Biar harei kabroi, HĐND TPHCM hu palih ruah ong Nguyễn Văn Được, Pho Bi thư Thành ủy TPHCM ngak Akok  UBND Ban raya. Ar khan ka danak dak bruk ngak anak tal, Pho Bi thu Thành ủy TPHCM Nguyễn Văn Được sanya kham merat khik siam jalan diukrai lagaih, ngak brei patagok bruk jum pataom, jalan sahaneng hadah krah piah ngak Harak cih vak ba tabiak bruk ngak di drei hu jak jeng tantu. Yau nan ye, dom urang ngak praong di UB bhap bini Ban raya HCM birau hu ramik pasiam taong abih nan lac ong Nguyễn Văn Được ngak Akok UB saong 5 Pho akaok UB hu dom ong: Dương Ngọc Hải (Phó Chủ tịch thường trực), Bùi Xuân Cường, Võ Văn Hoan, Nguyễn Văn Dũng saong amuk Trần Thị Diệu Thúy.

Sang bac Chính trị tỉnh Lâm Đồng birau hu var ngak bruk haong Sang bac THCS xã Tân Thượng, huyện Di Linh, Lâm Đồng ka bruk pambuak peih ngak dahlau abih “ Pato sap bangsa ka urang bangsa Cơ Ho”. Tui bruk ba tabiak, tal bac sap ndem dalam 5 adit haong 15 urang bangsa Cơ Ho di xã Tân Thượng. Ini lac bruk pambuak paglong bruk thau ndem panuac Cơ Ho ka urang bangsa Cơ Ho, rik tame khik ramik saong patagok  ilamo bangsa; pathau khan dom sarak Karja meng panuac Cơ Ho.

Tui UBND tỉnh An Giang, urak ini dalam tỉnh daok hu labaih 4.000 baoh sang khin daong hu sang daok. Ong Hồ Văn Mừng, Akok UBND tỉnh An Giang khan lac, piah ngak salah bruk hu makna praong nan, tui jalan tacei ba di Thu tuong Rajaei, An Giang  daok pataom tame jak ba manuac sia rik daong tame, ngak brei cak rok patagok dom preih khang di drei, kham merat di po sang nan, gam haong bruk daong di karja, kham merat ngak brei abih baoh sang oh daok taik tahak di dom bhum palei hu samar jang tukvak ba tabiak.

Ban raya HCM ngak bruk haong 11 doanh nghiep saong Lien doan lao dong Ban raya, tapa nan, dom doanh nghiep  hu tut angan buh jien padang ngak jaik 40.000 baoh sang.  Langiu  di nan, UB bhap bini Ban raya jeng daok peih bruk palih ruah po taduan ngak danak dak sang daok xa hoi ngan haong klau mblang taneh kayua karja khik iek, padang jaik 3.000 baoh sang…Ban raya tacei pato dom so, dom gah pambuak  tal kham merat pambuak bruk padang ngak danak dak sang daok xa hoi ka urang ngak kong, urang ngak apah, urang bol lin, urang jakar mbang jien bilan di karja ban raya HCM.

Bo Tu lenh Quan khu 7  harei kabroi peih bruk taom mbaok dom urang halau janeng di  bhum taneh labik ini akok thun 2025, piah pakhang talei rohim jiak gauk jang, anit ranam jang urang ngak bol pan phao kraong Quan khu thaong dom agama. Thun 2024, Bo Tu lenh Quan khu 7 saong dom urang ngak pahala hu daong jien padang 30 baoh sang ilamo, labik padhih pasram rup pabhap ka dom sang baha, sang megik saong bhum urang bangsa takik, kuhria abih tih tui jien labaih 15 ti dong; padang saong alin 325 baoh sang bol lin – bhap bini, dalam nan hu 62  baoh sang alin ka urang bangsa takik saong urang agama hu raidiuk kan kandah oh ka hu sang daok siam mekre, kuhria abih jien buh tame ngak labaih 26 ti dong…

Tong thong Nga Vladimir Putin taong yaom bruk ginum biai akaok meti di Nga - Mỹ di ban ine Riyadh, Arab Saudi ngak brei salih siam jang talei rohim dua negar jeng ye langyah hu dom bruk kan kandah di dunya, dalam nan hu bruk mesruh metak di Ucraina. Tong thong Vladimir Putin khan  lac, dua gah njauk hatai pasiam veik  bruk ngak yau bhian di dom gah pambuak bruk nao mai, ini lac bruk ngak akaok meti piah yam tal langyah rilo bruk dua gah daok sangka caik hatai. Urang ngak praong negar Nga mboh lac, Ucraina oh daok langiu dom bruk ginum biai brei  padeih mesruh metak. 

Mbang akaok meti kuhria meng tuk jit ruak praong COVID-19 rah tabiak, jit kum catang jang ruak COVID-19 ngak jeng ruak jalan suan yawa trak metai manuac rilo abih di bang California, Mỹ, ba tal dom sang iek ruak di bang ini oh daok labik ka urang tame taong ruak. Tui pasak Pasang iek saong Pacang caga jit ruak Mỹ  kuhria  hu takik abih lac 29 trieu  mbang urang ruak kum. 370.000 mbang urang ba tame sang iek ruak saong 16.000 urang metai dalam bilan ruak kum ini. Dom urang y te duh ka bhap bini di My daok kakei rahra pak ini klauk jru caga ruak kum.

Dom radaih pui yulit rivang iek tabung ceik glong akaok meti di dunya hu ba tame peih ngak di ban Lệ Giang, tỉnh Vân Nam, Trung Quốc. Jalan pambuak tal ban klak meng kan di Lệ Giang hu UNESCO taduan brei angan  Drap ar ilamu dunya saong labik gheih mekre Ceik Tuyết Ngọc Long, glong 5.000 m, hu tuyet laik thun taom thun. Piah pasiam bruk jarah rivang iek, radaih pui hu pagam pambang tho meng kareih camin  pacang pandiak ia harei cực tím, ngak brei ka tuai damuai hu maong iek abih dom thaik lavang siam mekre meta di ceik glai nan./.