Chủ nhiệm Ủy ban Pháp luật Hoàng Thanh Tùng

Kapul nyaom, manuac urang peih ngak quyen sở hữu trí tuệ pambuak tal hala dok di taneh ia, Quốc huy, Quốc ca oh brei pacang cakak, cagar veik bruk yaih khan, pandar hala dok taneh ia, Quốc huy, Quốc ca. Ini lac sa dalam dom asal kadha hu pasiam, pabak dalam danak dak Hukum pasiam pabak dom dom paka di Hukum sở hữu trí tuệ hu dom urang Quốc hội ginum biai di nyaom biai dom urang  Quốc hội chuyên trách hu peih tabiak di dah page ini 28/3.

Tui panuac khan meng Mintri Y tế, 13 triệu 700 rabau mbang dalam 21 triệu 900 rabau mbang vắc xin COVID-19 ka uraniah umo meng 5 tal mala 12 thun hu negar Úc sanya daong brei. Mbang klauk camereip abih jaik 9 triệu 700 rabau mbang, dalam nan hu 700.000 mbang vắc xin  di Pfizer ngak saong 9 triệu mbang hu Moderna ngak,  hu date pandar tal bilan 7-2022, daok hu di Úc saong meda hu pajeng mai Việt Nam dalam adit ini hadei di tuk ngak salah dom harak gar pambuak tal.

Kapul ngak bruk di dom gah pambuak gauk pacang caga pablei salih lau tỉnh An Giang brei thau, dom harei jaik di ini, gah chức năng tỉnh ini hu rilo mbang duah mboh, cap khik biak rilo pandap panda hu tauk angan negar langiu oh hu harak gar, oh thau asal cambaih mai meng halei hu mboh di labikhuyện bhum tapen negar Tịnh Biên.

Ong Lê Đình Quyết – Phaok akaok jabat kuhria mboh dahlau bruk langik tasik bhum Nam Bộ - brei thau, dalam vaktu meng akaok bilan tal kreh bilan 4, gah Meraong negar meda hu mbang pandiak bhang khang abih di bilan pandiak thu thun ini. Bilan hajan jeng mai tal aval jang duk saong yaok thun, meng kreh bilan 4 Nam Bộ meda yam tame bilan hajan.

Bier harei kabroi, sa mbang hajan praong gam haong hangin khang ngak ka yaok piluh baoh sang bhap bini di ban sit Định Quán, huyện Định Quán, Đồng Nai  par tabung, yaok rituh sang bhap bini  lahik dien. Rilo baoh sang njauk hangin par ngak lahik abih tabung sang, tôn par tabiak atah di nan yaok piluh mét. Biak patuah lac oh hu urang halei njauk hagait dalam bala meng langik tasik nan.

Thượng Hải, pasak jien padai di Trung Quốc kuhria meng harei ini meda peih bruk pacang veik 2 mbang ngan haong ban praong hu 26 triệu menuac. Dalam mbang 1 pacang veik, meda parabha ban jeng 2 rah tui kraong Hoàng Phố dalam 9 harei, pacang oh brei nao mai dom baoh tatua, jalan lubang tapa kraong saong dom labik thu phí jalan radaih nduac samar di dom quận gah timur piah peih bruk dut iek COVID-19.

Tui roh duah karei gauk di 2 kapul bảo hiểm y tế praong abih di Israel bahrau khan brei thau lac mbang klauk vaccine ka 4 caga COVID-19 langiu di trun bruk mbuan njom mbak ruak meda daok daong biak rilo dalam bruk plaih di metai lahik ka urang ruak. Min, tui dom urang ilamo mboh lac njauk hu rilo tukvak jang piah taong yaom ka kein lagaih di mbang klauk vaccine ka 4 dalam tukvak suai lavik jang, jang yau kein laba di sa janih vaccine ngan haong dom biến thể karei di gauk di virus SARS-CoV-2.

Harei ini (28/3), Philippines haong Mỹ peih bruk pasram mesruh yaok thun “Balikatan” di rilo labik karei di gauk di angaok pulao Luzon di Philippines. Hadei di sa tukvak klaih klaoh kayua jit Covid-19, bruk pasram mesruh Balikatan 2022 hu maong lac bruk pasram haong gauk praong abih kuhria meng dahlau mai di bol bala Mỹ haong bol bala Philippines. Dui atah meng harei 28/3 tal harei 8/4, bruk pasram mesruh Balikatan hu mbaok di labaih 5.000 lin Mỹ haong jaik 4.000 lin Philippines./.    

Urang lang: THU THAO & M.PHUONG – 28/3/2022