patagok di taneh ia.                                                         

Jalan cao tốc Vĩnh Hảo – Phan Thiết, tỉnh Bình Thuậndaok caga brei nduac radaih. jalan cao tốc ini hu peih ngak di bilan 9/2020, atah labaih 100 km ngan haong 5 tanut giao nao tapa dom huyện Tuy Phong, Bắc Bình, Hàm Thuận Bắc, ban Phan Thiết saong labik puac pambuak haong huyện Hàm Thuận Nam, tỉnh Bình Thuận. Urak ini, dom kapul peih ngak di jalan cao toc daok samar drah ngak salah dom bruk hu makna praong piah samar ba tame peih pakah di harei 19/5 gam haong danak dak thành phần Nha Trang - Cam Lâm.

Urak ini lac puac bilan thu, yam tame bilan hajan, urang ngak sara di tỉnh Bến Tre tamat bilan ngak sara piah pablei. Thun ini, yaom sara tuk halei jeng daok di tanut glaong nan ye urang ngak sara di tỉnh ini hu jien mek tame tani tanat. Bilan sara thun ini, urang ngak sara pablei hu yaom glaong saong glaong jang dom thun dahlau. Di tuk Tết, sara asar yaom 170 rabau đồng sa giạ (45kg), glaong jang thun dahlau 60 rabau đồng/giạ. Urak ini, di puac bilan sara, yaom sara jaik 100 rabau đồng/giạ. Tuk yaom sara trun, urang ngak sara khik veik tal kreh bilan hajan yaom tagok veik meng pablei. Yaok thun, Bến Tre ngak sa vụ sara labaih 1 rabau ha di dom labik dalam huyen Ba Tri saong Bình Đại.

Urak ini, yaom baoh thanh long di tỉnh Tiền Giang daok tame tukvak tapung glaong. Yaom thanh long tai bhong janih 1 di bein jaik 40 ribau đồng/kg, janih 2, janih 3 yaom meng 30-33 ribau đồng/kg. Ini lac tanut glaong di abih dalam dom thun jaik di ini. Tui yaom ini, yaok kg thanh long, laba hu meng 15-20 ribau đồng. Min, bahrau tame bilan hajan (njauk bilan)  njauk hu meng 10-15% bein phun hu baoh brei paik nan baoh takik. Labaih 1 bilan hadei, thanh long meda tame bilan paik baoh. Tiền Giang hu mblang taneh pala thanh long jaik 10 ribau ha. Meng dahlau di Tết meng kan tal urak ini, kayua darak pasa Trung Quốc blei tame biak rilo, nan ye bruk pablei tabiak baoh kayau ini pablei di tanut glaong, po bein hu jien mek tame mbaih.  

Đảng Tiến bước (Move Forward) di ong Pita Limjaroenrat taduan hu bruk pachreih tui di yaok labik bầu cử dalam negar saong daok dang anak Đảng Kayua taneh ia Thái min glaong biar jang gauk oh hadom, tui panuac khan oh ka cambaih laih di di UB bầu cử Thái Lan di tuk saboh page harei ini  (15/5). Meng dom phiếu bầu di labaih 47 rabau 900 dalam labaih 95 rabau labik buh phiếu dalam taneh ia, Đảng Tiến bước daok angaok jalan meblah hu 151/500 kaghaiy dalam Hạ viện, ngan haong 115 khagaiy nghị sĩ hu pilih ruah tui labik bầu cử saong 36 khagaiy hu pilih ruah tui dom angan dalam harak angan di đảng.  

Tukvak jaik di ini, dom urang njom ruak vi-rút hợp bào hô hấp (RSV) daok rahtabiak biak rilo di uranaih pak di Thượng Hải, ngan haong bruk hu kuhria taong ruak lac yam tapa Covid-19 saong ruak cúm, kayua bruk nao mai di rahra daok tagok hadei di tuk Trung Quốc trun bruk khik iek Covid-19.  RSV, lac sa janih virus ngak tabiak dom ruak deih yau ruak Covid-19 saong ruak cúm, dalam nan hu ruak pandiak, patuk, pandiak tarakaong saong pandik rup, jaik di ini hu ngak ka dom amaik ame di Thượng Hải haduh hatai kayua dom kan kandah bo ruak ngak tabiak ka anek mbik di drei.

Dak harei dak hu rilo taneh ia di dunya daok kham merat duah jalan patrun bruk pagam pambak tame jien Đôla Mỹ dalam dom bruk pablei salih saong duah  dom jien karei salih tame. Bruk nan daok tagok kayua dom cuang kandah kinh tế sapng địa chính trị bo rilo taneh ia daok dang anak meng bruk taong phạt atau pagam pambak tame Mỹ. Tui Kadung jien dunya, yaom jien đôla dalam khik piah ngoại hối dunya nyu trun khang duk haong tanut labaih 70% di thun 1999. Ai Cập lac taneh ia bahrau abih tabiak panuac brei thau lac daok pasang iek, brei tapa jien di dom gah pambuak bruk pablei salih nao mai, dalam nan hu Trung Quốc, Ấn Độ saong Nga piah trun meneing bruk caong hu jien đôla../.